Genesi 3
3
Adaʌ̃ba dji wẽrã bid̶a Ãcõrẽ ĩjã amaped̶ad̶a
1Jũma Ãcõrẽba ocuad̶a animarã cãyãbara damada crĩcha cawaara b̶asia djãrã cũrũgai carea. Maʌ̃ damaba wẽrãa jarasia:
–¿Ãcõrẽba wãrãda jarasica jũma naʌ̃ néud̶e b̶ea nejõra bãrãba jõcara panʌda?–
2Wẽrãba panusia:
–Mãwãẽ́a. Naʌ̃ néud̶ebema nejõra daiba jõnida panʌa. 3Baribʌrʌ bacuru néu ẽsi nũmʌnebemada Ãcõrẽba jarasia: “Jãʌ̃gʌ nejõra jõrãnadua idjab̶a jidarãnadua. Mãwã od̶ibʌrʌ beud̶ia.”–
4Maʌ̃ne damaba wẽrãa jarasia:
–Bãrãra beud̶aẽ́a. 5Ãtebʌrʌ maʌ̃ nejõ jõbʌda ewarid̶e bãrãba ab̶ed̶a jũma cawad̶ia biada, cadjirua sid̶a. Mãwã Ãcõrẽ quĩrãca crĩcha cawa panania. Maʌ̃gʌra idjia cawa b̶ʌa, maʌ̃ carea bãrãa jõbi ama b̶ʌa.–
6Maʌ̃ne wẽrãba unusia bacuru néu ẽsi nũmʌ nejõra biya purea jira b̶ʌda idjab̶a jõi biya quiruda. Ara maʌ̃da jõ quĩrĩãsia crĩcha cawa b̶ai carea. Maʌ̃be b̶a edaped̶a jõsia. Jõped̶a dji quimaa diasia. Maʌ̃ne idjia bid̶a jõsia. 7Ara maʌ̃da ãdjia umena ab̶ed̶a cawasid̶aa ãdjira ãcad̶a panʌda.#3:7. Cawasid̶aa. Hebreo bed̶ead̶e b̶ʌ́ b̶ʌa: “Dau uruasid̶aa.” Maʌ̃ carea higojõ queduada ĩgud̶aped̶a jʌ̃sid̶aa.
8Quewara cũrãdrʌbʌrʌd̶e Ãcõrẽra néu ẽjũãne nĩbasia. Adaʌ̃ba dji wẽrã bid̶a maʌ̃ ũrĩsid̶ad̶e néud̶e mĩrũsid̶aa. 9Maʌ̃ bẽrã Ãcõrẽba Adaʌ̃ra nãwã trʌ̃sia:
–¿Bʌra sãma b̶ʌ?–
10Adaʌ̃ba panusia:
–Bʌ zebʌrʌda ũrĩsid̶e ne wayaaba mʌ̃ra mĩrũsia ãcad̶a b̶ʌ bẽrã.–
11Maʌ̃ne Ãcõrẽba iwid̶isia:
–¿Caiba jarasi bʌra ãcad̶a b̶ʌda? ¿Bʌa jõsica mʌ̃a jõrãduad̶a nejõra?–
12Adaʌ̃ba panusia:
–Bʌa mʌ̃́a wẽrã diad̶aba jõbisia.–
13Maʌ̃ bẽrã Ãcõrẽba wẽrãa iwid̶isia:
–¿Bʌa cãrẽ cãrẽã jãwã osi?–
Wẽrãba panusia:
–Damaba mʌ̃ra cũrũgasia. Maʌ̃ bẽrã mʌ̃a jõsia.–
14Maʌ̃ bẽrã Ãcõrẽba damara nãwã biẽ́ jara b̶ʌsia:
Bʌa jãwã cũrũgad̶a bẽrã, mʌ̃a bʌra daupẽbada animarã idjab̶a mẽãbema animarã cãyãbara biẽ́ara b̶ʌya.
Nãwã b̶aya: id̶iba ʌ̃taa bʌdji jãne nĩbaya idjab̶a ewariza bʌ itera egoro pora caita b̶aya ab̶a beubʌrʌd̶aa.#3:14. Bʌ itera egoro pora caita b̶aya. Hebreo bed̶ead̶e b̶ʌ́ b̶ʌa: “Egoro porada co nĩbaya.”
15Idjab̶a mʌ̃a bʌra wẽrã ume dji quĩrũda b̶ʌya. Id̶iba ʌ̃taa bʌ warrara wẽrã warra ume dji quĩrũ baya.
Bʌa wẽrã warrara jĩrũgarronane caya. Baribʌrʌ idjia bʌ borora berradʌgaya.#3:15. Romano 16:20; Apocalipsi 12:17.
16Maʌ̃ne Ãcõrẽba wẽrãa jarasia:
Bʌ b̶iogoa b̶ʌd̶e mʌ̃a bʌra bia mĩgabiya. Warra tobʌrʌd̶e puad̶eba toya.
Mãwã bia mĩga b̶aimĩna bʌ quima ume b̶a quĩrĩã b̶aya,#3:16. Bʌ quima ume b̶a quĩrĩã b̶aya. Maʌ̃ra hebreo bed̶ead̶e ebud̶a b̶ʌẽ́a. Ʌ̃cʌrʌmaarã jara b̶ʌa “bʌ quimara bʌ jʌwaed̶a erob̶a quĩrĩã b̶aya.” baribʌrʌ idjia bʌra idji jʌwaed̶a erob̶aya.
17-18Maʌ̃ne Ãcõrẽba umaquĩrãa jarasia:
Mʌ̃a bʌ́a jarasia jãʌ̃ nejõra jõrãmãrẽã. Mãwãmĩna bʌ wẽrã bed̶eada ĩjãsia.
Maʌ̃ bẽrã mʌ̃a naʌ̃ ẽjũãra jũma biẽ́ b̶ʌya. Ʌrʌda, jũĩchichi sid̶a odjacuaya.
Bʌra bio bia mĩga b̶aya bʌ néud̶ebemada coi carea. Idjab̶a bʌa chiruada co b̶aya.
19Ne coi carea traja b̶ʌd̶e bʌ dratud̶e jʌa zowua nũmaya ab̶a beubʌrʌd̶aa.
Bʌra egoro porad̶ebemaa. Maʌ̃ carea bʌra wayacusa egoro pora baya.
20Adaʌ̃ba idji wẽrãra trʌ̃ b̶ʌsia Eva, idjira jũma dadji zocai b̶ea papa bẽrã.#3:20. Hebreo bed̶ead̶e Eva trʌ̃ra zocai b̶ʌad̶a abʌrʌ quĩrãca jĩguabaria. 21Maʌ̃be Ãcõrẽba animarã ed̶ebema wuada oped̶a ãdjía jʌ̃bisia. 22Mãwãnacarea Ãcõrẽba jarasia:
–Naʌ̃ ẽberãba jãʌ̃ nejõra jõna bẽrã biada cadjirua sid̶a jũma cawa b̶ʌa. Mãwã dadji quĩrãca b̶esia. Maʌ̃ bẽrã zocai b̶ai diabari nejõda idjía idu jõbid̶aẽ́a. Maʌ̃da jõsira beuca baya.–
23Ara maʌ̃da Ãcõrẽba ẽberãra Edeʌ̃ néu ẽjũãnebemada ãyã jʌretasia ẽjũã o b̶amãrẽã. Ãcõrẽba idjira egorod̶eba osia. Maʌ̃ bẽrã idjira b̶ʌsia egorod̶e ne u b̶amãrẽã. 24Ãcõrẽba ẽberãra ãyã jʌretaped̶a Edeʌ̃ néu ẽjũã ʌ̃mãdau odjabariare bajãnebema nezocarã i bara panʌda b̶ʌsia. Idjab̶a b̶ʌsia djõbada neco urua b̶ʌda, idub̶a pʌrrʌga tucua jira b̶ʌda. Maʌ̃gʌrãba zocai b̶ai diabari nejõra waga panesid̶aa ni ab̶aʌba jõrãmãrẽã.
Выбрано:
Genesi 3: emp
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2011, Wycliffe Bible Translators, Inc. All rights reserved.
