路加福音 14
14
耶穌醫好病人
1有一個安歇日，耶穌去一個法利賽派的領袖𪜶兜食飯。大家注意啲給伊看。 2彼時，佇伊的面前有一個臌脹病的人。 3耶穌問律法教師及法利賽人講：「佇安歇日醫病有合法無？」
4𪜶攏無應。耶穌就牽彼個人來，給伊醫好，互伊轉去。 5然後耶穌給𪜶講：「恁中間豈有人家己的子抑是牛佇安歇日跋落鼓井，𣍐隨時給伊扭起來？」
6𪜶對耶穌所問的話攏𣍐曉應。
作人客及作主人
7耶穌看著人客啲揀大位，就用一個譬喻給𪜶講： 8「恁互人請去赴婚宴的時，毋通坐大位，驚了有比你較尊貴的人客嘛來互伊請。 9彼時，請伊及你彼個主人會來給你講：『請讓位互此個人客。』彼陣，你會感覺真歹勢，煞著去坐上細的位。 10你互人請的時，寧可去坐上細的位。按呢，請你的主人會來給你講：『朋友，請來坐大位。』彼陣，你佇仝桌的人客面前就有體面。 11因為提高家己的，會受降低；毋拘屈低家己的，會受提高。」
12然後，耶穌嘛給請伊的主人講：「你請人食中晝頓抑是暗頓的時，毋通請你的朋友、兄弟、親族、好額的厝邊，才免𪜶給你請倒轉，你煞受報答。 13你請人客的時，寧可請散赤人、行動無方便的人、腳跛的人、失明的人。 14按呢，你一定會受祝福，因為𪜶𣍐當給你報答。佇義人閣活的時，上帝會給你報答。」
宴席的譬喻
(太 22.1-10)
15仝桌有一個人聽著諸個話就給耶穌講：「會當佇上帝國飲食的人真有福氣！」
16耶穌給伊講：「有一個人辦大宴席，請真多人客。 17欲開桌的時，伊差僕人去給受請的人客講：『請恁來；逐項攏準備好勢啦。』 18毋拘𪜶一個一個推辭。頭一個給伊講：『我有買一塊地，著去看覓咧。請你諒解。』 19另外一個講：『我有買五對牛，著去試用看覓咧。請你諒解。』 20閣一個講：『我抵娶某，所以𣍐當去。』 21彼個僕人轉來給主人報告諸個代誌。彼家的主人就受氣，給僕人講：『趕緊出去城內街頭巷尾，導許個散赤人、行動不便的人、失明的人、腳跛的人來。』 22彼個僕人講：『主人，你所吩咐的我已經攏有做，毋拘猶有空位。』 23主人就給僕人講：『出去大路及籬笆邊強迫人入來，通互我的厝坐滿。 24我給恁講，代先請許個人，無一個會當食我的宴席。』」
作門徒的代價
(太 10.37-38)
25一大陣人及耶穌做陣行路，耶穌越過來給𪜶講： 26「隨我的人若疼家己的父母、某子、兄弟、姊妹，甚至家己的性命贏過疼我，𣍐當做我的門徒。 27無夯家己的十字架來隨我的𣍐當做我的門徒。 28恁中間有人想欲起一個塔，豈無代先坐落來估計看有夠錢通完成工程抑無？ 29若無按呢做，伊拍地基了後煞𣍐當完成工程，所有看著的人會給伊恥笑， 30講：『此個人有開始起，煞𣍐當完成！』 31抑是，有一個國王欲去及別個國王交戰，伊豈𣍐先坐落來，想看伊會當用一萬個兵抵抗有兩萬個兵的國王抑𣍐？ 32若知影𣍐，伊會趁彼個國王猶佇遠遠的時，差使者去及伊講和。 33仝款，恁中間無論什麼人，若無放拺家己所有的一切，𣍐當做我的門徒。」
失味的鹽
(太 5.13；可 9.50)
34「鹽真有路用，毋拘若失味，欲按怎互伊閣鹹？ 35失味的鹽𣍐當落田，嘛𣍐當𩛩肥，只有挕拺。有耳孔通聽的，著聽！」
Выбрано:
路加福音 14: TTVH
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible Society in Taiwan, 2021
