Acts 28
28
Paul enoho i Malta
1Kulana makou ukae laoi iluna henua la, makou uailoa pela henua la emale ma Malta. 2Nakama enoho pouli la esoa laoi ma makou, kena ihaꞌaa keahi ihamahana makou, maikinimea keua la eloꞌu ia esamalio. 3Paul ehaele oꞌo nahie nokuu aꞌe iluna keahi la. Ia keahi la evela lo, kena heꞌaka kela emoe iloko nahie la ekolo iho ikaha noꞌuu kelima Paul. 4Kulana nakama henua la eꞌike keꞌaka la ekoko i kelima Paul, kena ikakala solakou ma, “Aikoa. Kanaka nei ekaa kama. Kama nei semalemo i kemoana, ia sekonu pela kama nei iola.” 5Ia kena Paul ululuu kelima aia nokeiho keꞌaka la iloko keahi. Ia kama la sehiꞌina elihu. 6Nakama henua la ehakaꞌoko pela kinokama Paul mehula, ia poi seai, kama la mesina nomake. Nakama la ekoꞌa aꞌe Paul, ia kama la ekaualeꞌa oia. Kena nakama la usui nahakaꞌoko lakou ikakala ma kela hekipua.
7Kekama hamakua henua la emale ma Publius. Kama la esoa laoi ma makou. Keeleꞌele aia la ekapili aꞌe, kena kama la eko hakaualeꞌa makou nonoho koukolu naaho i hale aia la. 8Kamana Publius la emoe ilalo elavea kealualu, ia kinoꞌo. Kena Paul uhaele i hale kama la noloku aꞌe i Keakua, kena ihapili nalima aia iluna kama la, ia kena kama la ukaualeꞌa. 9Ia kena nakama lavea henua la hakoa uo aꞌe ma Paul ikonaꞌi lakou ikaualeꞌa hoi. 10Keonohenua la ehamaha makou. Ia keualoko makou kanakana iuhu nohaele, nakama la eau mai nahakaio ikau ma holau makou la.
Paul ukae i Rome
11Koukolu namaalama makou enoho henua la. Ia keualoko kemakani la nimaili, kevaꞌa Alexandria ehaluu ikai henua la, nakama aiku saoꞌoa emau imua kevaꞌa la. Ia makou eꞌae kevaꞌa la, nohulo 12nokae i kemakaꞌina Syracuse, kena inoho ilaa koukolu naaho. 13Kena iuhu nohaele nokae kemakaꞌina i Rhegium. Kela aho kemakani uaniꞌani mai i keꞌupu. Kena kela aho hoi, makou ukae kemakaꞌina i Puteoli. 14Makou elave nahakina ana kemakaꞌina la. Kena nakama la eainoa mai makou inoho aꞌe kauhiku naaho ma lakou. Ia kena imuli, makou ukaꞌa nokae i Rome. 15Nahakina ana kela enoho iloko Rome elono ma makou usasaika aꞌe kemakaꞌina lakou la. Kena io mai nokili makou i keꞌina emale ma Appius, ia ma keꞌina ekapa lia Koukolu Nahale Elahi. Keualoko Paul niꞌike nakama la, kama la uhihia, kena ihamaha i Keakua.
Paul unoho i Rome
16Keualoko makou nikae i Rome, pulepule kela elolosi Paul la uhakana kama la inoho soia, ia kelaa pulepule elolosi kama la.
17Imuli koukolu naaho, Paul uanaa aꞌe nakama hamakua na{Jiu} la iꞌuku aꞌe hakoa, ia kena ime aꞌe i nakama la, “Aukaina. Anau sehimea esala epena i keonohenua kakou la. Ia anau sekiaꞌi nakipukipu nakipuna kakou imua la. Ia nakama Jerusalem la ekaohi anau iau aꞌe i nakama haRome. 18Nakama haRome la uhakonukonu anau, kena ihakaꞌoko ma ihakana anau ihaele, maikinimea anau sehimea esala epena, ikau pela nakama la ikaa anau imake. 19Ia nakama kakou na{Jiu} la sehihai nahakaꞌoko nakama haRome la, kena iko anau iainoa aꞌe pela kekuꞌu haRome ihakonu konu anau. Maikinimea anau sehihai ihakaukau ma nakama keonohenua kakou la. 20Kela hea anau hihai iꞌike okou, ikakala aku okou. Maikinimea anau ehakina i kekama kela ekonaꞌi kakou nakama Israel iola. Kela hea anau enoho esaisai lia na{seni} nei.”
21Kena iko nakama hamakua la ime aꞌe, “Nakama Judea la sehilauniu ekakaa mai imakino makou nakipukipu aꞌoe. Ia sehikama ekae mai nokakala haeꞌo mai nakipukipu aꞌoe. 22Makou hihai ilono nahakaꞌoko aꞌoe, maikinimea makou makino pela nakama i naꞌina hakoa esehihai keukulana okou na.”
23Paul lakou ma na{Jiu} la ekini keaho lakou meꞌuku. Ia keaho la komaꞌi nakama na{Jiu} uo i kehale Paul enoho la. Amaka i kahaka haele nokae keiahi, Paul ehaꞌali hamakahua aꞌe nakipukipu kenoholana Keakua. Kama la eaoaꞌo nakuaa Moses, ia ma nakakala nakama hakae nakakala Keakua, pela na{Jiu} la mehakina ia Jesus. 24Alakama na{Jiu} la ehakina hea Paul ekakala la. 25Ia alakama sehakina, kena ihakauoki solakou.
Ia imua kela nakama sehakina la uo ikaha, Paul eme aꞌe nakama la hakoa nakakala haoki aia nei. “Keanana Kapu ekakala kehamaoni i nakipuna kakou la, keualoko Isaiah ehakae nakakala Keakua ma,
26‘Haele i keonohenua nei nome aꞌe pela,
Niaina okou ehalono kahi,
Okou mesemakino.
Niaina okou eꞌilaꞌila,
Okou meseꞌike.
27Maikinimea nahakaꞌoko nakama nei upouli,
Naakalina nakama nei ukuli,
Naꞌalemaka nakama nei useni,
Aoki naꞌalemaka nakama nei uꞌike
Ia naakalina lakou ulono
Kena imakino laoi
Kekiꞌe ikaha ma nahaisala lakou,
Pela anau mekonaꞌi lakou ikaualeꞌa.’
28“Okou ekau kemakino pela Keakua ehaunalia makou ikakala aꞌe nakama enoho pouli la pela aia mekonaꞌi lakou. Kena nakama la uhalono.”
29Ia keualoko Paul ekakala penei, na{Jiu} la uhakaukau solakou, kena imaseu nokaꞌa.
30Siaoa nahekau Paul esusui kehale aia enoho la, ia eko halaoi nakama kela eo aꞌe nomaka i aia la. 31Kama la esemakaꞌu kekaukaꞌu nakipukipu kenoholana Keakua, ia iaoaꞌo nakipukipu Kealiꞌi Jesus Christ. Kena sehikama hoi epui kama la.
Выбрано:
Acts 28: ojv
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 1999, Wycliffe Bible Translators, Inc. All rights reserved.
