馬可福音 16
16
耶穌的閣活
(太 28.1-8；路 24.1-12；約 20.1-10)
1安歇日過了，末大拉的馬利亞、雅各的老母馬利亞，及撒羅米買芳料欲去抹耶穌的遺體。 2禮拜日#16.2 「禮拜日」原文是「七日的頭一日」，就是猶太曆逐禮拜的第一日。透早，日抵仔出的時，𪜶就去墓地。 3𪜶互相講：「什麼人欲替咱將墓口彼塊石翱開？」 4彼塊石非常大塊。𪜶一下攑頭，看著彼塊石已經翱開。 5𪜶入去墓內，看著一個穿白衫的少年人坐佇正旁，非常著驚。
6彼個少年人對𪜶講：「免驚！我知恁啲尋互人釘十字架的拿撒勒人耶穌；伊已經閣活，無佇遮。來看囥伊的所在。 7恁去，去給伊的門徒及彼得講：『伊比恁先去加利利，佇遐恁會見著伊，抵抵照伊給恁講的。』」
8𪜶驚甲皮皮惙，毋知欲按怎，就對墓裡出來，直直走。𪜶攏無對人講什麼，因為𪜶真驚。#16.8 有的抄本到第八節就結束。有一個抄本加結語 I；有一寡抄本加結語 I 及 II。
結語 I
9許個婦仁人去彼得及伊的朋友遐，對𪜶簡單報告所聽見攏總的代誌。諸個代誌以後，耶穌本身差遣伊的門徒，對東到西宣揚神聖、不滅，互人得著永遠拯救的信息。阿們！
結語 II
耶穌對末大拉的馬利亞顯現
(太 28.9-10；約 20.11-18)
9禮拜日透早，耶穌閣活了後，代先對末大拉的馬利亞顯現；耶穌曾給伊趕出七個鬼。 10伊去給許個隨耶穌的人報告，彼時𪜶啲哀傷啼哭。 11𪜶聽見耶穌閣活閣有互馬利亞看著，𪜶猶毋信。
耶穌對兩個門徒顯現
(路 24.13-35)
12諸個代誌以後，有兩個門徒行路欲去庄腳的時，耶穌用別款的形像對𪜶顯現。 13𪜶轉去給其他的人報告，毋拘許個人攏毋信。
耶穌對十一個使徒顯現
(太 28.16-20；路 24.36-49；約 20.19-23；徒 1.6-8)
14後來，十一個使徒啲食飯的時，耶穌對𪜶顯現。伊責備𪜶毋信及硬心，因為𪜶無信看著耶穌閣活的人給𪜶講的話。 15耶穌給𪜶講：「恁著去全世界對所有被造的宣揚福音。 16信來領受洗禮的人會得著救；毋信的人會受定罪。 17信的人會行下面諸個神跡：𪜶會奉我的名趕鬼；𪜶會講新的語言； 18𪜶掠蛇抑是飲毒嘛𣍐受傷害；𪜶給病人按手，病人會得著醫好。」
耶穌上天
(路 24.50-53；徒 1.9-11)
19主耶穌給𪜶講諸個話了後受接上天，坐佇上帝的正旁。 20門徒出去逐所在傳福音。主及𪜶同工，用𪜶所行的神跡證實𪜶所傳的道理。
Выбрано:
馬可福音 16: TTVH
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible Society in Taiwan, 2021
