Camba 4
4
Ɓi ɗeɓ rimuk ŋ Aadama na Aawa
1Ŋ finho ineem Aadama hunnda na ɓitiice Aawa, yeem ammba rook po a ɓasilla, a teekka kuɓka Kayin. A yi Aawa, a woosa ne : « Ŋ ɓaatɗohiŋ Nikiɗi ŋ raakiɗ ɓo' ƴaar. » 2A raakissa kuɓu ƴaar wiiriis teeku Abel, taambɗoh Kayin. Abel nikka niiɗoh, Kayin nikka guuroh.
3Wa kaɗoh kaɗoh po Kayin ɓayya ŋ in ca a guure, a puliɗta seeƴkaah#4:3 seeƴuk : ɗeɓgaan, ɓooɓa seeƴkeen wuu Kooh, waaye, wa ɗalohiɗ na seeƴki woti-woti. Laam, ɓa seeƴkee wuu Nikiɗi Kooh, wa nikee wuu in wiiriis haa te ali in nikeeɗi ŋ harmban ɓa na Kooh. wuu Nikiɗi. 4Abel nammba ɓay ŋ saaw caŋ gat caŋ ɗe, a puliɗta seeƴkaah ngaŋ sepet caŋ mbaal ca uupee fayum. Ŋ ineem Nikiɗi neɓuusa ŋ Abel, a teyɗukka ina a eɗoh, 5waaye a neɓuuɗi ŋ Kayin na ina a eɗoh. Ineem ɓekka Kayin aay-keeñ miskiɗ, a ñuusɗukka. 6Nikiɗi meekissa ɗe ne : « Fu ayruk ye po fikiiriŋ ɗa mannda an ? 7Tumohaaɗiŋ ɗa baah ɗah, fu hey teyɗukɗasse ; fu tumɗi baahiɗ ɗah, bakaaɗi weɗi wii raɗukka ŋ nguɓu tuuƴ fu na sekee ɗa, ne wa yilif ɗa, te ya fu joya min. »
8Waaye, Kayin woosa taambɗoh ce ne ɓa kaɗ yohon ca. Wa ɓa nik ŋ yohon ca, Kayin soonnga Abel, a appa ɗe.
9Ɗekka po Nikiɗi meekissa ɗe ne : « Kayin, a nde taambɗoh fu Abel ? » A loffa ɗe ne : « Ŋ inahɗi kat, ñam na niiɗee ɗe haa. » 10Nikiɗi woosa ɗe ne : « Fu haɓiɗ ye an ? Ŋ kerhiɗ ñif miŋ taambɗoh fu looƴkohha kehƴi po nga so ne wa wirndukɗu. 11Fu alkuuɗ po merhey mi faɗiɗ ɗa, laam ya fu aniɗa ñif miŋ taambɗoh fu fu aam. 12Fu guuris merhey mi ɗah, wa eɗissanɗi ɗa in. Fu na hee hey wiltiɗohe ŋ kehƴi, fu genanɗi ɗisik yino. »
13Kayin woosa Nikiɗi ne : « Ini fu deg go ɓitootiɗ lool po ŋ antalɗaa. 14Woti fu aañiɗ to ŋ merhey mi an e ? Ŋ hotiɗ ne ŋ hey ɗa use, mi na hee hey wiltiɗohe ŋ kehƴi, ŋ genanɗi ɗisik yino po ɓo' nu hot to ɗah, a ap po. » 15Nikiɗi woosa Kayin ne : « Kon, ɓo' nu ap ɗa ɗah, fu hey wirndukɗasse waas yasna-kanak. » A waakiɗta Kayin inhisoha, ne ɓo' nu hot ɗe ɗah, a apuu ɗe.
16Wa taambohha ɗaa, Kayin kaɗta gena kur ka na woyse Nood, ŋ pulohaaɗ-nohaŋ Eden, a ussa Nikiɗi.
Ɓi puloh ŋ Kayin
17Kayin hunnda na ɓitiice, yeem ammba rook po a ɓasilla, a teekka kuɓka Henok. Kayin yippa kur-taah, a teekkaa ngaŋ kuɓkiŋ ɗe Henok. 18Henok nikka baabiŋ Irad, Irad nikka baabiŋ Mehuya'el, Mehuya'el nikka baabiŋ Metusa'el, Metusa'el nikka baabiŋ Lemek.
19A yi Lemek, a ɓayya ɓitiɓ kanak, yi koc na woyse Aada, yi kanakɗoh, Silla. 20Aada a yi rim Yabal, baab-caaciŋ ɓi na gene ŋ ɗiip#4:20 ɗiip : ɗiip ci ɓa genohee ɗeɓgaan ca nikee ndut haɓɗohu piis wala und. ci, niiɗe gat ci. 21Taambɗoh ce ƴaar, ya teekse Yuubal, a yi baab-caaciŋ halmoh ci na mbiiɓoh ci. 22Silla, ɓitɓiŋ ɗe yinoora, rimmba Tubal-Kayin, sisɓi na tiɓe moos na tiwiñ. Tubal-Kayin raakeen taambɗoh ɓitiɓ teeku Naama.
23Lemek woosa ɓitiɓ ciŋ ɗe ne :
« Ee, ɗu ɓi ɓitiɓ ciŋ ngo,
Aada na Silla,
Sikɗukaat woo kiŋ ngo.
Heeh, sikɗukaat to,
ɗu ɓi ɓitiɓ ciŋ Lemek.
Ƴaar gaañiɗ to,
ŋ appa ɗe,
Komaaki ɓuurra so,
ŋ boommba ɗe.
24Te nik ne e Kayin na hee wirndukɗasse
waas yasna-kanak ne a apu ɗah,
cam ! Lemek na hee wirndukɗasse
waas ndaŋkiyaah-yasna-kanak na yasna-kanak (77) ! »
25Aadama hunisseen na ɓitiice, a ambissa rook, a raakka kuɓu ƴaar, Aawa teekka ɗe Set#4:25 Tiikiŋ "Set" mand na "eɗ" wala "on" ŋ peɗeem heber. , laam a woyee ne : « Kooh oniɗ to kuɓu wiiriis, yi na hee namsiɗe Abel, yi Kayin ap. »
26Set nammba raak kuɓu, a teekka ɗe Enos. Ŋ jamanoocaam, weɗ ɓa camboh ɓeeɗkoh Kooh ŋ tiikiŋ Nikiɗi.
Выбрано:
Camba 4: YM
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Wycliffe Bible Translators, Inc
