San Mateo 1

Xii sikua Jesucristo

(Lc. 3:23-38)

1Ya yóꞌó ku tutu nuu vaxi kivi na xi̱kuu xii sikua Jesucristo ra kúu seꞌe sikua ra David, ta ra David ku ra xi̱kuu seꞌe sikua ra Abraham xinaꞌa.

2Ta ra Abraham ku ra xi̱kuu iva ra Isaac, ta ra Isaac ku ra xi̱kuu iva ra Jacob xiꞌin nda ñani ra. 3Ta ra Jacob ku ra xi̱kuu iva ra Judá, ta ra Judá ku ra xi̱kuu iva ra Fares xiꞌin ra Zara ta yá Tamar ku yá xi̱kuu siꞌí nda. Ta ra Fares ku ra xi̱kuu iva ra Esrom, ta ra Esrom ku ra xi̱kuu iva ra Aram. 4Ta ra Aram ku ra xi̱kuu iva ra Aminadab, ta ra Aminadab ku ra xi̱kuu iva ra Naasón, ta ra Naasón ku ra xi̱kuu iva ra Salomón. 5Ta ra Salomón ku ra xi̱kuu iva ra Booz, ta yá Rahab ku yá xi̱kuu siꞌí ra Booz. Ta ra Booz ku̱u ra xi̱kuu iva ra Obed ta siꞌí ra Obed ndixiyo yá Rut, ta ra Obed ku̱u ra xi̱kuu iva ra Isaí. 6Ta ra Isaí ku ra xi̱kuu iva ra David, ta ra David ku ra xi̱kuu iva ra Salomón, ra ka̱ku tixin yá ndi̱xiyo síꞌi ra Urías. 7Ta ra Salomón ku ra xi̱kuu iva ra Roboam, ta ra Roboam ku ra xi̱kuu iva ra Abías, ta ra Abías ku ra xi̱kuu iva ra Asa. 8Ta ra Asa ku ra xi̱kuu iva ra Josafat, ta ra Josafat ku ra xi̱kuu iva ra Joram, ta ra Joram ku ra xi̱kuu iva ra Uzías. 9Ta ra Uzías ku ra xi̱kuu iva ra Jotam, ta ra Jotam ku ra xi̱kuu iva ra Acaz, ta ra Acaz ku ra xi̱kuu iva ra Ezequías. 10Ta ra Ezequías ku ra xi̱kuu iva ra Manasés, ta ra Manasés ku ra xi̱kuu iva ra Amón, ta ra Amón ku ra xi̱kuu iva ra Josías. 11Ta ra Josías ku ra xi̱kuu iva ra Jeconías xiꞌin nda ñani ra. Kivi ikán kua ndi̱xiyo na Babilonia kuachi xiꞌin na Israel, ta ku̱chiñu na nuu na Israel, saa ti̱in ñaꞌa na kuaꞌan na xiꞌin na ñuu Babilonia.

12Ta ra Jeconías ku ra xi̱kuu iva ra Salatiel, ra ka̱ku tá xi̱ndoo na ñuu Babilonia, ta ra Salatiel ku ra xi̱kuu iva ra Zorobabel. 13Ta ra Zorobabel ku ra xi̱kuu iva ra Abiud, ta ra Abiud ku ra xi̱kuu iva ra Eliaquim, ta ra Eliaquim ku ra xi̱kuu iva ra Azor. 14Ta ra Azor ku ra xi̱kuu iva ra Sadoc, ta ra Sadoc ku ra xi̱kuu iva ra Aquim, ta ra Aquim ku ra xi̱kuu iva ra Eliud. 15Ta ra Eliud ku ra xi̱kuu iva ra Eleazar, ta ra Eleazar ku ra xi̱kuu iva ra Matán, ta ra Matán ku ra xi̱kuu iva ra Jacob. 16Ta ra Jacob ku ra xi̱kuu iva ra José, ra ndi̱xiyo ií yá María, yá ndi̱xiyo siꞌí Jesús, ra kúu Cristo.

17Tiempo ya ka̱ku ra Abraham ra veꞌe núnu̱ú, iin saa nda tiempo ya ka̱ku ra David, ta ndi̱yaꞌa uxi kumi nuu na veꞌe ku̱u mií na. Saa ndikiꞌin tuku ya xaꞌa uxi kumi nuu na veꞌe, tiempo ya ka̱ku ra David iin saa nda tiempo nuu ti̱in na ñuu Babilonia na Israel ku̱aꞌan na xiꞌin na ñuu Babilonia. Nda tiempo ya ti̱in na Babilonia na Israel kuaꞌan na ñuu Babilonia, iin saa nda tiempo ya ka̱ku Jesucristo ta ndi̱yaꞌa tuku uxi kumi nuu na veꞌe na xii sikua ra, saa ka̱ku ra.

Ya ku̱u nuu ka̱ku Jesús

(Lc. 2:1-7)

18Soꞌva ku̱u nuu ka̱ku Jesús ra kúu Cristo: Yá María, siꞌí Jesús, ta xa íyo yuꞌu yá tindaꞌa yá xiꞌin ra José, ta täꞌan ka vi tindaꞌa na xiꞌin taꞌan na, ta xa ndi̱kee va seꞌe yá i̱kan Tachi I̱í Ndioxi. 19Ta ra vaꞌa, ra toꞌo ini ku ra José, ra kúni tindaꞌa xiꞌin yá, xaꞌa ya ikán kua köo ndi̱xiin ra kata ra tuꞌun xaꞌa yá nuu ndiꞌi na, vaꞌa ka ndi̱kani ini ra sindoo sěꞌe ra yá. 20Saa ndíkani ini ra ndá kuꞌva sindoo sěꞌe ra yá, ta ndi̱tuvi iin tatun Ndioxi nuu ra tixin xani ndi̱kaꞌan ya xiꞌin ra, káchi ya saa:

―José, seꞌe sikua ra David, ku ïꞌvi un ndikiꞌin un yá María koo yá xiꞌin un, saa chi ya loꞌo ndíkaa tixin yá ta Tachi I̱í Ndioxi i̱kan saa xiꞌin yá ndi̱kee seꞌe yá. 21Kaku seꞌe yá ta chinuu un kivi ra kunani ra JESÚS, saa chi ra ikán ku ra sikaku na ñuu ra xaꞌa kuachi na. 22Ndiꞌi ya yóꞌó ku̱u nuu ndi̱xinu ya ndi̱kaꞌan ndoso Tata yo tixin ra ndi̱kaꞌan ndoso tuꞌun ra, tá ndi̱kaꞌan ra, káchi ra saa:

23“Kee seꞌe iin yá kuâán loꞌo, taa loꞌo koo seꞌe yá kaku.

Ta ra loꞌo seꞌe yá ta kunani ra Emanuel”.

Chi kivi ra yóꞌó ta kúni kachi ya: “Ndioxi íyo xiꞌin yo” ―káchi ra ndi̱kaꞌan ndoso tuꞌun Ndioxi xinaꞌa.

24Saa ndi̱kaxin ini ra José ta i̱kan ra tá íyo ya ndi̱kaꞌan tatun Ndioxi xiꞌin ra. Saa ndi̱kiꞌin ra yá María íyo yá xiꞌin ra. 25Sundi köo ndi̱kixi yachi na xiꞌin taꞌan na, xi̱ndatun ra nda ka̱ku seꞌe yá, saa chi̱nuu ra kivi ra loꞌo ikán náni ra JESÚS.

Выбрано:

San Mateo 1: xta

Выделить

Копировать