Evvan 2

Näimm Kaanast

1Koolm peeiʹv ǩeeʹjjest leäi näimm Galilea Kaanast. Isõõzz jeäʹnn še leäi tåʹben. 2Isõs da suu mättʼtõspäärna še leʹjje koččum naimmu. 3Ko vijnn puuđi, ceälkk Isõõzz jeäʹnn suʹnne: «Seeʹst iʹlla teäʹnab vijnn.» 4Isõs ceälkk jeännses: «Mâiʹd ton täättak muʹst, kaav? Muu äiʹǧǧ iʹlla veâl puättam.» 5Jeäʹnnes ceälkk pävvrõõžžjid: «Tuejjeʹǩed puk, mâiʹd son päkk.»

6Tåʹben leʹjje kutt čueʹđ lettar ǩieʹssi ǩeäʹdǧǧleeʹtt, koiʹd juudlažneeʹǩǩ vueʹjjez mieʹldd âʹnne põõzzõõttâm diõtt. 7Isõs cieʹlǩi pävvrõõžžjid: «Teuʹdded liiʹttid čaaʹʒʒin.» Sij tiuʹdde tõiʹd ruõbdi tässa. 8Isõs cieʹlǩi siʹjjid: «Kuäivvad ååʹn täʹst da viikkâd kuuččra.» Di sij viʹǩǩe. 9Kuuččâr njõõʹddi čääʹʒʒ, kååʹtt leäi mottjam viin smakkân. Pävvrõõžži, kook leʹjje čääʹʒʒ kuäivvam, tiõʹtte, koʹst vijnn leäi puättam, leša kuuččâr ij teâttam. Tõn diõtt son kååččai vuõddâm da cieʹlǩi: 10«Juâkksaž oudd kuõʹssid vuõššân šiõǥǥ viin, da mâŋŋa, ko sij liâ vuäivvõõttâm, eman hueʹnab, leša ton leäk šeäšttam šiõǥǥ viin mââimõssân.»

11Tän vuõssmõs õõmâstuâjas Isõs tuejjii Galilea Kaanast da čõõđti čuõvvâdvuõđâs, da suu mättʼtõspäärna oskku suu.

12Mâŋŋa tõʹst Isõs mõõni vuâlas Kapernauʹmme, son da suu jeäʹnnes, viilljâs da Suu mättʼtõspäärna; tåʹben jiâ jaukkâm kâʹll peeiʹv.

Isõs puuʹttast ceerkav

13Tâʹl juudlažniiʹǩǩi eʹjjpeiʹvv leäi ââlda. Isõs mõõni pââjas Jerusaaʹlma. 14Nuʹt Son kaauni teʹmpplest åummaid, kook leʹjje kaaupšeʹmmen vuâusaid, saauʒid da looʹddid, da teäʹǧǧvaajteeʹjid åårrmen påʹrddpeällsin. 15Son raaji nuõʹrin rääiʹp, vuâjti åålǥas teʹmpplest siʹjjid pukid saauʒeezvuiʹm, vuâuseezvuiʹm, seksti låʹnsteeʹji tieʹǧǧid jânnma, oiʹǧǧii sij pooʹrdid kåmmad. 16Son cieʹlǩi looʹddi kaaupšeeʹjid: «Viikkâd lååddaid åålǥas, jeäʹlled rajju muu Eeʹjj põõrtâst kauppsââʹj.»

17Tâʹl Suu mättʼtõspäärna muʹštte, što lij ǩeeʹrjtum: «Pueʹššvuõtt tuu põõrtad peäʹlest peʹcclâtt muu.»

18Juudlažneeʹǩǩ kõʹčče Isõõzzâst: «Måkam miârk čuäʹjtak miʹjjid tuõđštõssân tõʹst, što tuʹst lij vuõiggâdvuõtt tuejjeed nääiʹt?» 19Isõs cieʹlǩi siʹjjid: «Pieʹđjteʹǩed tän teʹmppel, mon tõn kolmmân peeiʹvest ciâggtam oʹđđest.» 20Tâʹl juudlažneeʹǩǩ cieʹlǩǩe: «Tän teʹmppel tuejjumuš piiʹšti meeʹst nelljlokutt eeʹǩǩed, da ton ciâggteʹččiǩ tõn kolmmân peeiʹvest oʹđđest?» 21Leša Isõs nõõmti teʹmpplen jiijjâs rååʹppes. 22Ko Son mårrni jaaʹmmjest, mättʼtõspäärna muʹštte Suu ceäʹlǩǩem nääiʹt. Sij oskku Pââʹss ǩeeʹrj ǩeeʹrjtõõzzid da Isõõzz jiijjâs sänna.

Isõs tåbdd pukid

23Ko Isõs leäi Jerusaaʹlmest eʹjjpeeiʹv ääiʹj, määŋgas ko vuõiʹnne suu, oskku suu õõmâstuâjaid, koiʹd son tuejjii. 24Isõs ij sami veârram jiijjâs siʹjjid, ko toobdi siʹjjid pukid 25Isõs ij taarbšam ni ǩeän tuõđštõõzz oummust. Tõn son tiõʹđi jiõčč, mii ooumaž lij.

Выбрано:

Evvan 2: SKOLT

Выделить

Копировать