ALuka 6

Kurib aton kunom aSabot

(AMatiyu 12:1-8; AMarkus 2:23-28)

1Yir kunom aSabot, aYeso aso bafetakkugbat ngu ku rok katak ikab alakama, bafetakkugbat ngu kpɛt yir achwe alakama ba tuum basaŋ ya.#Kutil Isha 23:25 2Bakak atak baFarisi rib yah, “Ikyɛdi te nyin nyen ikyɛt ko ntsii aMusa tishi ku nye ikunom aSabotrha?” 3AYeso taba borokghi yah, “Nyin ku tɔŋghɛn ikyɛt ko aDoda ku nye izen ko ngu aso banet ngu kuse kpyak woi? 4Aneŋko aku nɔ atak kari KUNOM, ati sob ibiredi ko ba kam KUNOM mi aya, aka bu nɔk basah kutseŋ ngu woi. Ikyɛt ko ntsii aMusa be koyaŋ ngu yu na ya wɔgh, ne bafiris ba zɔŋ.” 5AYeso mu nye mba yah, “ARenn yu yes Adagbik kunom aSabotrha.”

Anet ko kubɔk ngu banaŋ

(AMatiyu 12:9-14; AMarkus 3:1-6)

6Yir kunom aSabot ba, aYeso ku ti wɔt atak karizumuŋ baIserela asaŋ taas. Yir anet kun ti se arɔmi ko kubɔk nkyɔm ngu ku banaŋ. 7BaFarisi aso bafekutaas ntsii aMusa kun tu tami ayisi haŋ ase te anetrhi ijel ikunom aSabot yo, arɔ ba tu sɛmi kubel. 8Ne aYeso ban ku fuk kutass mba ya. Ngum mu nye anetrhi yah, “Dutsik ti bɛh ta yeseŋ aze.” Ngum mu dutsik ati yeseŋ arɔmi. 9AYeso mu nye mba yah, “Sak nda ribɛn, ikyɛdi ntsii aMusa be kutijam ba na nye ikunom aSabotrha? Ba ti nye kulejel haŋ kukpɛ? Ba ti hywet itset haŋ ba ti fɛt nde?”

10Ataba yɛrɛk gbik mba, anye anet yama ya, “Nabak kubɔk nwuna.” Ngum mu nabak kubɔkghi, ikubɔkghi te ijel. 11Ne mbam te njinjek nkirit ba ti kpa kufɛh atak mba aton ikyɛt ko bana nye aYeso yi.

AYeso kasa bafetakkugbat kusɔk

(AMatiyu 10:1-4; AMarkus 3:13-19)

12Nnom yama ya, aYeso ku ngharak igoro arɔ ati nassaŋ, ati ya katuk gbik abuŋ kunassaŋ KUNOM. 13Seko katson tarak, ngum yereŋ bafetakkugbat ngu ya amu kasa kusɔk atak mba ataba nɔk iyɛrɛŋ nanonkutom, ayɛrɛŋ mba na, 14ASimon ko ngum tu nɔk iyɛrɛŋ aBitrus aso agwa ngu aAndarawus, aYakubu aso aYohana, aFilibus aso aBatolomiyu, 15aMatiyu aso aToma, aYakubu arenn aAlfewus, aso aSimon, aya ko ba tu be aZezeb, 16aYahuda arenn aYakubu, aso aYahuza Iskariyoti, aya ko aku tun aYeso.

AYeso taas aka bu nye banet ijel

(AMatiyu 4:23-25)

17Seko aYeso aso nanonkutom ngu kik igoro ya, ngum yeseŋ yir karɔ ko ka yes inek. Ase aso banet gbaraŋ ko ba yes bafetakkugbat ngu. Arɔmi ba banet ku ti se gbaraŋ ko ba ne gbik narɔ mben aJudiya aso aWurshelima, aso narɔ nwɔb iTaya aso iSidon nna ya ko nna se anu agbaŋ izek. 18Baya ko ba bɛh arɔ ba ti ye tu foss ba taka bu sɛh ku te ijel izɔn mba. Baya ko nakabik nakpɛ kusaŋ taba chɔs ka bu te ijel. 19Gbik banetrhi kusaŋ takkyaŋghasi arɔ ba tu ra, arɔko kugyigyak Ikabik kusaŋ wuru atak ngu isaŋ taba nye ijel gbik.

Aweŋ aso kanukakpɛ

(AMatiyu 5:5-12)

20AYeso ku yɛrɛk bafetakkugbat ngu anye mba yah,

“Nyin yesɛn bafe aweŋ nyin ko sen iyɔm,

arɔko igwom KUNOM yes ife nyin! 21Nyin yesen bafe aweŋ nyin ko sen kpyak anyimkaŋgha,

Arɔko nyin bah hywan!

Nyin yesɛn bafe aweŋ, nyin ko tossɛn anyimkaŋgha,

arɔko nyin bah massɛn!

22Nyin yesɛn bafe aweŋ be banet be ishishim nyin,

ba ta kpasan ba ka bu ta tosoŋghɛn,

ba ramba nyin ba be ya nyin sen kpɛ, gbik arɔ aRenn Net.

23“Ben kafahkakan be ku te aneŋgha ten takkin, arɔko agbaŋ aweŋ nyin se icho. Anama yu ko bakoboh mba ku nye badidɔk kuneh yi.

24“Ne nchi nyin bafe ryat,

arɔko nyin ba ku sɔn kungyɔngyɔt nyin!

25Nchi nyin ko nyin sen atak kuhywa anyimkaŋgha,

arɔko nyin bah ten kpyak.

Nchi nyin ko nyin massɛn anyimkaŋgha,

arɔko nyin bah ran kanak aso kutoss!

26Nchi nyin be gbik banet fɛh kulejel aton nyin,

arɔko anama yu bakoboh mba kumaŋ fɛh aton badidɔk akyɛs.

Shim bafefub nwun

(AMatiyu 5:38-48; 7:12a)

27“Meŋ ne nda tɔŋghɛn nyin ko ti fossɛn, shimɛn bafefub nyin, nyen ba ya ko ba be ishishim nyin yi kulejel, 28korokghɛn ba ya ko ba ta nɔkghɛn kanukakpɛ yi aweŋ, ten ti nassaŋghɛn arɔ ba ya ko ba ta nassɛn ngbaŋ. 29Be akak ta basak kukoŋ kungbam, tu tirikghi ku ya ma. Be akak shan atoro aton nwun, kɔn tu shimi afe atak wɔgh. 30Nɔkghɛn gbik aya ko ata ribɛn ikyɛŋ, be akak shan ikyɛŋ nwun, kɔn nwun ti tɔk ata borokghi wɔgh. 31Nyen banet yi ikyɛt ko nyin shimɛn mbam na ta nyeni.

32“Be nyin shimɛn baya ko ba ta shimɛn zɔŋ, yaŋ kutakbatemi ku ko nyin se sɛn arɔ ku yama ya? Ko bafefɔt maŋ shim baya ko ba ta ba shim. 33Anama ba, be nyin nyen baya ko ba ta nyen kulejel yi zɔŋ kulejel, yaŋ kutakbatemi ku nyin se sɛn arɔ ku yama ya? Ko bafefɔt maŋ nye anama. 34Anama ba, be nyin kɔbɔsɔkghɛn baya ko bibik nyin ba sa taraŋghɛn, yaŋ kutakbatemi ku arɔ nyini? Bafefɔt maŋ kɔbsɔk baya ko mbam di ba si ren ku taba taraŋ nkpɛk. 35Ne shimɛn bafefub nyin, taba nyeni kulejel, taba kɔbɔsɔkghɛn kɔn ti tassɛn ba ta taraŋghɛn wɔgh. Nyin sen ti sɛn agbaŋ aweŋ, nyin sen ti ten nyinin nanon Adarai. Arɔko ngum nye kulejel aton banet ba kpɛ aso baya ko ba tɔl kafahkakan wɔgh. 36Ten nyinin bafe kutossyɔm, aneŋko Adah nyin maŋ yes afe kutossyɔm.

Ku rah bakakghi ishara

(AMatiyu 7:1-5)

37“Kɔn ti ran bakakghi ishara wɔgh, ba sen ti maŋ ta rani ishara wɔgh. Kɔn ti nghasaŋhɛn ya yi bakak be kubun wɔgh, ba sen ti maŋ nghasaŋ ya yi nyin yoŋ ben kubun wɔgh. Hanan, ba sen ti maŋ ta hanani. 38Nɔkghɛn, ba sen ti maŋ ta nɔkghɛn. Agyuru alejel, ko ba yebek, ba ti te ruruk, iti be isaŋ tak nos, ba sa korokghɛni ibirimi agyingyeŋ. Arɔko agyuru ko nyin ti chɛsɛkghɛn, ngu yu ko ba samaŋ ta chɛsɛkghɛni.”

39Aka bu taba tɔŋ kukoŋ ku gorob anye yah, “Afe awil na kɔk afe wili antseŋghi? Mbam na kpas atak afele gbik mba woi? 40Wallaŋ afetakkugbat ko anat aya ko atu taasi, ne koyaŋ ngu ko anghasaŋ kutitasa, a sen ti te ako aya ko atu taasi ya.

41“Ikyɛdi te nwun di ka hɔlɔŋ atak iyisi agwa nwun, nwun busaŋ di kugoro kukon ko kuse atak ife nwun iyisi wɔgh ya? 42Nwun se tsa ne ti nye agwa nwun yah, ‘Agwa, sak nda tuni ka hɔlɔŋ iyisi nwun,’ ko nwun ti ren ku di kugoro kukon ko ku se iyisi wɔgh ya? Nwun afekukaram, tsa ti tun kugoro kukon iyisi nwun shon, arɔko nwun sen ti ren ku di ijel ti ruŋ tun ka hɔlɔŋ iyisi agwa nwun da.”

Ba ren kakon ijwa nna mban nka

(AMatiyu 7:16-20; 12:33-35)

43AYeso nye yah, “Wallaŋ kakon ka lejel ko ka te nna mban nna kpɛ, anama yu, kakon ka kpɛ te nna mban nna lejel wɔgh. 44Ba fuk koyaŋ kakon ijwa namban nka. Banet bos ambo aton kakon atsirtsɔn wɔgh, kɔn ba ne bos namban ampapu akon ajijen wɔgh. 45Anet alejel wurumi nkyɛŋ lejel atak nkyɛŋ lejel afah ngu, anama yu ko anet akpɛ maŋ wurumi nkyɛŋ nkpɛ atak nkyɛŋ nkpɛ afah ngu. Kanu fɛh nkyɛŋ ko nnam ne atak afah ngu.”

Bafe ku nɔk nari bafah

(AMatiyu 7:24-27)

46AYeso nye mba yah, “Ikyɛdi te nyin ti ben ‘Adagbik, Adagbik,’ nyin busaŋ ranyinin ku nye ikyɛt ko meŋ be nyin ti nyena? 47Gbik aya ko abɛh arɔ meŋ ati tesem, ati ka nye ikyɛt ko meŋ be ati nye, meŋ nza tɔlɛn aneŋko anet yama se. 48Ngum se ako anet ko ase nɔk kari ngu, arum kyukyum amu tsa atum karimi aton kufaŋ. Seko iwi ta bɛh, ndem tsot karimi ne kɔn iwimi tiren ku tak juŋre wɔgh, arɔko ba tak nɔk ijel. 49Ne aya ko ane ti foss mpɛk meŋ ati nye kutomoŋ ikyɛt ko meŋ tɔŋ wɔgh ase ako anet ko anɔk kari aton mben wallaŋ atum. Seko agbaŋ iwi tsot karimi, nkam kpa ka tak foo gbik.”

Выбрано:

ALuka 6: FIR

Выделить

Копировать