मत्ती 3
3
बप्तीस्मा तेर्केन युहन्नाइ लेःङ्गो
(मर्कुस १:१-८; लुका ३:१-१८; युहन्ना १:१९-२८)
1माःङ्बुरा लोः तीङ्ला बप्तीस्मा तेर्केन युहन्ना यहुदीयाइ उजाड स्थानला ओःङ्सी, ओःले एःन्डु लाःतेर लेःङ्गो फेल्गाला स्युःसी, 2“स्याबा पेःदी राःङ राःङगीइ लाःयोला पोःर्तो, चीलेलाःना नाःम्खालीङगीइ क्याःल्खाप थामालारा ओःङ्सीःङ्दी एः।” 3चीलेलाःना कोन्ज्योइ लेःङ्गो तेर्केन यशैयाइयाङ युहन्नाइ बारेला तोःङ्लारा एःन्डु लाःती एःके,
“उजाड ठाउँला मेःराङ चीगकीइ छ्योम्बो के तेङ्दी एःन्डु लाःतेरा एः,
‘प्रभु ओःङेन लाःम तयार जोदो,
खुङ डोगेन लाःमक्या थेका जोदो।’#यशैया ४०:३”
4युहन्नाइ ऊँटकीइ पुलाःम्ले थाक्योक केःला केःङ्गुके, ओःले खुङगीइ केपाला कोबाइ कारा चीङ्गुके, ओःले खुङगीइ साःप्च्यादी पेबाक ओःले रीःइ ङार्मु साःउके। 5यरुशलेम ओःले थाम्जेर यहुदीया, ओःले यर्दन लुःङ्बाइ छुर्केन फार्केनगीइ इलाकाइ थाम्जेर मीःक्या खुङसाःला काःल्सी, 6ओःले राःङ राःङगीइ लाःयो ङीःन्दी पोःर्सी ओःले यर्दन लुःङ्बाला युहन्नालाःम्ले खुङक्याइ बप्तीस्मा लेःङ्सी।
7फारीसी रा सदुकी लाःकेन ङीथाल ताःक्पा छोबाइ माःङ्बुरा मीःक्याङ बप्तीस्मा लेःङ्जेला युहन्नासाःला ओःङ्सी। खुङक्याला ओःङ्क्योक थोङ्दी युहन्नाइ एःन्डु लाःसी, “ए प्रुःलगीइ छार्क्युफुर्क्युक्या, कोन्ज्योइ पेःजे छोल्क्योक ठीमलाःम्ले थार्खुए लाःती ख्याक्याला सुइ लोप्पा? 8ख्याक्याइ राःङ राःङगीइ लाःयो पोःर्ती स्याबा पेःदी कोन्ज्योछ्योले लोःक्योक तेङ्जेला याःबु लेःगा पेःगेन पेःदो। 9ख्याक्या अब्राहामगीइ छार्क्युफुर्क्युक्या इःङे लाःती ख्याक्या लाःयोलाःम्ले स्योर्खुउए लाःती टेःम्बा मासाल। ङाः ख्याक्याला लाःके, कोन्ज्योइ अब्राहामगीइ छार्क्युफुर्क्युक्यानी दी तोःक्यालाःम्लेङ केच्युखुउए। 10तोःङ्बोइ डाकला तारीइ फोजे छोल्सीःङ्दी एः। याःबु ब्रुम्दो मेःकोङेन्दी थाम्जेर तोःङ्बोक्याला तुप्ती मेःला क्युर्केन एः। 11ख्याक्याइ राःङ राःङगीइ स्याबा पेःदी लाःयो पोःर्क्योक इःङे लाःती तेङ्जेला ङाः ख्याक्याला छ्युइ बप्तीस्मा तेर्तेरा एः, इःनाङ ङालेङ छ्योम्बो मेःराङ चीग ओःङ्देरा एः। ङाः नी खुङगीइदी लेखाम खुर्चेला रीःक्पु म्याः। खुङगीइ ख्याक्याला चाङ्मा ला रा मेःइ बप्तीस्मा तेर्केन एः। 12खुङगीइ डु टाप्चेला लोमा लाःक्पाला लेङ्सीःङ्दी एः। डु टाप्ती सीःङ्मीःजीक न्याःदी योःङला ज्यागेन एः, ओःले पोलादी नाःमाङ मीसीगेन मेःला सातेर्केन एः।”
येशुइ बप्तीस्मा लेःङ्क्योक
(मर्कुस १:९-११; लुका ३:२१-२२; युहन्ना १:३२-३४)
13ओः तेःकासु येशु गालीललाःम्ले ओःङ्सी ओःले युहन्नालाःम्ले बप्तीस्मा लेङ्जेला यर्दन लुःङ्बाला काःल्सी। 14इःनाङ युहन्नाइ एःन्डु लाःती काजे छोल्सी, “ङाःलाका ख्याइ बप्तीस्मा तेर्कोःन्दी, ओःले ख्या चीले ङाःसाःला का ओःङ्क्योक?” 15इःनाङ येशुइ खुङला लाःसी, “ताःसे एःन्डुबारा ओःङ्जे तेर। चीलेलाःना कोन्ज्योला सेम थेक्योक ताम एःन्डुलेरा उःक्याइ थाम्जेर छाङ्च्युकोःउए।” ओः सोङ्गारा, युहन्नाइ खुङला बप्तीस्मा तेर्चेला ङीःन्सी।
16येशुइ बप्तीस्मा लेःङ्लुङम्याःपा खुङ छ्यु नाःङ्ले याःरला थेङ्सी। ओःले नाःम्खालीङ फ्यासी, ओःले चाङ्मा ला तुःकुःरकुर च्योःङ्रारा माःर्ला ओःङ्देरा पेःक्योक ओःले खुङखाला तेःक्योक थोङ्सी। 17ओःले ओः तेःकासुरा नाःम्खालीङले एःन्डुबा के कोःसी, “दीखो ङाःइ च्याःम्बु पेःक्योक पुः इःङे, खुङ ङीमु ङाः माःङ्बुरा केःदाङ काल्दी एः।”
Выбрано:
मत्ती 3: SYW
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2024 (Active), Wycliffe Bible Translators, Inc. All rights reserved.
