मरकुस 5
5
दुष्टआत्मा भीड़लो माने के अच्छा करतोर
1हुनमन झील चो हुनपाट गिरासेनीमन चो देश ने अमरला, 2जिदलदाय हुन ड़ोंगा थानले उतर लो तेबे तुरते गोटक माने जेचो ने अशुद्ध आत्मा रली, मोड़ाभाटा ले निकरून भाती हुनके भेटलो। 3हुन मोड़ाभाटा ने रते रलो आउर कोनी हुनके सिकरामन ने बले नी बान्दुक सकते रला, 4कसनबल्लोने हुन घन-घन बेड़ीमन आउर सिकरामन ने बान्दाय जाऊ रलो, मान्तर हुन सिकरामन के टुटाऊन दिलो आउर बेड़ीमन चो गोंदा-गोंदा करून देऊन रये, आउर कोनी हुनके वश ने नी करूक सकते रवत। 5हुन सरलगा रात दिन मोड़ाभाटा आउर डोंगरीमन ने चिचयाते, आउर आपन के पकनामन ले अदमड़ा करते रये। 6हुन ईशु के लापी ले ची दकुन भाती परालो, हुनके पाँय पढ़लो, 7आउर जोर ले चिचयाऊन भाती बल्लो, “हे ईशु, परमपरधान माहापुरू चो बेटा, मोके तुचो ले काय काम? मय तुके माहापुरू चो किरिया देयें सें कि मोके दुक नी देस।” 8कसनबल्लोने हुन हुनचो ले बोलु रलो, “हे अशुद्ध आत्मा, ऐ माने थानले निकरून आव!” 9हुन हुनचो ले पचारलो, “तुचो काय नाव आय?” हुन हुनचो ले बल्लो, “मोचो नाव सेना आय; कसनबल्लोने आमी खुबे आंसु।” 10आउर हुन हुनचो ले खुबे गुहार लो कि, “आमके ऐ देश ले बाहरे नी पठाव।” 11हुता डोंगरी उपरे बराहांमन चो गोटक बड़े गोअड़ी चरते रली। 12आउर दुष्टआत्मामन ईशु के गुहारुन भाती बल्ला, “आमके हुन बराहांमन ने पटाऊन देस कि आमी हुनमन चो भीतरे जाऊँ दे।” 13आउर हुन हुनमन के हुकुम दिलो आउर अशुद्ध आत्मा निकरून भाती बराहांमन चो भीतरे भिड़ला आउर गोअड़ी, जोन कोनी दुय हजार चो रये, डोंगरी ऊपर ले झंझाड़ी होऊन भाती झील ने जाऊन पड़ला आउर बुडून मरला। 14हुनमन चो चरातो बितामन पराऊन भाती नंगर आउर गाँवमन ने खबर सुनाला, आउर जोन होऊ रये, लोग हुनके दकुक ईला। 15ईशु चो लगे ऐऊन भाती हुनमन हुनके जेचो ने दुष्टआत्मामन रली, बल्लोने जेचो ने सेना भिडू रये, फटीई पिन्दलोर आउर चेत ने बसलोर दकुन भाती डरला। 16दकतो बितामन हुनचो, जेचो ने दुष्टआत्मामन रली, आउर बराहांमन चो सपाय हाल हुनमन के बोलुन सुनाला। 17तेबे हुनमन हुनचो ले गुहारुन भाती बोलुक मुरयाला कि आमचो संदी ले जा। 18जिदलदाय हुन ड़ोंगा थाने चेगुक मुरयालो तेबे हुन जेचो ने पयले दुष्टआत्मामन रये, हुनचो ले गुहार करूक मुरयालो, “मोके आपलो संगे रऊक देस।” 19मान्तर हुन हुनके हुकुम नी दिलो, आउर हुनचो ले बल्लो, “आपलो घरे जाऊन भाती आपलो लोगमन के सांग कि तुचो थाने दया करून परबु तुचो काजे कसन बड़े काम करलो से।” 20हुन जाऊन भाती दिकापुलिस ने ऐ गोठ चो परचार करूक मुरयालो कि ईशु मोचो काजे कसन बड़े काम करलो; आउर सपाय लोग भक्याते रवत।
याईर चो मरलो बेटी आउर गोटक रोगी बायले लेकी
21जिदलदाय ईशु फेर ड़ोंगा ले हुनपाट गेलो, तो गोटक बड़े भीड़ हुनचो लगे रूंड़ा होली। हुन झील चो कटा ची रलो कि 22याईर नाव चो आराधना घर चो सरदारमन ले गोटक ईलो, आउर हुनके दकुन भाती हुनचो पाँय थाने घसरलो, 23आउर हुन ऐ बोलुन भाती खुबे गुहार लो, “मोचो नानी बेटी मरतो थाने आसे: तुय ऐऊन भाती हुनचो उपरे हाथ संगाव कि हुन चेंगा होऊन भाती जीव रओ।” 24तेबे हुन हुनचो संगे गेलो; आउर बड़े भीड़ हुनचो पाट-पाट होली, ऐथा ले कि लोग हुनचो उपरे घसरुन पड़ते रवत। 25गोटक बायले लेकी रली, जोन के बारा बरक ले लऊ जातोर बेमार रये। 26हुन खुबे बईदमन ले बड़े दुक उठाली, आउर आपलो सपाय माल खरचा करलो थानले बले हुनके काई फायदा नी होऊ रये, मान्तर आउर बले बेमार होऊन रली। 27हुन ईशु चो चरचा सुनुन भाती भीड़ ने हुनचो पाटकुती ले ईली आउर हुनचो फटीई के छिंवली, 28कसनबल्लोने हुन बोलते रली, “अगर मय हुनचो फटीई ची के छिंयेन्दे, तेबे चेंगा होयें दें।” 29आउर तुरते हुनचो लऊ जातोर बंद होली, आउर हुन आपलो देंह ने जानली कि मय हुन बेमार ले अच्छा होले से। 30ईशु तुरते आपलो ने जानलो कि मोचो ले सामरत निकरली से, आउर भीड़ ने पाटकुती पलटून भाती पूछलो, “मोचो फटीई के कोन छिंवलो?” 31हुनचो चेलामन हुनचो ले बल्ला, “तुय दक सीस कि भीड़ तुचो उपरे घसर पड़ होय सोत, आउर तुय बोल सीस कि कोन मोके छिंवलो?” 32तेबे हुन हुनके दकतो काजे जोन ऐ काम करू रये, भोंवरक नंजरा लो। 33तेबे हुन बायले लेकी ऐ जानुन भाती कि मोचो कसन भलाई होली से, डरते आउर थरथरते ईली, आउर हुनचो पाँयमन थाने घसरुन भाती हुनचो ले सपाय हाल सत-सत बोलुन दिली। 34हुन हुनचो ले बल्लो, “बेटी, तुचो बिश्वास तुके चेंगा करली से: हरिक ने जा, आउर आपलो ऐ बेमार ले बाचुन रा।” 35हुन ऐ बोलते ची रये कि आराधना घर चो सरदार चो घर ले लोगमन ऐऊन भाती बल्ला, “तुचो बेटी तो मरली, अदायं गुरू के केंव तकलीस देये सीस?” 36जोन गोठ हुनमन बलते रवत, हुनके ईशु असुना करून, आराधना घर चो सरदार ले बल्लो, “नी डर; मात्र बिश्वास संगाव।” 37आउर हुन पतरस आउर याकूब आउर याकूब चो भाई यूहन्ना के छांडुन, दुसर कोनी के आपलो संगे ऐऊक नी दिलो। 38आराधना घर चो सरदार चो घर ने अमरून भाती, हुन लोगमन के खुबे गागतोर आउर चिचयातोर दकलो। 39तेबे हुन भीतरे जाऊन भाती हुनमन ले बल्लो, “तुमी केंव कोलार होयसास आउर गागेसास? लेकी नी मरली से, मान्तर सोये से।” 40हुनमन हुनचो मजाक उड़ाला, मान्तर हुन सपाय के निकराऊन भाती लेकी चो आया-बुआ आउर आपलो संगवारीमन चो संगे भीतरे, जोन थाने लेकी पडु रये, गेलो। 41आउर लेकी चो हाथ धरून भाती हुनचो ले बल्लो, “तलीता कूमी!” जेचो मतलब आय, “हे लेकी, मय तुचो ले बलें सें, उठ!” 42आउर लेकी तुरते उठून भाती हिन्डुक बुलुक मुरयाली; कसनबल्लोने हुन बारा बरक चो रली। ऐ थाने लोग खुबे भक्याला। 43फेर ईशु हुनमन के जनाऊन भाती हुकुम दिलो कि ऐ गोठ कोनी जानुक नी सकोत आउर बल्लो, “ऐके काई खातो काजे दिआस।”
Выбрано:
मरकुस 5: HLBNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Halbi Bible by The Love Fellowship is licensed under Creative Commons Attribution-ShareAlike 4.0 License.
