मत्ती 4

यीशुन परिक्षा

(मरकुस 1:12-13; लूका 4:1-13)

1तेवी बोगवानान आत्मा यीशु जेंगलामाय लीन गीयो काहाकाय शैतान द्वारे तान परिक्षा एय 2तो चाळीस दिह, एने चाळीस रात, वोर उपास किऱ्यो, तेवी ताह बुख लागी. 3तेवी पारखणार तान आहने आवीन किदो, “जर तू बोगवानान सोरो एय, ते हुकुम केर, का ज्यो दिगुड रूटू बोनण जाय.”

4तेवी यीशु उत्तर आपील कि, लिखील हि, “माणुह फक्त रोटावकेरिन नाह, तर बोगवानान मुखामायरीन निकालणारा हर एक वचना से, जीवतालो रेय.”

5तेवी शैतान ताह पवित्र नगरामाय ली गीयो एने मंदिरान उपेरल्या टोकापूर उभराख्यो, 6तेवी तो ताह कियो का, “केधी तू बोगवानान सोरो एय, ते बुंदे कुद जां, काहाकाय ओहलो लिखील हि का, तो आपणा स्वर्गदूताह हुकुम केरी, एने तारो पाय देगडा से ठेस, लाणेन पेल ता तुवाह आथापुर जेल लेती.”

7यीशु ताह कियो, इही भी लिखील हि का, “तू आपणो प्रभु बोगवानान परिक्षा मा केरही.”

8ओवतो शैतान ताह उचा जुलुम बोयडीपोर लीन गीयो एने जगान आखा राज्य एने वैभव देखाढ्यो, 9एने तो कियो, “जेवी तू पाया पोडीन माहु नमन केरही ते, ज्यो आखो तुवाह आप देह.” 10तेवी यीशु ताह कियो, “हे शैतान सेटू एय जा, काहाकाय ओहलो लिखील हि का, तू आपणा बोगवानाह नमन केर, एने ताचने भोक्ती केर.”

11ओवतो शैतान ताह सोडीन निकलीन गीयो, स्वर्गदूत आवीन तान सेवा केरणे लाग गीया.

यीशुन सेवकाईन सुरुवात

(मरकुस 1:14,15; लूका 4:14,15,31)

12जेवी यीशु होमल्यो का, यूहन्नाहा बोन्दि बोणाव लियील हेते, ते तो गलील माय आवा गीयो. 13एने तो नासरेथ सोडीन कफर्णहुम नगरमा जो समुद्रकिनारापूर जबुलून एने नप्तालीनने भाग हि ता जाइन रेणे बाजगीय, 14काहाकाय जो यशाया भविष्यवक्ता द्वारे कियील एतो, तो पुरो एने जुवी, 15“जबुलून एने नप्तालीन भाग, जो समुद्राम वाटीपुररीन यार्देन नदीन पुरलेउखीर, दिहरी जातीन माणहान गलील. 16जा माणहा आंधाराम बोहरीयील एता, तापोर मोठू उजालो देखती, जां मोरणेन देशाम एने सावलामाय बोहील एता, तां पोर एक मोठू उजालो चोमकी.”

17ता टायमापोररीन यीशु सुवार्ता पोरचार केरणे एने ज्यो केणेन सुरुवात केऱ्यो का, “मोन फिरावू, काहाकाय स्वर्गान राज्य आहने आव जाईल हि.”

पेलूच चेलाह हादाणेन

(मरकुस 1:16-20; लूका 5:1-11; यूहन्ना 1:35-42)

18यीशु गलील ने, समुद्रान मेरे रीन चालतालून दुय बायाक शिमोन जाह पतरस भी केताला, तो एने तान बाहाक आंद्रिया समुद्रा माय जालो टाकतालान देखाना, ता मासा मारणारा बोयटा एता. 19एने तो तो ताह कियो, “मार पासाण आवु, मी तुमूह माणहा देरणारा बोणावूह.” 20उवता ताहारुस तो जालो सोडीन तान पासाण चालणे बाज गीया.

21तारीन ओंगान जाइन, उंजू दुय बायाक जब्दीन सोरा याकूब एने तान बाहाक यूहन्ना न्याह देख्यो. ता तान आबुक जब्दी ज्या हे-या नावीमाय जालो हुदारताला देखाना. तेवी तो ताह हादयो. 22तो ताहारूच तान नाव एने तान आबाकाह तान सोडीन पासाण चालणे लागा.

यीशुन दुखाऱ्याह हाजो केरणेन

(लूका 6:17-19)

23यीशु आखा गलील माय फिरीन तान आराधनालय माय हिकाडतेन, एने राज्यान पोरचार केरतीन, एने माणहान आखा बातीन रोग एने तान कमीपणा हाजो केरतीन फिरीने लाग्यो. 24एने तान चर्चा आखा सिरीया माय पसरीनी, एने माणहा आखा दुखा-या माणहाह, जा बातीबाती बिमारी से एने दुखान पिडाम एता, एने जामाय दुष्टात्मा एतो, एने जो लकवान पीडामाय एने मिर्गी वाला एता, आखाह लीन आवा एने तो ताह हाजो किऱ्यो. 25एने गलील दिकापुलिस, यरूशलेम, यहूदिया एने यार्देनेन तीउगेवाला मोठलु टोलु तान पासाण लाग गीया.

Выбрано:

मत्ती 4: NLXNT

Выделить

Копировать