San Juan 6

Síkuxi Jesús uꞌun mil naꞌa

(Mt. 14:13-21; Mr. 6:30-44; Lc. 9:10-17)

1Tá ndiꞌi ikán ta ndi̱kiꞌin Jesús kuaꞌan ra chí inka ñaꞌñu yuꞌu nduta ñûꞌu ya káꞌan na xiꞌin Galilea án Tiberias. 2Ta iin táꞌnda chee naꞌa ndíkun kuaꞌan xiꞌin ra, chi xi̱ni na yatuꞌun Ndioxi íkan ra, síndaꞌa ra na ndee ni ndóꞌo. 3Saa nda̱a Jesús nuu xiki, ta ikán ndi̱kunduꞌu ra xiꞌin nda ítaꞌan xiꞌin ra. 4Ta xa kuaꞌan kúyati tindaa viko pascua ya ndítava na judío. 5Saa tá ndi̱koto Jesús ta iin táꞌnda chee naꞌa ndíkun kuaꞌan nuu ra, ta saa ndi̱kaꞌan ra xiꞌin ra Felipe, káchi ra saa:

―¿Mií kuꞌun yo sata yo xita vaꞌa kuxi na? ―káchi ra.

6Ndi̱kaꞌan ra saa takua xíto ndoso ñaꞌa ra, chi xa xíni vaꞌa va ra unkua ikan ra. 7Saa ndi̱kuiin ra Felipe káꞌan ra:

―Tá tu ná sata yo uvi ciento denario xita vaꞌa ta ni näni ya kuxi na án nda loꞌo ya iin va na kuxi na chi yáꞌa ni kuaꞌa ku na ―káchi ra xiꞌin Jesús.

8Saa ndi̱kuiin inka ra xíka xiꞌin ra, ra Andrés, ñani ra Simón Pedro, káchi ra saa:

9―Yóꞌó íyo iin ra loꞌo ta ndíso ra uꞌun xita vaꞌa xiꞌin uvi tiaka, sundi ¿án nani ya kuxi na? Yáꞌa ni kuaꞌa ku na ―káchi ra.

10Saa ndi̱kaꞌan Jesús xiꞌin nda ítaꞌan xiꞌin ra, káchi ra saa:

―Kaꞌan ndo xiꞌin na ná ndikundoo na ―káchi ra xiꞌin nda.

Ta íyo ka vi iku kuii míi ikán, ta saa ndi̱kundoo na, iin kuꞌva uꞌun mil ku ndisaa nda taa ndi̱kundoo. 11Saa ki̱ꞌin Jesús xita vaꞌa ikán, ta ta̱xi ra ndixaꞌvi ndaꞌa Ndioxi, ta saa ta̱xi ra ya ndaꞌa nda ítaꞌan xiꞌin ra, ta nda ikán ndi̱taꞌvi ya xiꞌin na. Tá kuꞌva i̱kan ra xiꞌin xita vaꞌa, saa i̱kan tu ra xiꞌin uvi tiaka ikán va. Saa ta̱xi ra xi̱xi ndiꞌi na nda kua ndi̱xaa ini na. 12Tá ndi̱ꞌi xi̱xi ndiꞌi na, saa ndi̱kaꞌan ra xiꞌin nda ítaꞌan xiꞌin ra, káchi ra saa:

―Ndikaya ndiꞌi ndo ñaꞌa ya ndi̱ndoo yuꞌu na ya ná küita ya ―káchi ra xiꞌin nda.

13Saa i̱kan nda, ta si̱kutu nda uxi uvi tika xiꞌin ya ndi̱ndoo yuꞌu na, xiꞌin uꞌun xita vaꞌa ikán xi̱xi ndiꞌi na, ta ndi̱ndoo ka ya. 14Saa tá xi̱ni na ikán yatuꞌun i̱kan Jesús, ta ndi̱kaꞌan na, káchi na saa:

―Ndixa ra yóꞌó ku ra káꞌan ndoso tuꞌun yuꞌu Ndioxi, mií ra chee ni, ra ndátun yo xaa ñuu ivi yóꞌó ku ra ―káchi na.

15Saa xi̱ni Jesús ya ndíkani ini na, xaa nduxa na xiꞌin ra nduu ra rey nuu na. Yakan vaꞌa ka ndi̱kiꞌin ra kuaꞌan iindaa mituꞌun mií ra iku.

Xíka Jesús nuu nduta ñûꞌu

(Mt. 14:22-27; Mr. 6:45-52)

16Saa tá xa kuaꞌan kútikuiin, ta nu̱u nda ítaꞌan xiꞌin ra chí yuꞌu nduta ñûꞌu. 17Ta saa nda̱a nda sata itun barco yáꞌa nda nuu nduta ñûꞌu kuaꞌan nda chí ñuu Capernaum. Ta xa ku̱naa vaꞌa ta täꞌan xaa Jesús ndikitaꞌan ra xiꞌin nda. 18Tá kuaꞌan nda xiꞌin barco, ta xa̱á ndee ni xíka tachi, ta kánda ni tikuii. 19Ta saa ndíxita nda tikuii xiꞌin itun, saa xa kuaꞌan nda uꞌun án iñu mil metro maꞌñu tikuii. Saa xi̱ni nda vaxi xáꞌa Jesús nuu tikuii, ta kúyati ra xaa ra nuu barco. Ñaa ndi̱ndiꞌvi ni nda. 20Saa ndi̱kaꞌan ra xiꞌin nda, káchi ra saa:

―¡Yeꞌe va ku i, ku ïꞌvi ndo! ―káchi ra xiꞌin nda.

21Saa kúsini ka vi nda, ndi̱kiꞌin nda ra, nda̱a ra ini barco ikán kuaꞌan ra xiꞌin nda, ta kama ni ndi̱xaa nda nuu kuaꞌan nda.

Ndúku ni na Jesús

22Saa ndi̱tuvi inka kivi, ta naꞌa na ndi̱ndoo inka ñaꞌñu yuꞌu nduta ñûꞌu, xi̱ni na ya köo ndi̱ndaa Jesús sata nu kuꞌun ra xiꞌin nda ítaꞌan xiꞌin ra, saa chi iin saa ku itun barco xi̱ndichi yuꞌu nduta ñûꞌu ikán, ta ndisaa mií nda ítaꞌan xiꞌin ra ku nda kuaꞌan. 23Saa kúu ta ndi̱xaa ka barco tun ke̱e ñuu Tiberias, ndi̱xaa nu yati yuꞌu tikuii ikán, nuu ta̱xi Jesús xita vaꞌa xi̱xi na yachi, tá ta̱xi ra tixaꞌvi ndaꞌa Ndioxi, 24saa tá xi̱ni naꞌa ya köo Jesús, ta ni nda ítaꞌan xiꞌin ra köo ndi̱xini na, saa nda̱a na sata barco tun ndi̱xaa ikán, kuaꞌan na nduku ñaꞌa na chí ñuu Capernaum.

Xaa chiñu ndo xaꞌa xita vaꞌa ya köo ndíꞌi xaꞌa

25Saa tá ndi̱xaa na inka ñaꞌñu yuꞌu nduta ñûꞌu, ta ndi̱ndakan tuꞌun na Jesús, káchi na saa:

―Tata Rabí, ¿maa xa̱a un yóꞌó? ―káchi na xiꞌin ra.

26Saa ndi̱kaꞌan ra xiꞌin na, káchi ra saa:

―Ya ndixa kua ndúku ndo yeꞌe, ta süvi xaꞌa ya xi̱ni ndo seña ya i̱kan i nuu ndo kua ndúku ndo yeꞌe, chi xaꞌa ya ta̱xi i xi̱xi ndo ndakua ndi̱xaa ini va ndo kua ndúku ndo yeꞌe. 27Xäa chiñu ndo xaꞌa ndisaa ya kuxi ndo, chi ya ñaa ta ya ndíꞌi xaꞌa va kua, sundi xaa chiñu ndo xaꞌa ya köo ndíꞌi xaꞌa, ya chindee ndóꞌo̱ koo ndo xiꞌin Ndioxi ndiꞌi saa kivi ya vaxi. Chi yeꞌe Taa ra xa̱a ñuu ivi yóꞌó ku ra kúu mií ichí ya taxi i ya ndaꞌa ndo, chi Iva i Ndioxi ku ra ta̱xi ichí ndaꞌa i ya ikan i saa ―káchi Jesús xiꞌin na.

28Saa ndi̱kaꞌan na xiꞌin ra, káchi na saa:

―¿Unkua xíniñuꞌu nde ikan nde, ya kuchiñu nde xaa súvi nde ya kúni Ndioxi? ―káchi na xiꞌin ra.

29Saa ndi̱kuiin ra ndi̱kaꞌan ra, káchi ra saa:

―Ya yóꞌó kua kúni Ndioxi xaa súvi ndo nuu ra: Kandixa ndo Taa, ra ti̱ꞌvi ra vaxi nuu ndo ―káchi ra xiꞌin na.

30Saa ndi̱kaꞌan na xiꞌin ra, káchi na saa:

―¿Unkua ku seña yatuꞌun sinaꞌa un nuu nde, ya koo seña kuni nde, ta saa kandixa nde yóꞌo̱? ¿Unkua íkan un? 31Xii sikua nde ta xi̱xi na xita vaꞌa ya náni maná iku yuyu, tá kuꞌva káꞌan tuꞌun Ndioxi: “Xita vaꞌa ya ke̱e nuu ndivi kua ta̱xi ra xi̱xi na”, káchi tuꞌun Ndioxi ―káchi na xiꞌin Jesús.

32Ta saa ndi̱kuiin Jesús ndi̱kaꞌan ra xiꞌin na, káchi ra saa:

―Ya ndaa káꞌan i xiꞌin ndo, süvi ra Moisés ku ra ndi̱taxi xita vaꞌa ya ke̱e nuu ndivi xi̱xi na, Iva i Ndioxi va ku ra ta̱xi ya xi̱xi na. Ta vitin táxi Iva i Ndioxi xita vaꞌa, ya ndaa vaꞌa ni, ya ki̱xi nuu ndivi ni̱nù. 33Saa chi xita vaꞌa ya táxi Ndioxi kutaku ndo ku Taa ra xa̱a ra nuu ndo, ta táxi ra kutaku ndiꞌi na ñuu ivi ―káchi Jesús xiꞌin na.

34Saa ndi̱kaꞌan na xiꞌin ra, káchi na saa:

―Tata, vaꞌa taxi un xita vaꞌa ñaa ndaꞌa nde kuxi nde ndiꞌi saa kivi ―káchi na xiꞌin ra.

35Saa ndi̱kaꞌan Jesús xiꞌin na, káchi ra saa:

―Yeꞌe ku xita vaꞌa ya vaꞌa ni, ya táxi táku naꞌa. Ta na vaxi nuu i ta nda iin kivi küvi ka na soko, saa tu na kándixa yeꞌe ta nda iin kivi ïchi ka na tikuii. 36Ta xa ndi̱tuꞌun i xiꞌin ndo, vani xi̱ni ndo yeꞌe ta xïin ndo kandixa ndo yeꞌe. 37Ndiꞌi na táxi Iva i Ndioxi ndaꞌa i, ta vaxi na nuu i, ta ndiꞌi na vaxi nuu i ta täva i na keꞌe. 38Saa chi yeꞌe ta ke̱e i nuu ndivi vaxi i ñuu ivi yóꞌó ikan i ya kúni Ndioxi, ta växi i xaa súvi i ya kúni mií i. 39Ta ya yóꞌó kua chi̱tuni Iva i Ndioxi, ra ti̱ꞌvi yeꞌe vaxi i xaa súvi i: Ndiꞌi na táxi ra ndaꞌa i ta ná sändañuꞌu i nda iin na, saa tá ti̱ndaa kivi sindiꞌi, ta sitaku ndiꞌi i na ikán. 40Ya chi̱tuni Iva i Ndioxi, ra ti̱ꞌvi yeꞌe vaxi i kua yóꞌó: ndiꞌi na xíni yeꞌe, ra kúu Seꞌe Ndioxi, ta kándixa na yeꞌe ta kuchiñu na kutaku na ndiꞌi saa kivi, ta ná sitaku i na kivi sindiꞌi ―káchi Jesús xiꞌin na.

41Saa xa̱á nda judío kánaꞌa nda xaꞌa Jesús, chi ndi̱kaꞌan ra: “Yeꞌe ku xita vaꞌa ya ke̱e nuu ndivi”. 42Saa ndikaꞌan na káchi na saa:

―¿Án süvi Jesús seꞌe ra José va ku ra? Xíni va yo iva ra tin siꞌí ra. Ta ¿ndachu káꞌan ra ke̱e ra nuu ndivi? ―káchi na.

43Saa ndi̱kaꞌan Jesús xiꞌin na, káchi ra saa:

―Xa vaꞌa, käꞌan kuachi ka ndo xaꞌa i. 44Nda iin naꞌa küvi kixi nuu i, tá tu süvi mií Iva i, ra ti̱ꞌvi yeꞌe vaxi i, ku ra ndáka na vaxi na nuu i, ta yeꞌe sitaku i na kivi sindiꞌi. 45Tuꞌun Ndioxi ya ta̱a nda ndi̱kaꞌan ndoso tuꞌun yuꞌu ra kuiya xinaꞌa káchi ya saa: “Ndioxi sinaꞌa ra ndiꞌi naꞌa”, káchi ya. Ndiꞌi na xíni soꞌo ya sínaꞌa Iva i Ndioxi ta si̱kuaꞌa na nuu ra. Na ikán ku na vaxi nuu i.

46’Köo naꞌa ndi̱xini xiꞌin nuu Ndioxi, iindaa mituꞌun mií ra ke̱e nuu ra ku ra xi̱ni ñaꞌa. 47Ya ndaa káꞌan i xiꞌin ndo: Ndiꞌi na kándixa yeꞌe ta xa táku na ndiꞌi saa kivi. 48Yeꞌe ku xita vaꞌa ya táxi kutaku naꞌa. 49Xii sikua yo ku na xi̱xi ya ku maná iku yuyu, ta saa ni ndi̱xiꞌi ndiꞌi na. 50Sundi yeꞌe ta xita vaꞌa ya vaxi nùù nuu ndivi kua káꞌan i xaꞌa xiꞌin ndo, tá ndá na xíxi xíta vaꞌa yóꞌó ta ndïꞌi xaꞌa na. 51Mií yeꞌe ku xita vaꞌa ya táku ya nùù nuu ndivi, ndiꞌi na xíxi xita vaꞌa yóꞌó ta nda iin ichí ndïꞌi xaꞌa na. Ta xita vaꞌa ya táxi i ndaꞌa na ku ikin kuñu i, ya soko i xaꞌa ndiꞌi na ñuu ivi yóꞌó ya kutaku na ―káchi Jesús xiꞌin na.

52Saa xa̱á nda judío, nda xi̱ni soꞌo tuꞌun ikán káni taꞌan nda xiꞌin taꞌan mií nda, chi köo ndi̱kundaa ini nda tuꞌun ya ndi̱kaꞌan Jesús xiꞌin nda.

―¿Unkua ikan ra taxi ra kuñu ra kuxi yo? ―káchi nda.

53Saa ndi̱kaꞌan Jesús xiꞌin nda, káchi ra saa:

―Ya ndaa ku tuꞌun yóꞌó: Tá tu köo xíin ndo kuxi ndo kuñu i, ni köo xíin ndo koꞌo ndo nií yeꞌe Taa ra xa̱a ñuu ivi yóꞌó, ta küchiñu ndo kutaku ndo. 54Chi na yáxi kuñu i tin xíꞌi na nií i ta kuchiñu na kutaku na ndiꞌi saa kivi, ta kivi sindiꞌi sitaku i na ikán. 55Saa chi kuñu i ku ya ndixa ni ndinuꞌu ndaa kuxi naꞌa xiꞌin nií i ku rá ndinuꞌu ni ndaa vaꞌa koꞌo na. 56Ndiꞌi na xíxi kuñu i ta xíꞌi na níi i, na ikán ku na ítaꞌan vaꞌa ni xiꞌin i, saa tu yeꞌe va íyo i xiꞌin na. 57Iva i Ndioxi ra ti̱ꞌvi yeꞌe vaxi i, ta táku ra. Xaꞌa ya táku ra ikán kua táku tu yeꞌe va. Ta saa tu ndiꞌi na xíxi kuñu i kutaku na, chi táku yeꞌe ini na. 58Ta kuñu i tá káa xita vaꞌa ya ndinuꞌu saa íyo ya, chi ki̱xi ya nuu Ndioxi. Ta ni köo ítaꞌan xita vaꞌa yóꞌó xiꞌin xita vaꞌa ya náni maná ya xi̱xi xii sikua yo, chi na ikán ta ndi̱xiꞌi ndiꞌi na. Sundi na xíxi xita vaꞌa ya ndinuꞌu ya kúu kuñu i ta kutaku na ndiꞌi saa kivi ya vaxi, nda iin kivi ndïꞌi xaꞌa na ―káchi Jesús xiꞌin na.

59Ya yóꞌó kua ndi̱kaꞌan Jesús tá si̱naꞌa ra ini veꞌe ñuꞌu sinagoga ñuu Capernaum.

Ndá kuꞌva kutaku na ndiꞌi saa ichí xiꞌin Ndioxi

60Tá xi̱ni soꞌo na ndíkun sata ra ya ndi̱kaꞌan ra, ta kuaꞌa ni na ikán ndi̱kaꞌan káchi na saa:

―Uꞌvi ni va ya káꞌan ra, ¿Unku na kuchiñu vi kandixa ya káꞌan ra? ―káchi na.

61Saa ku̱ndaa ini Jesús ya ndíkani ini na, ta ndi̱kaꞌan ra xiꞌin na, káchi ra saa:

―¿Án uꞌvi ni káꞌan tuꞌun ya ndi̱kaꞌan i, túvi ndo? 62Tá tu saa ta, ¿unkua ndíkani ini ndo tá ná kuni ndo Yeꞌe, ra kúu Taa ra xa̱a ñuu ivi yóꞌó, ya ná ndaa i kuꞌun i nuu ndivi nuu ndi̱xiyo i yachi? ―káchi ra xiꞌin na.

63Saa ndi̱kaꞌan ka ra xiꞌin na, káchi ra saa:

―Iindaa Tachi Ndioxi ku ya kúu mií ndee táxi ya kutaku naꞌa, ta nda iin na ñuu ivi köo kúu mií ndee ya taxi na kutaku naꞌa. Ta ndiꞌi tuꞌun ya ndi̱kaꞌan i xiꞌin ndo, ku tuꞌun Tachi Ndioxi ta kúu mií ya ndee táxi ya táku ndo. 64Sundi íyo sava ndo köo kándixa tuꞌun ya káꞌan i ―káchi Jesús xiꞌin na.

Káꞌan ra saa chi nda xaꞌa vi ku̱ndaa ini ra, unku na köo kándixa ñaꞌa, ta ndá taa ku ra nditaxi ñaꞌa ndaꞌa na sáa ini xíni ra.

65Saa ndi̱kaꞌan ka ra xiꞌin na, káchi ra saa:

―Xaꞌa ya yóꞌó kua ndi̱kaꞌan i xiꞌin ndo, nda iin naꞌa ta küvi kixi na kundikun na yeꞌe, tá tu süvi mií Iva i ku ra ndáka na vaxi na nuu i ―káchi ra xiꞌin na.

66Nda kivi saa ta kuaꞌa ni na ítaꞌan xiꞌin ra ndi̱ko koo, ta köo ndi̱xika ka na xiꞌin ra. 67Saa ndi̱kaꞌan ra xiꞌin nda uxi uvi ikán, káchi ra saa:

―¿Án kúni tu ndóꞌo̱ va kuꞌun ndo xiꞌin na? ―káchi ra xiꞌin nda.

68Saa ndi̱kuiin ra Simón Pedro, káchi ra saa:

―Tata, ¿unku ka na kuꞌun nde nuu? Ta iindaa yóꞌo̱ ku un ndítuꞌun tuꞌun ya táxi kutaku nde ndiꞌi saa kivi. 69Ta ndeꞌe kándixa nde yóꞌo̱, saa xíni nde yóꞌo̱ ku Cristo, Seꞌe Ndioxi ra táku ―káchi ra Pedro xiꞌin Jesús.

70Saa ndi̱kuiin Jesús káꞌan ra, káchi ra saa:

―Yeꞌe ndi̱kaxin i uxi uvi saa ndo ya kundikun ndo yeꞌe, ta iin ndóꞌo̱ ku kiti nǎꞌa ―káchi ra xiꞌin nda.

71Ta xaꞌa ra Judas Iscariote seꞌe ra Simón kua ndi̱kaꞌan ra, saa chi xiꞌin nda ítaꞌan xiꞌin ra kua ndíkaa ra ikán, ta ra ikán ku ra nditaxi ñaꞌa ndaꞌa na sáa ini xíni ra.

Выбрано:

San Juan 6: xta

Выделить

Копировать