मत्ती 2
2
ज्योतिषिमन चो पूरब ले ऐतोर
1माहान राजा हेरोदेस चो दिनमन ने जिदलदाय यहूदिया परदेश चो बैतलहम नंगर ने ईशु चो जनम होली, तेबे, बेर उदतो बाटले कितलो गिआनी यरूशलेम नंगर ने ऐऊन भाती पचारूक मुरयाला, 2“यहूदिमन चो राजा जेचो जनम होली से, काहां आसे? कसनबल्लोने आमीमन बेर उदानी बाटे हुनचो तारा दकलु से आउर हुनके लोऊन भाती जुहार करूक ईलुसे।” 3ऐ सुनुन भाती माहान राजा हेरोदेस आउर हुनचो संगे सपाय यरूशलेम नंगर चो लोग चिन्ता ने पड़ला। 4आउर राजा हेरोदेस लोगमन चो सपाय परधान याजकमन आउर शास्तरीमन के रूंड़ा करून हुनमन ले पचारलो, “मसीह चो जनम काहां होतोर आय?” 5हुनमन राजा हेरोदेस ले बल्ला, “यहूदिया परदेश चो बैतलहम नंगर ने; कसनबल्लोने मीका अगम गिआनी चो दुवारा असन लिका गेलीसे:
6“हे बैतलहम, यहूदा नंगर चो लोग, तुय कोनी बले रीति ले यहूदा परदेश चो अधिकारीमन ने सपाय ले नानी नुआस; कसनबल्लोने तुचो थानले गोटक अधिपति निकरेदे, जोन मोचो परजा इस्राएल चो चरेया बनेदे।” 7तेबे माहान राजा हेरोदेस गिआनीमन के खुसराय ले हाग देऊन भाती हुनमन ले पचारलो, कि तारा ठीक कोन समया दका देऊ रये। 8आउर माहान राजा हेरोदेस ऐ बोलुन भाती हुनमन के बैतलहम पठालो, “जाऊन भाती हुन पिला चो बारे ने ठीक-ठीक पता करा आउर जिदलदाय हुन मिरेदे तेबे मोके खबर दिआस बल्ले मय बले ऐऊन भाती हुनके जुहार करेंदे।” 9हुनमन राजा चो गोठ सुनुन भाती जाते गेला, आउर जोन तारा हुनमन बेर उदानी ने दकु रला, हुन हुनमन चो पुरे-पुरे गेली; आउर जोन थाने पिला रये, हुन जगा चो उपरे अमरून भाती ठेबली। 10हुन तारा के दकुन भाती हुनमन खुबे हरिक होला। 11आउर हुन घर ने अमरून भाती हुन पिला के हुनचो आया मरियम चो संगे दकला, आउर पाटा पडुन भाती पिला के जुहार करला, आउर आपलो-आपलो थयला खोलुन भाती हुनके सोना, आउर लोबान, आउर बास बिती तेल चो भेट चेगाला। 12आउर सपना ने ऐ चेतावनी पाऊन भाती कि राजा हेरोदेस चो लगे फेर नी जाहा, हुनमन दुसर बाटले होऊन भाती आपलो देश ने जाते गेला।
मिस्र देश ने परातोर
13हुनमन चो गेलोर पाचे, माहापुरू चो गोटक दूत सपना ने यूसुफ के दका देऊन भाती बल्लो, “उठ! हुन पिला के आउर हुनचो आया के धरून भाती मिस्र देश ने पराव; आउर जिदलदाय ले मय तुके नी बले, हुदलदाय ले हुताय रा; कसनबल्लोने राजा हेरोदेस ऐ पिला के डगरातो थाने आसे कि ऐके मराऊन देओ।” 14तेबे यूसुफ राती ची बेरा उठून भाती पिला आउर हुनचो आया के धरून भाती मिस्र ने जाते गेलो। 15आउर राजा हेरोदेस चो मरोत ले हुताय रलो। ऐईकाजे कि हुन बचन जोन परबु होशे अगम गिआनी चो दुवारा बोलुन रलो पुरा होओ “मय आपलो बेटा के मिस्र ले हाग दिले।”
राजा हेरोदेस चो बाटले कोंवरो पिलामन के मरातोर
16जिदलदाय राजा हेरोदेस ऐ दकलो, कि गिआनीमन हुनचो संगे धोका करला से, तेबे हुन अड़बड़ रीस होलो, आउर लोगमन के पटाऊन भाती गिआनीमन ले ठीक-ठीक पचारलो समया चो अनुसार बैतलहम आउर हुनचो लगे-लगे चो जगामन चो सपाय लेकामन के जोन दुय बरक चो नाहले हुनचो ले नानी रवत, मराऊन दिलो। 17तेबे जोन बचन यरमिया अगम गिआनी चो दुवारा बोला जाऊ रये, हुन पुरा होली
18“रामाह ने गोटक करलानी सुना दिली,
गागतोर आउर बड़े बिलाप,
राहेल आपलो पिलामन चो काजे गागते रली;
आउर ओगाय होऊक नी चाहते रली, कसनबल्लोने हुनमन अदायं जीव निआत।”
मिस्र देश ले बाहाड़तोर
19राजा हेरोदेस चो मरलोर पाचे, परबु चो दूत मिस्र ने यूसुफ के सपना ने दका देऊन भाती बल्लो, 20“उठ, लेका आउर हुनचो आया के धरून भाती इस्राएल चो देश ने जा; कसनबल्लोने राजा हेरोदेस आउर जोन लोग लेका चो जीव धरूक चाहते रवत, हुनमन मरला।” 21यूसुफ उठलो, आउर लेका आउर हुनचो आया के संगे धरून भाती इस्राएल चो देश ने ईलो। 22मान्तर ऐ सुनुन भाती कि अरखिलाउस आपलो बुआ हेरोदेस चो जगा यहूदिया परदेश ने राज करे से, हुता जातो काजे डरलो; आउर सपना ने माहापुरू ले चेतावनी पाऊन भाती गलील परदेश ने गेलो। 23आउर नासरत नाव चो नंगर ने जाऊन बसलो, बल्ले हुन बचन पुरा होओ, जोन खुबे पयले अगम गिआनीमन चो दुवारा बोला जाऊ रये: “हुन नासरी बलाया जायदे।”
Выбрано:
मत्ती 2: HLBNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Halbi Bible by The Love Fellowship is licensed under Creative Commons Attribution-ShareAlike 4.0 License.
