GÉNESIS 1

Taita Diosmi tucuita churashca

1Callaripica, Taita Diosmi jahua pachatapash, cai pachatapash churarca. 2Cai pachaca, imamambash na rijchaj, ima cajtapash na ricui ushanalla tucui chapumi carca. Shinallata, manllanayai yacucunata yana yana amsa quilpashca jahuatami, Taita Diospaj Espirituca purijurca.

3Shina cajpimi Taita Diosca: “Punchalla tucuchun” nirca. Shina nijpica, punchalla tucurcallami. 4Taita Diosca chai punchallataca, aligu cajtami ricujurca. Shinamandami, Taita Diosca chai punchallataca, yana yana tutamanda shicanyachirca. 5Shina shicanyachishpami, Taita Diosca, chai punchallataca: “Punlla” nishpa shutichirca. Yana yana amsataca: “Tuta” nishpami shutichirca. Chashnami chishindi, tutamandandi, callari punlla tucurca.

6Chai jipami, Taita Diosca, cashna nirca: “Yacuta shicanyachijuj tiyachun. Chaica, yacucunamanda, yacucunata shicanyachijuchun” nircami. 7Shinallata Taita Diosca, shicanyachijundami churarca. Ucuman tiyaj yacucunatapash, jahuaman tiyaj yacucunatapash shicanyachijuchunmi churarca. Chaica chashnapachami tucurca. 8Jahuaman shicanyachishcataca, Taita Diosca: “Jahua pacha” nishpami shutichirca. Chashnami, chishindi, tutamandandi, shujpaj cati punlla tucurca.

9Taita Diosca, cashnatapashmi nirca: “Jahua pachamanda ucuman tiyaj yacucunaca, shujllapi tandanajuchun, chaquishcacunapash ricurichun” nirca. Shina nijpica, chashnapachami tucurca. 10Taita Diosca chaquishcataca: “Alpa” nishpami shutichirca, yacucuna tandanajushcataca: “Mama cuchacuna” nishpami shutichirca. Chaicunataca, alipacha cajtami Taita Diosca ricujurca.

11Chai jipami Taita Diosca, cashna nirca: “Alpapica verdella jihuacunapash, muyuta fucuj jihuacunapash mirachun. Ima granotapash fucuj, muyuta charij yuracunapash, paicunapuralla imashna fucunshnallata cai alpapi tiyachun” nirca. Shina nijpica, chashnapachami tucurca. 12Alpapica verdella jihuapash, muyuta fucuj jihuapash, jihuacuna imashna viñana cashcashnami viñarca. Shinallata, ima granotapash fucuj, muyuta charij yuracunapash, paicunapuralla imashna fucunshnallatami mirarca. Chaitaca, alipacha cajtami Taita Diosca ricurca. 13Chashnami chishindi, tutamandandi, ishcaipaj cati punlla tucurca.

14Chai jipaca, Taita Diosca cashnami nirca: “Jahua pachapica, tutata, punllata shicanyachingapa punchayachijuj michacuna tiyachun. Chaicunaca, cai alpapi, pachacuna, punllacuna, huatacuna, imashna cajta ricushpa yachangapami canga. 15Punchayachijuj chai michacunaca, jahua pachata shicanyachijujmanda, cai pachata punchayachinajuchun” nircami. Shina nijpica, chashnapachami tucurca.

16Taita Diosca, punchayachijuj ishcai jatun michacunatami churarca: Inditaca, punllata punchayachishpa mandajuchun, lunataca, tutata punchayachishpa mandajuchunmi churarca. Shinallata, luzerocunatapashmi churarca. 17Taita Diosca, chaicunataca jahua pachamanda, cai pachata punchayachijuchunmi churarca. 18Shinallata, punllata, tutata mandanajuchunmi churarca. Michataca, yana tutata shicanyachijuchunmi churarca. Shina rurashpaca, alipacha cajtami Taita Diosca ricurca. 19Chashnami, chishindi, tutamandandi, quimsapaj cati punlla tucurca.

20Taita Diosca, cashnami nirca: “Yacucunapi causana animalcunapash tiyachun. Alasyu animalcunapash tiyashpa, jahua huairata caiman chaiman rinajuchun” nircami. 21Taita Diosca, jatun manllanayai animalcunatami mama cuchapi causachun churarca. Yacucunapi causaj tucui animalcunatapash, jahuata rij alasyu animalcunatapash, tucuicunatami paipuralla miranajuchun churarca. Chaitaca, alipacha cajtami Taita Diosca ricurca.

22Taita Diosca, cashna nishpami paicunataca bendiciarca: “Huacharishpa ninanda mirashpa, mama cucha yacucunapi jundaichi. Shinallata, alasyu animalcunapash, cai pachapi ninanda miraichi” nircami.

23Chashnami, chishindi, tutamandandi, chuscupaj cati punlla tucurca.

24Chai jipami Taita Diosca, cashna nirca: “Alpapi causana tucui animalcunaca, ima animalcuna cashpapash, chaipuralla tiyachun. Sachapi causana animalcunapash, alpata llucashpa purina animalcunapash, huasipi charina animalcunapash, chaipuralla miranajuchun” nircami. Shina nijpica, chashnapachami tucurca.

25Chaipaj jipami Taita Diosca, alpapi causana tucui animalcunataca chaipuralla churarca. Sachapi causana animalcunapash, alpata llucashpa purina animalcunapash, huasipi charina animalcunapash, paipurallami churarca. Chaitaca, alipacha cajtami Taita Diosca ricurca.

26Chaipaj jipami Taita Diosca, cashna nirca: “Ñucanchishnalla rijchajta, Ñucanchishnalla ricurichun, runata rurashun. Paitaca, mama cuchapi pijicunata, jahuata rij alasyu animalcunata, sachapi causaj animalcunata, alpapi causaj tucui animalcunata, alpata llucashpa purij tucui animalcunatapash mandachun rurashun” nircami.

27Taita Diosca, runataca, Paishnalla rijchajtami rurarca. Taita Diosman rijchajtapachami rurarca. Jaritapash, huarmitapashmi rurarca. 28Taita Diosca, cashna nishpami paicunataca bendiciarca: “Huacharishpa ninanda mirashpa, ashtacacuna tucushpa, cai pachapi jundanguichi. Cai pachapi imalla tiyajcunata cazuchinguichi. Shinallata, mama cuchapi causaj pijicunata, jahuata rij alasyu animalcunata, alpapi causaj tucuilla animalcunatapash mandanguichi” nircami.

29Taita Diosca, cashnatapashmi nirca: “Tucui cai pachapi, muyucunata fucuj tucui yuracunata, muyucunata charij, granocunata fucuj tucui quirucunatapashmi cangunaman curcani. Chaicunami, canguna micushpa causana canga. 30Ashtahuangarin, cai pachapi causaj tucui animalcuna, jahuata rij alasyu animalcuna, alpata llucashpa purij animalcuna, causaita charij tucui animalcunaca, tucui verde jihuacunatami micushpa causanga” nircami. Shina nijpica, chashnapachami tucurca.

31Taita Diosca, tucuita Pai rurashcacunaca, aligupacha cajtami ricujurca. Chashnami, chishindi tutamandandi, pichapaj cati punlla tucurca.

Выбрано:

GÉNESIS 1: QVI16

Выделить

Копировать