Romans 1
1
1Anau Paul, hekama heheaꞌu Jesus Christ. Keakua ekini anau, kena ihaunalia anau ikaukaꞌu kelono kaualeꞌa aia. 2Keakua ekakala hamaoni i nakama kela ehakakae nakakala aia la. Kena nakama la ekakaa nakakala la iloko kelauniu kapu. 3Kelono kaualeꞌa la ehuli aꞌe nakipukipu kekama Keakua. Pela kama la amekipu mai poi hekama, ia mehanau mai iloko keꞌaha David. 4Kena Keakua ehaola kama la ikaha ma kemake i namahi Keanana Kapu, ihuli aꞌe pela kama la o kaukahi kama aia la, kakou Aliꞌi Jesus Christ. 5Keualoko makou esuꞌui ma Christ, Keakua ehaunalia makou i naonohenua hakoa, kena ekonaꞌi makou ime aꞌe nakama la ihakina i kemale Jesus Christ, kena ikaukali kama la. 6Ia kena Keakua ekini okou hoi isuꞌui ma Christ.
7Anau ekakaa aku okou nakama i Rome. Pela Keakua elaoi okou, kena ikini okou ime mo kama ekapu aia.
Keakua Kamana kakou ia ma Kealiꞌi Jesus Christ ilolosi hakaualeꞌa okou inoho laoi.
Paul hihai iꞌike nakama i Rome
8Kemea amaka. Nakama kemaalama nei hakoa ulono nakipukipu nahakina okou. Okou ehakina. Ia kena anau ehamaha kauAkua i namahi Jesus Christ. 9Anau ehai namahi anau iheheaꞌu ma Keakua, ikaukaꞌu kelono kaualeꞌa kela kanakama. Ia Keakua emakino pela anau eloku manaku kahi okou. 10Ia anau eloku kahi noainoa aꞌe Keakua pela, ame kama la ehihai, anau amelavaa kehaele aku nomaka okou.
11Anau hihai iꞌike okou, kena imea okou iko nahoꞌi Keanana Kapu, pela okou mekuu mau. 12Emea pela kakou ehakina hakoa, kena ihapulupulu kakou sokakou. 13Aukaina. Anau hihai okou imakino pela anau ehakaꞌoko kahi ma ihaele aku nomaka okou. Ia anau uselavaa. Anau hihai ikonaꞌi okou ihakina hamaoni, ehau poi anau nikonaꞌi alakama kela enoho pouli imua.
14Anau ikau keheheaꞌu nokonaꞌi nakama hakoa. Niaina ma nakama enoho namakaꞌina elahi, ia ma nakama kela enoho i namakaꞌina soliꞌi. Niaina ma nakama emakonu, ia ma nakama evale. 15Kela hea anau hihai ikaukaꞌu aku kelono kaualeꞌa i okou nakama kela enoho i Rome.
Namahi kelono kaualeꞌa
16Anau senapa kekakala aꞌe kelono kaualeꞌa Keakua. Maikinimea nakakala la ehuli aꞌe namahi Keakua kela ekonaꞌi nahakina ana hakoa iola. Na{Jiu} la elono nakakala la imua, kena nakama enoho pouli la elono hoi. 17Kelono kaualeꞌa la ehuli aꞌe pela Keakua emea nahakina ana la ikonu kahi i namaisu aia. Nakama la ehakina, imea lakou ikonu kahi, kena ikauhano kehakina pela hoi. Hakaꞌoko nei emau iho iloko kelauniu kapu, “Kama ekonu kahi mehakina pela iola.”
Nakama hakoa epena namea sala
18Keakua kevaelani ehuli aꞌe pela aia eloko i nakama haisala kela enoho pouli. Nakama la ehaisala, kena epui alakama isehalono kehamaoni. 19Keakua eloko, maikinimea aia uoki kehuli aꞌe nakipukipu aia i nakama la. Ia kena nakama la ikau kemakino laoi nakipukipu aia la. 20Sehikama elavaa keꞌike Keakua, kaohi mua namahi aia, ia ma nakipukipu aia. Ia keualoko Keakua nipena iho kemaalama nei, namea aia epena la ehuli aꞌe nakipukipu aia, pela nakama hakoa ehainahie kemakino laoi nakipukipu aia la. Kena sehikama ekau kekakala pela aia semakino nakipukipu Keakua la.
21Ia niaina ma nakama la emakino nakipukipu Keakua, nakama la sehamalumalu kama la, ia sehamaha kama la hoi. Emeia nahakaꞌoko nakama la evale, ia kena nakama la seailoa pela lakou enoho pouli. 22Nakama la ehaiꞌahi ma lakou eakamai. Ia seai, nakama la oivale oia, 23kena ikiaꞌi Keakua ialuna kela eola kahi. Kena nakama la uhamalumalu nahakipua kela ekipu poi nikama, namanu lelele, napoi, ia ma naꞌaka. Ia namela amekaꞌoko kamasaika oia.
24Kela hea Keakua ekiaꞌi nakama la ikaukali namea lakou ehakaꞌoko saꞌino la. Kena nakama la ehaihai huli, ia kena imea nakinokama lakou nosaꞌino solakou. 25Nakama la ukiaꞌi kehamaoni Keakua, kena uhakina namea nuku laoi. Nakama la ehamalumalu namea kemaalama nei la, kena ihalono namea la. Ia nakama la sehamaha Keakua kela epena iho namea la. Kakou ikau kehamaha kama la soia naualoko hamau.
26Kela hea Keakua ekiaꞌi nakama la ihakaꞌoko kahi namea esala. Kena nahine la ekiaꞌi nakanaka lakou, kena ipena namea esekonu solakou. 27Nakanaka la eme pela hoi. Nakama la ukiaꞌi nahine lakou, kena imanaꞌo alakanaka, kena ipena namea esaꞌino solakou hoi. Ia kena namahana ukae aꞌe nakinokama lakou, ikau ma namea saꞌino lakou epena esala la.
28Nakama la sehihai imakino Keakua. Ia kena kama la ekiaꞌi nakama la ikaukali nahakaꞌoko saꞌino lakou, nopena namea kela lakou esekau kepena. 29Kena nakama la epena kahi namea esala. Nakama la esaꞌino haeꞌo. Nakama la eꞌai manaꞌo, ia enonoho haeꞌo ma alakama. Nakama la emamaeꞌaa i alakama. Nakama la ekaa kama, ia ehakaukau. Nakama la eusuusu alakama, kena emanava saꞌino, ia eveuveꞌu alakama. 30Nakama la ekamoa haeꞌo alakama, ia eliloko Keakua. Nakama la ehakanaka, ia eahu haeꞌo, kena ekakala ahu hoi. Nakama la ehakaꞌoko kahi kepenapena namea saꞌino, ia sehalono namakua lakou la. 31Nakama la evale haeꞌo, ia enuku laoi mahi. Nakama la sehihai alakama, ia semanava aloha alakama. 32Nakama la emakino pela nakuaa Keakua emea ma nakama kela epena namea saꞌino la, ekau kemake. Ia nakama la oipena namea la oia, ia hihai alakama ipena namea la hoi.
Выбрано:
Romans 1: ojv
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 1999, Wycliffe Bible Translators, Inc. All rights reserved.
