ALuka 1
1
Atumuŋghi
1Banet gbaraŋ karaŋ aton nkyɛŋ ko nnam shwak atak yit, 2kuse chik aneŋko baya ko ba tsa ba ti di tik tɔŋghɛna, mbam yes bafe kutɔŋ kukah kulejel. 3Arɔneŋgha meŋ fɛl koyaŋ kyɛŋ ijel kuneh kutsami meŋ ne nde di kutijam maŋ nda karaŋghi aneŋko ba karaŋ nku, nwun agbaŋ anet meŋ aTiyofolos, 4arɔko nwun tiren ya koyaŋ kyɛŋ ko nwun foss yes chini.
Batɔŋ kuwut aYohana ko anye ibatisma
5Izen ko aHiridus ku yes agwom mben iJudiya, yir afiris kun ti se ko ba tu be aZakariya ko ane ikazumuŋ bafiris aAbijah. Abiniŋ aZakariya, aLizabet aku ne ichwaŋ aHaruna. 6Mbam kusaŋ rok KUNOM chik, basaŋ rok gbik ntsii ko Adagbik nɔk chik. 7Kɔn mbam kun ti be nanon wɔgh izaneŋko aLizabet ku yes amakuruk mbam ka bu kob.
8Yir kunomi aZakariya kusaŋ nye kutomoŋ ngu kufe afiris atak karikunom, 9ba ku tu kasa ikakyalam aneŋko kutomoŋ bafiris ku se, ati wɔrɔŋ ntsiŋ lejel atak karikunom Adagbik. 10Izen kuwɔrɔŋ ntsiŋ lejela, banet gbaraŋ tak tusuŋ atasa basaŋ nassaŋ. 11Ajel ko ane arɔ Adagbik atak tɔl, ayeseŋ tsik ifam kubɔk nkyɔm kakyenye ku wɔrɔŋ ntsiŋ lejela. 12Seko aZakariya tu di, ate yebet, afossoŋ nyim. 13Ne ajelli nye ngu yah, “Kɔn ti fok nyim wɔgh, aZakariya, KUNOM shan kunassaŋ nwuna. Abiniŋ nwun aLizabet bah wut arenn, nwun ban tu nɔk yɛrɛŋ aYohana. 14Ngum bah yes kafahkakan nwun, aso kumenkafah nwun, banet gbaraŋ bah maŋ be kafahkakan arɔ kuwut ngu, 15arɔko ngum bah yes agbanaŋ anushon Adagbik. Kɔn ngum ban ti sɔh nchi inabi wɔgh, ko yit kyɛŋ ko se nzɔkɔkɔk wɔgh. Ikabik Wɛsɛk ban tu hywɛn kuneh ikuwut ngu. 16Ngum ban ti borokghi banet Iserela gbaraŋ arɔ Adagbik, KUNOM mba. 17Ngum bah tseŋ anushon Adagbik atak ikabik aso kugyigyak ako aILiya, ngum ban ti tirik nafah badah arɔ nanon mba ngum ka tirik bafe chwe kugyigyak ba taŋ tass chik. Ngum bah te banet ti nywaŋ kusot mba arɔ kubɛh Adagbik.” 18AZakariya rib ajel yah, “Nzi te anene iren yah kukoŋ bah te? Meŋ ba ku tsereŋ, nayɛh abiniŋ meŋ ne te maŋ fɛt.” 19Ajel nye ngu yah “Meŋ nyes aGɛbrel. Meŋ nye kutomoŋ anushon KUNOM, ba ne ti tom arɔ nwun yah nda tɔŋ kukah kulejel. 20Arɔ kusaŋ nɔkchin nwuna, nwun siren kufɛh wɔgh, ideŋ kyɛŋ ban tak shwak shon nwun turuŋ tiren kufɛh.”
21Seko banet saŋ tot aZakariya ya, ba nɔ kusab aton ikyɛt ko te ati rɔn atak karikunoma. 22Seko ngum wuruk, atiren kufɛrɛŋ mba wɔgh. Mbam fuk yah KUNOM tu tɔl kubobos atak karikunoma. Arɔko akusaŋ taba nye has, atiren kufɛh wɔgh. 23Seko anghasaŋ kutomoŋ ngu ya asha ngu. 24Amintiriŋ azeŋgha aLizabet shan kafah, asot ari mpɛn toon. 25ALizabet nye yah “Adagbik ti fik nda shan kafah nnom nnaŋgha, inɔkkunom ti tun ntsim ate banet.”
Batɔŋ kuwut aYeso
26Atak kufɛn titat ikushan kafah aLizabetrha, KUNOM tom ajel ko yɛrɛŋ ngu yes aGɛbrel ati nɔk kutom arɔ kanamaŋ kajijeb ikuwɔb iNazaret atak iGalili, 27kanamaŋ kajijeb ko nkam kusaŋ shim aYusufu afe chwaŋ aDoda, ko yɛrɛŋ nka yes aMeri. 28Ajel kun ti tu karɔ nka anye nka yah, “Nda kilisi, nwun yes afe aweŋ! Adagbik se nwun.” 29AMeri sob kusab nkirit aton ikyɛt ko ajel tu tɔŋgha, atass aton kubik kukilimi. 30Ajel nye ngu yah, “AMeri, kɔn te fossoŋ nyim wɔgh, nwun sɛh kuroyɔm arɔ KUNOM. 31Tesem ideŋ kyɛŋ! Nwun bah shan kafah, nwun te wut arenn, nwun ban tu nɔk yɛrɛŋ aYeso. 32Abah yes agbanaŋ, ba kasaŋ tu yes aRenn Adarai KUNOM. KUNOM Adagbik bah tu nɔk igwom adah ngu aDoda, 33ngu yu bah ya igwom aton kari aYakubu ayɛyɛ. Igwom ngu bah se wallaŋ kugyeŋ.”
34AMeri rib ajel yah, “Kukoŋ bah te ne, ko meŋ ren ametek wɔgh ya?”
35Ajel nye aMeri ya yi ku ba se ane, “Ikabik Wɛsɛk se bɛh aton nwun, Ichwe Adarai bah ta hywɛn ako ywiywil. Kangon ka wɛsɛk ko nwun sak wutrha bah ban taŋgha tak be aRenn KUNOM. 36Agwa nwun aLizabet shan kafah atak kukob ngu, ngu ko banet tu be amakurukgha, abah ku bɛh kafah mpɛn titat. 37Wallaŋ ikyɛŋ ko KUNOM na ryat ku nye.” 38AMeri borokghi anye yah, “Meŋ nyes akwɔ Adagbik.” “Ɛi ku ti te aneŋko nwun tɔŋgha.” Ajel mu sot aburuk.
AMeri ti kili aLizabet
39Izen yama ya aMeri ti te hwarat atseŋ ati wɔt ikuwɔb arɔ ka hyweneŋ kunyi aJudiya, arɔ ko aZakariya aso aLizabet ti sot. 40Ati nɔ ari aZakariya ya akili aLizabetrha. 41Seko aLizabet shan kukili aMeri ya, kangon ko ka se atak afah aLizabetrha tak kebek, Ikabik Wɛsɛk kun ti se aLizabetrha. 42Izɔlɔs igbanaŋ anye yah, “Nwun yes afe aweŋ atak babiniŋ, aso kangon ko nwun bah wutrha. 43Ne ikyɛdi te meŋ nde sɛh aweŋ yoŋgha ko anyiniŋ Adagbik na bɛh ati ye ti nɔk kukili ya? 44Izen ko meŋ shan kukili nwuna, kangon atak afah meŋ tak kebek arɔ kafahkakan! 45Afe aweŋghu aya ko anɔkchin yah kufɛk ko Adagbik tu tɔŋ kusak shwak.”
Abom aMeri
46AMeri nye yah,
Kafah meŋ nesek Adagbik igbanaŋ,
47ikabik meŋ mbe kafahkakan arɔ KUNOM, afekuhywet meŋ.
48Arɔko ngum ti gaŋ kafah
imeŋ arohywe akwɔ ngu.
Koyaŋ zam bah saŋ ti yes afe aweŋ,
49arɔko agbaŋ KUNOM ti nye nkyɛŋ lejel gbom,
yɛrɛŋ ngu yes wɛsɛk.
50Kutossyɔm ngu se aton baya ko ba be nyim ngu, koyaŋ zam.
51Ngum tɔl kugyigyak ngu nkyɛŋ ko anye nna,
ngum roh baya ko ba nyinɛsɛ chwe atak kutass nafah mba.
52Ngum tun igwom bagwom
ngum ne nɔk baya ko ba meni ichwe mba.
53Ngum nɔk baya ko ba se kpyak nkyɛŋ lejel
ngum ne roh baferyat tata.
54Nkum fik akwɔ nku Iserela,
ati raba kutossyɔm
55aton aIbrahim aso nanon ngu ayɛyɛ,
ako aneŋko aku tɔŋ badah yitrha.
56AMeri sot chichɛk mpɛn tat ari aLizabetrha aruŋ shangu.
ALizabet wut aYohana
57Seko izen ko aLizabet se wut nye, ngum wut arenn. 58Badah ngu aso bagwa ngu foss yah Adagbik tu tɔl agbaŋ kutossyɔm, mbam tu fikghi kafahkakani.
59Ikunom afe nkara mbam bɛh ku nywaŋ kangoni, mbam busaŋ wɔ tak nɔk yɛrɛŋ atek nka aZakariya, 60ne anyiniŋ ngoni fɛrɛŋ anye yah, “Kwa! Ba se nye nka aYohana.”
61Ba nye ngu yah “Wallaŋ aya ko abe idama yɛrɛŋ atak bagwa nwuna.”
62Mbam mu te atek has, arɔko mbam kusaŋ shim kuren yɛrɛŋ ko ashim ana nɔk kangoni. 63AZakariya rib kubɛbɛt, arɔŋ te zirit arɔko akaraŋ “Iyɛrɛŋ nka yes aYohana” 64Azuzukghi ngum tsa kufɛh, asaŋ toroŋ KUNOM. 65Badah ngu gbik te nyim. Koyaŋ ngumi ahyweneŋ aJudiya saŋ fɛh aton gbik nnaŋ nkyɛŋgha. 66Gbik anet ko afoss kukoŋ kukah ya asaŋ atass afah ngu atoni, asaŋ risim, “Ikyɛdi kakaŋ kangon bah te nka?” Arɔko kubɔk Adagbik ku se aton nka.
Abom aZakariya
67Atek nka aZakariya kun ti hywa Ikabik Wɛsɛk amu tɔŋ idɔk,
68“Yit te toroŋghɛn Adagbik, KUNOM Iserela
arɔko nkum bɛh ku ta sheseŋ banet nku.
69Ku tighi nɔkghɛn afekuhywet
atak chwaŋ akwɔ nku aDoda.
70Ako aneŋko badidɔk ku wɛsɛk ku tɔŋ kuneh akak ayɛyɛ ya,
71kuhywet arɔ bafefub yit
aso baya ko ba tik shimɛn wɔgh
72ase tossyɔm badah yit
aka ti raba kutakshimmi ku wɛsɛk,
73kurob ko aku anye adah yit aIbrahim mi,
74yah asik hywetrhɛn atak kubɔk bafefub yit,
arɔko yit su yan mben wallaŋ nyim
75atak ku wɛsɛk yit taŋ rokghɛn kufɛk nku chik atak kusot yit azatse ya.
76Nwuna, kangon meŋ, babaŋ ta be adidɔk Adarai,
arɔko nwun yu bah yes aya ko asi nywaŋ Adagbik yi ataren,
77nwun bah nɔk banet nku kufuk aton kutakhywet
atak kuhana afɔt mba
78arɔ kutɔl kutossyɔm KUNOM yit,
ku wuruk yinom bah ne icho ku ti bɛh arɔ yit
79ku bah rom aton baya ko ba se atak kugbyik
ywiywil kukuu,
abah tɛnɛs nanen yit ati wɔri yit ataren kumenkafah.”
80Kangoni rasak, ka te kugyigyak atak ikabik, nkam sot atak kayitkakot ka na ti tu izen ko ka tak tɔl kpas arɔ banet Iserela.
Выбрано:
ALuka 1: FIR
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
©️2024 Luke Initiative for Scripture Translation
