Ap'u 1
1
Atua ien si udlani
(Ap'u 2:4-9; Sup 38:4-11; Sun 1:1-5)
1Naran ap'u Atua ien p'knaran m'a nadep'. 2Nadep' lera iav'i si ipamk, iv'i nut kaka uaki. M'alk iter eia arna nata. M'im'iln Atua idul eia arna nata. 3#2 Kurin 4:6.Atua ivr ti a, “Nut ren ipaiak.” Laha, nut ren iak.
4Atua ila ti nut ren ip'as. Laha, Atua itupr pnen iv'i nut ren, pnen iv'i m'alk. 5Atua itu naha nut ren kavr ti iv'i Napn, katu naha m'alk kavr ti iv'i Lihat. Laha, iv'i knarev' sarei m'etav'aran, iv'i napn itauamu.
6 #
2 P'ita 3:5. Atua ivr ti a, “Nut lil ipater a p't nut na nauei katupr nauei m'a nauei.” 7Laha, Atua ien nut lil lera katupr nauei iter a nv' nut lil lera m'a nauei iter eia nen. Laha, itu hin inap'i lera. 8Atua itu naha nut lil lera iv'i Liha Masamas. Laha, iv'i knarev', sarei m'etav'aran, iv'i tv'el napn.
9Atua ivr ti a, “Nauei udlani a nv' p'knaran ipap'lt a nut ipamk, nadep' la im'am'a ha ipama eia.” Laha, itu hin inap'i lera. 10Atua itu naha nadep' la im'am'a ha iv'i Nadep', katu naha nauei udlani ip'lt a nut iamk iv'i Nata. Laha, Atua ila ti ip'as.
11Atua ivr ti a, “Nina ipasi arna nadep', sei isi m'at nen iak m'a nai navan iak la m'at nen iter a nln ha, iviviln a nai nen.” Laha, itu hin inap'i lera. 12Laha, nina isi arna nadep', sei m'at nen iak iviviln ani, m'a nai navan iak la m'at nen iter a nln ha, iviviln a nai nen. Laha, Atua ila ti ip'as. 13Laha, iv'i knarev', sarei m'etav'aran, iv'i nitla napn.
14Atua ivr ti a, “Lait kinkin ipaiak arna liha masamas katupr ren m'a lihat kav'iv'en naran udlani, napn udlani m'a pai udlani. 15Kavv'i lait kinkin arna liha masamas katu nut ren ipama arna nadep'.” Laha, itu hin inap'i lera. 16Atua ien lait lil iru. Tv'aln la ilil kasiv' tv'aln ha ipap'aur napn, tv'aln ipap'aur lihat. Ien msi ml aranan. 17Atua itaur arna liha masamas a ti apavtu nut ren arna nadep'. 18Kavp'aur ren m'a lihat, kavtupr nut ren m'a m'alk. Laha, Atua ila ti ip'as. 19Laha, iv'i knarev', sarei m'etav'aran, iv'i niv'a napn.
20Atua ivr ti a, “Nata ipalini a sei isilv', m'anh ipatetv eia na nadep' arna liha masamas.” 21Atua ien nap'el lilil m'a si udlani istudau la isilv' al nata ha, iviviln a p'klr, kan m'anh udlani niln iak, iviviln a m'anh nen. Laha, Atua ila ti ip'as. 22Atua imhmah anr kavr ti a, “A netm'i ipastudau kavnelnal kavlinkar nata, m'anh apavnelnal arna nadep'.” 23Laha, iv'i knarev', sarei m'etav'aran, iv'i nilm'a napn.
24Atua ivr ti a, “Sei isilv' ipaiak arna nadep', iviviln a p'klr, si slm, sei iharev' arna v'atn m'a si dm na nadep', iviviln a p'klr.” Laha, itu hin inap'i lera. 25Atua ien si dm na nadep' iviviln a si dm lera, kan si slm iviviln a si slm lera, kan si udlani iharev' arna v'atn arna nadep', iviviln a si la iharev' ra. Laha, Atua ila ti ip'as.
26 #
1 Kurin 11:7. Atua ivr ti a, “P'van m'ertu ipav'i m'lkd, ipanep'a sera nakd. Hin ipav'i mlinar tilau al nata, m'anh itetv eia m'a si slm, kav'i mlin na nadep' udlani m'a si udlani iharev' arna nadep'.” 27#Ap'u 5:1,2.#Mat 19:4; Mak 10:6.Laha, Atua ien m'ertu iv'i m'lkn. Iani iv'i m'lkn Atua. Ianr arv'i dui m'a tav'et. 28Atua imhmah anr, laha Atua ivr anr kavr ti a, “A netm'i ipastudau kavnelnal kavlinkar nadep'. Parv'i mlin arna nadep' karv'i mlinar tilau avlak al nata, m'er m'anh udlani avtetv eia, m'a si udlani arna nadep' avsilv' kavv'el.”
29Atua ivri ml kavr ti a, “Parlei, ntu kam'i si udlani m'at nen iter a nln arna nadep' udlani, m'a nai udlani la m'at nen iter al navan ha, ipav'i suadam'i. 30Nttu sera suada si dm udlani arna nadep', m'a suada m'anh udlani avtetv eia, m'a suada si udlani avharev' arna nadep' kavsilv'. Suadar ipav'i si udlani isi arna nadep'.” Laha, inap'i lera. 31Laha, Atua ila si udlani iani. Pavlei, sei iani ip'as istudau. Laha, iv'i knarev', sarei m'etav'aran, iv'i lm'sei na napn.
Выбрано:
Ap'u 1: nmb
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2023 Presbyterian Reformed Church of Australia
