मत्ती 1
1
येशू ख्रीष्ट ज्युज्यु पुर्खे मिन
(लूका ३:२३-३८)
1येशू ख्रीष्टचेन अब्राहाम थेमे दाऊद गेल्बो सन्तान ईन। थे ज्युज्यु पुर्खा सु सु ओताने सिन दुरू टिबा ओत। थेबे मिनचेन दिबाराङ ईन। 2चुक सासीन अब्राहाम फुज्युङ इसहाक ओतान। थेमे इसहाक फुज्युङ याकूब ओतान। याकूब फुज्युङबाचेन यहूदा थेमे थे आज्यो न्वाओन ओतान। 3यहूदेते पेरेसताङ जेरह सिरातेन्दे फुज्युङ ङि ओतान। थेबे आमे मिनचेन तामार ओतान। थेमे पेरेस फुज्युङ हेस्रोन, हेस्रोन फुज्युङ आराम, 4आराम फुज्युङ अम्मीनादाब, अम्मीनादाब फुज्युङ नहशोन, नहशोन फुज्युङ सल्मोन थेमे सल्मोन फुज्युङ बोअज ओतान। 5बोअज आमे मिन राहाब ओतान। बोअजतेङ ओबेद सिराई फुज्युङ ओतान। ओबेद आमे मिनचेन रूथ ओतान। थेमे ओबेद फुज्युङ यिशै, 6यिशै फुज्युङ गेल्बो दाऊद ओतान।
थेमे गेल्बो दाऊद फुज्युङ सोलोमन ओतान। सोलोमन आमाचेन गोमा उरियाह सिराते मि फेम्मे ओतान। 7सोलोमनतेङ रहबाम सिराई फुज्युङ ओतान। थेमे रहबाम फुज्युङ अबिया, अबिये फुज्युङ आसा, 8आसे फुज्युङ योसाफात, योसाफात फुज्युङ योराम, योराम फुज्युङ उज्जियाह, 9उज्जियाहे फुज्युङ योताम, योताम फुज्युङ आहाज, आहाज फुज्युङ हिजकिया, 10हिजकिये फुज्युङ मनश्शे, मनश्शे फुज्युङ आमोन, आमोन फुज्युङ योशियाह 11थेमे योशियाहे फुज्युङ येकोनियाताङ थे न्वाओन ओतान। बेबिलोन लुङबे मिओनगी इस्राएलीओनला ग्याल्गीन खोपरोङ लुङबापा खेरे बेले नाङपा योशियाहे फुज्युङओन केबा ओतान।
12तिरी बेबिलोनदुकी इस्राएलीओन खोपरोङ लुङबापा ग्युरगीन वानामेकी येकोनियेते शालतिएल सिराई फुज्युङ केबा ओतान। थेमे शालतिएल फुज्युङ यरुबाबेल, 13यरुबाबेल फुज्युङ अबिउद, अबिउद फुज्युङ एल्याकीम, एल्याकीम फुज्युङ आजोर, 14आजोर फुज्युङ सादोक, सादोक फुज्युङ आखिम, आखिम फुज्युङ एलिउद, 15एलिउद फुज्युङ एलाजार, एलाजार फुज्युङ मत्थान, मत्थान फुज्युङ याकूब 16थेमे याकूब फुज्युङ यूसुफ ओतान। यूसुफकी मरियमताङ फाङमा खाबा ओतान। मरियमचेन येशू आमा ईन। येशूचेन परमेश्वरगी दुरू तोङगो साबाते ख्रीष्ट ईन।
17येशू ख्रीष्ट ज्युज्यु पुर्खे पुस्ता ङोला ताजीन थाङबो अब्राहाम पालोमेकी गेल्बो दाऊद पालोसाकला पुस्ता च्युप्स्यी छाङगीन सिन्दा ओतान। थोकराङ खाईन गेल्बो दाऊद पालोमेई इस्राएलीओनला बेबिलोनपा खेरे बेलासाकला पुस्ता च्युप्स्यी थेमे इस्राएलीओन बेबिलोनपा खेरनामेई परमेश्वरगी तोङगो साबाते ख्रीष्ट पालोसाक पुस्ता च्युप्स्यी छाङा ओतान।
येशू ख्रीष्ट केबाते बात
(लूका २:१-७)
18येशू ख्रीष्ट चुक खाईन केबा ओताने सिरच्येते बातचेन दिराङ ईन। चुक सासीन यूसुफकी मरियमला नाङ खाबा ओतान। थेबेते फाङमा मायाङालाराङ परमेश्वर आत्मेकी खित्सादु मरियमगी फुज्यीमा खुरा ओतान। 19थेकी फुज्यीमा खुराते बात छ्या स्येनामेकी यूसुफकी थेला तोङा चाला ओतान। तर थे परमेश्वरगी खि साबाच्योक खित्कान्ते मि ईन्देकी थेकी मरियमला मि ङोन्ला ङोचा मेङस्यीत सिन मि रूसादु मेखेरा खाईन थोकराङ तोङा चाल्सुङ। 20दोक विचार खिन खिनलाराङ ग्वामाई मिलामला थेकी प्रभु परमेश्वर दूतज्यीकला थे खादु वाबाते थोङसुङ। थेमे थे दूतकी थेला “ए दाऊद गेल्बो सन्तान यूसुफ, खो मरियमला खुलाङाला छ्याःङ ङोचा माकेत। मित्ताङ ङ्याल्गीन मेन्देकी परमेश्वर आत्मेकी खित्सादुका थेकी फुज्यीमा खुराते ईन। 21था थेकी फुज्युङज्यीक केइओ। खुई थे मिन येशू सिन स्योक। च्यिला सासीन थेकीराङ थे खोरोङ मिओनला थेबे पापदुकी डेल्ग्यो,” सिन बात खासुङ।
22मरियमगी दोक खाला फुज्यीमा खुरला फिजा केच्येते बात प्रभु परमेश्वरगी थे खोरोङ बात खित्कान्ते मिला थाङबोका दोक सिन सिर च्युता ओतान। थेकी साबाते बात साबा च्योकराङ ओङसुङ। 23थेकी चुक साबा ओताने सासीन
“कर्नेते फेम्मे फिजाज्यीगी फुज्यीमा खुरला फुज्युङज्यीक केइओ। थे फिजाला इम्मानुएल सिन सिओ,” सिन साबा ओतान।#यशैया ७:१४
इम्मानुएल साबाते परमेश्वर ङुरूङताङराङ देत्ला लेमु खिओ साबाते ईन।
24थे मिलाम खानामेकी यूसुफ ङिक छेत्सुङ। थेमे थेकी प्रभु परमेश्वर दूतकी खि साबा च्योकराङ खाईन मरियमला खुला लिच्युङ। 25ईन्सीनोङ थे फिजा माकेथुप यूसुफ थेत्ताङ ङ्योम्बु माङ्याल्सुङ। तिरी फिजा केनामेकी थेकी थे मिन येशू सिन ज्याक्सुङ।
Выбрано:
मत्ती 1: JUL
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 1992 Wycliffe Bible Translators Inc. All rights reserved.
