Mateo 7

Ti kchuug'be'li ki lza'a'li

(Lc 6:37-38,41-42)

1»Ti kchuug'be'li kieke bënni yubl, naar Dios ti kchuug'be'e kieeli. 2Koma Dios kchuug'be'e kieeli ka lbi'ili kchuug'be'li kieke bënni yubl; xhguunz lea gri'xhi'li len guik'li'ne bënni yubl, xhguunz'a gri'xhi'de Dios unne kieeli. 3¿Bixhkia' ryu' bëta'yaag'a yu'u lau'e bënni bë'chu'u len ti ryu' bguugu'a yu'u lau'u? 4Len xhki yu'u bguugu'a lau'u, ¿nakxh'kz ruunu ruwaaxhj'du reu'ne bënni bë'chu'u: “Bë'cha'a, benn latj ubiija bëta'yaag'a yu'u lau'u”? 5¡Naku ka bënni nuda' blo'u!, bubiaj zia'a bguugu'a yu'u lau'u, naar gunn gle'i'du dxia'a ubiiju bëta'yaag'a yu'u lau'e bënni bë'chu'u.

6»Ti gnëëdzjli le nak la'ay lau'e Dios kiek'ba bëku', ka gna luweikj'ba len luxhuuxhj'lukinj'ba lbi'ili. Len ti gzal'li lauk'ba kuch le zaki'i'tzki, ka gna luliaj'luliib'ba ley.

Gulunaab, gulugiilj len gululiidze Dios

(Lc 11:9-13; 6:31)

7»Gulunaab'de Dios len Le' gunne kieeli; gulugiilje, len udzëëli'li'ne; gulkapa puert len uyaalj. 8Koma bënni rnaabe, rzi'e; len bënni rgiilje, rdzëël'de; len bënni'a rga'pe'e puert, ryaalj.

9»¿Naru waxhji'li gnëëdzj'li kieebi bi kieeli tu giaj kati rnaab'bi yët'xhtiil? 10¿U kati rnaab'bi'ba tuuba bël gnëëdzj'li'ba kieebi tuuba bel'? 11Nak'te lbi'ili nak'li bënni xhe'e, rnëëdzj'li kiek'bi bi kieeli le nak dxia'a, ¡Naxh'gaar guune Xuuz'li zue' yewayuba gnëëdzje le' nak dxia'a kieke bënni tunaabe ley!

12»Ati ka re'eni'li luune kieeli bunach, ka gulgun kieke; koma ka' rseedi ro'u xhba kie' Moisés len bënni glui'ke diidza ulaaz kie' Dios.

Puert'a nak gi

(Lc 13:24)

13»Gultzaaz ga nak gi. Koma xhën len yaalj nakgak puert'a len nëëz'a le rche' le' bënni lu yëla gut, len zian'ke tayaazie; 14san gi len baniig nakgak puert len nëëz'a le rche' le' bënni lu yëla naban tzalzu, len lati'ize bënni tudzëël'de ley.

Wak'be'i'li nuxh nak'ke len yëla rbëëz kieke

(Lc 6:43-44)

15»Gulun'chi'i kuin'li kieke bënni tazi'ye'ke tanáke ki tui'ke diidza ulaaz kie' Dios. Bëku'xhiila'dukz len leke, san lu ikj'laadxi'dau'ke nak'ke ka bëku'zuuga znia'. 16Lbi'ili wak'be'i'li nuxh nak'ke len yëla rbëëz kieke, koma ti rchiib'ru uva lu yëtzi bezka, len ti rchiib'ru higo lu yaag yëtzi. 17Yaag dxia'a rbia xhlu'li'i dxia'a, san yaag ku nak rbia xhlu'li'i ku nak. 18Yaag dxia'a ti rbia xhlu'li'i ku nak, len yaag ku nak ti rbia xhlu'li'i dxia'a. 19Yugute' yaag le ti rbia xhlu'li'i dxia'a, tuchuuge len tuzal'ke ley lgi'. 20Ka nak, wak'be'i'li nuxh nak'ke len yëla rbëëz kieke.

Le nayaadzji naar tzaaz'ru lu yëla rnabe' ki yewayuba

(Lc 13:25-27)

21»Keg yugute'ke bënni tanáke: “Xan, Xan”, layaazie lu yëla rnabe' ki yewayuba, layaaz'ze bënni'a tun'ke le ryaazlaadxe'e Xuuza zue' yewayuba. 22Kati gdxin dza'a, bënni zian lanáke: “Xan, Xan, netu be'tu diidza ulaaz kiu', len lu lou' li' bubiaj'tu bë' xëwi len ben'tu yëla wak xhën.” 23San neda ubi'a diidza: “Ti bumbe'kza lbi'ili; ¡Gultziaj ki'il, lbi'ili bënni run'li le ku nak!”

Chop xhliibi yu'u dzë'ë

(Mr 1:22; Lc 6:47-49)

24»Lena'a, bënni'a ryëën'de len ruune le rea'ne, nake lsaki'i len bënni nayajni'i glekie xhliibi liidxe lu giaj. 25Kati guul giaj, gulaxhën yeego len guk'tzka bë' yajtzu'u liidxe; san ti brixh ley, koma gulabekie xhliibi lu giaj. 26San bënni'a ryëën'de neda ati ti ruune le rea'ne, nake lsaki'i ka bënni ti rajni'i'de glekie xhliibi liidxe lu yuuxh. 27Kati guul giaj, gulaxhën yeego len guk'tzka bë' yajtzu'u liidxe len yu'a gbixh. ¡Budu'kz bgin'j!» 28Kati Jesús buudx be'e diidza, yugute' bunach tubaan'de ka rseed'de'a 29koma rseed'de len gdu yëla rnabe', keg ka tuseed'de leke bënni useed xhba kie' Dios.

Выбрано:

Mateo 7: PZD

Выделить

Копировать