Mateo 4
4
Bënni xëwi gxhi'be'e Jesús
(Mr 1:12-13; Lc 4:1-13)
1Chi nak ka' Bë' La'ay kie' Dios pche'e Jesús lu yu biidx, naar si'be'e Le' bënni xëwi.
2Chua' dza len chua' yeel gzue' ni' len tibi gda'we, na' gdëëd'a gzulau rduune. 3Le' bënni xëwi'a bdxiine ga zue' naar si'be'e Le', len gudxe le':
—Xhki leel naku Xi'ine Dios, gudx giaj ni ueaki yët'xhtiil.
4Ati Jesús gudxe le':
Diidza La'ay rna: “Keg yët'xhtiil'z nabani'gak bunach, san lekz'ka' ki yugute' diidza r'roj rue'e Dios.”
5Gdëëd ni, bënni xëwi'a pche'e Jesús yëdz Jerusalén, busreene Le' luuli gdou', 6len gudxe Le':
—Xhki leel naku Xi'ine Dios, buzlaadzu kuinu ni; koma lu Diidza La'ay rna:
“Dios ksë'le'e Gbaaz La'ay kie' ki lun'chi'ke Li'.
Len lazëëne Li' len naa'ke,
naar tibi giaj tzajtzu'u ni'u.”
7Jesús bubi'e diidza:
Lekz'ka' Diidza La'ay rna: “Ti si'be'u'ne Xaanu Dios.”
8Na' buudx'a bënni xëwi'a pche'e Jesús lu gia'a sib, len blui'de Le' yugute' yëla rnabe' ki yëdz'lyu, 9ati gudxe Le':
—Gdu'te le ni gunna kiu', xhki gzechu xhiibu len tziijilaadxu'u neda.
10Jesús bubi'e diidza:
—Buaj, Satanás, koma Diidza La'ay rna: “Xaanu Dios tziijilaadxu'ne, len tuuze Le' guunu xhchiine.”
11Na' bënni xëwi'a buze'e ga zue' Jesús, len gbaaz La'ay kie' Dios guladxiine len glak'leene le'.
Jesús gzulau'e xhchiine lu yu Galilea
(Mr 1:14-15; Lc 4:14-15)
12Kati Jesús byëën'de ki gulagu'e Juan liidx'gia, gyiije Galilea. 13San ti bga'ane yëdz Nazaret, ati yajsue' yëdz Cafarnaúm, ra nis xhën, lu yu kieke bunach Zabulón len bunach Neftalí. 14Le ni guk naar yajtzaag ka nayoj lu Gich La'ay le bzooje Isaías bënni be'e diidza ulaaz kie' Dios:
15«Lu yu kie' Zabulón len lu yu kie' Neftalí,
tzala'a yeego Jordán,
ra nis xhën:
Galilea, ga'la ga nakua'ke bënni ti nak'ke bënni Judea.
16Yëdz rda ga nak chul
ble'i tu gi' xhën;
tu gi' bze lni'
kieke bënni'a nakua'ke ga ze pxin ki yëla gut.»
17Ni gzulau'e Jesús ruune lban rne': «Gulubi'i laadxi'li len Dios, koma yëla rnabe' ki yewayuba chi za' gdxin.»
Jesús rliidze tap'ke bënni tazëëne'ba bël
(Mr 1:16-20; Lc 5:1-11)
18Jesús yu'e nëëz tza ra nis xhën ki Galilea, kati ble'i'de chop bë'chi'ke: tue' le Simón, lekz'ka' te'ke le' Pedro, na' ye tue' le' Andrés. Tuzal'ke yëxhj kieke lu nis xhën koma nak'ke bënni tazëëne'ba bël. 19Jesús gudxe leke:
—Gultza' len neda, neda guuna ga lbi'ili gak'li bënni kche'li kia' bunach.
20Guluka'an'tie yëxhj bël kieke len zjak'leene Le.
21Kati chi gulaza'ke lati, Jesús ble'i'de ye chop bë'chi'ke: tue' le Santiago len ye tue' le' Juan, nak'ke bënni xi'ine Zebedeo, nakua'ke len xuuz'ke lu barku tu'un'ke yëxhj bël kieke. Jesús bliidze leke, 22len guluka'an'tie barku'a len guluka'an'te'ke xuuz'ke'a, len zjak'leene le.
Jesús rseed'de zian bunach
(Lc 6:17-19)
23Jesús rde' gdu yëdz Galilea, rseed'de gap nak yu'u useed. Rgixhjë'e diidza kub dxia'a ki yëla rnabe' kie' Dios len ru'uune bunach ki zian baya' len yëla rtzaag. 24Gdu yu ki Siria tui'ke diidza kie' Jesús, len rajua'ke lau'e yugu bënni biiz tutzaage ka', yugu baya' len yëla rtzaag, len bënni yu'u leke bë' xëwi, bënni te'i'de baya' xhjuti len bënni nat'zi'ke. Len Jesús ru'uune leke.
25Ziaane bunach ki yu Galilea, bunach ki yu Decápolis, ki yu Judea len yugu yëdz nakua' zga ga rlen gbiidz tzala'a yeego Jordán zjak'leene Jesús.
Выбрано:
Mateo 4: PZD
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Sociedad Biblica de México AC
