Wĭkheegŭn 9

1Ha pāmĭhat oonŭmĭhal ooskedăp’eŭl nĕhkapĕlejĭl tanĭl nĕkapelĭtsŭb’ŭnĭl nĕmekooselĭhtĕ.

2Ha tanĭk wĕtŭkĕhkemoojĭk oohŭkĕk oopabĕhchemawŏl Sāsoosŭl, eetŭmook: N’sakŭmamŭn, wĕn pahtahwĕhkasĭts? wŏŏt ooskedap, kŭsŭna oonekekoo, ootŭle‐nŭme‐koosĭn oonĕhkapĭn?

3Sāsoos asedāmat: Oot ooskedap skat pahtahwĕhkasewĭs’, kŭsŭna oonekekoo: kānookŭloo Nŭkskam ootŭlookāwa’gŭnŭl lemooskĕhtasoo oohŭkĕk.

4N’tachooe‐ŭlook’ ootlookāwagŭnŭl tan pĕtŭkemĭtpŭn, tan kwĕnejĕhkwŏŏk. Ne’baeu’ wĕchkooĭhhak tan toocheu skat wĕn keslookĕkw.

5Tan kwĕne‐heye ooskĭt’kŭmĭkw nel oopŭshakwhĕkŭm ooskĭtkŭmĭkw.

6Kese eetŭk netŭl ŭsoomskwĕ kŭtakŭmeegook, ha ooche’toon kwŏkwloonskw oosŭsookoo ĭkŏŏk, ha oosoonĕhtooŏn nĕkapelejĭl ooseeskook kwŏkwloonskool.

7Ha ootĭhal: Ulĭh’, kŭsegwĕns’ pĕgoodābāāgĕk Seilo’mk, tan kwĕlpewĭktasĭk eetŭmooweu’, Elkeemoot. Netwāje majŭhat ha ŭksŭsegwĕnsoo; toocheu abăjehat, nŭmĭhta.

8Netwāje mowegāmajĭhĭ, ha tanĭk nĕmĭhatpŭnĭk tŭmk ootŭtlepagooŭseelĭn, eetŭmook: Skat ëa’ wŏŏt nŭt tan ābĭt ha pagooŭsĭt?

9Ankwooch eetŭmook: Nŭt nāgŭm. Kŭtŭkĭk etŭmook: Ootŭlgwenâkwsĭn. Nāgŭm eetŭm: Nel nŭt.

10-11Netwāje ootĭhawŏl: Tan‐nŭle kese pantĕhtasoo ŭkseeskool? Nāgŭm asedāmat: Ooskedap lewĭha Sāsoos ookesehal kwŏkwloonskool, ha ŭnsoonāta‐goonā’pŭnĭl n’seeskook, ha n’tehoogoon, ŭlĭ pĕgoodābāāgĕk Seilomk ha kŭsegwĕns’. Toocheu’ n’tŭlehanāāpŭn, n’kŭsegwĕnseepŭn, ha nŭmĭhtaapŭn.

12Nāgŭmow ootehawŏl: Tama ëu nāgŭm? Eetŭm: Skatama n’kŭje’jehaoo.

13Oopĕjĭphawŏl Paloose āooltelĭt tanŭl nĕkapelĭtpŭnĭl.

14Ha atlasemooe‐kesook‐wewoo’pŭn tan toocheu Sāsoos keseha’t kwŏkwloonskool ha pantā’tooŏt’ ooseskool.

15Netwāje Pālooseŭk apch pabĕhchematĭt tan ootŭlĭmsŭnŭmŭlĭn ĕlenŭmĭhtalĭt. Ootĭba: Oopoonĕhla’pŭnĭl kwŏkwloon skool n’seeskook, ha n’kŭsegwĕnseepŭn, ha nŭmĭht’.

16Netwāje ankwŭch Paloo’seŭk etŭmootooŭk: Wŏŏt ooskedap skat oochā’aweu Nŭkskam ĭkŏŏk, eebŭchŭl atlasemooekeesook skat ookŭlnŭmooŭn. Ankwŭch etŭmootooŭk: Tanŭp ootŭlekesātoon net tĕlĭkŭl kenooŏskoodeegŭnŭl ooskedap pahtahwĕhkasooe’nooĭt? Ha sesĕhlootooagŭn egĕhĕ oohŭkāwĭkhooŏk.

17Ootehawŏl apch nĕkabĭlĭtpŭnĭl: Keloo kĕkw ŭktŭleema, eebŭchŭl pantĕhtagoonŭl ŭkseskool? Eetŭm: Asŭgĭntatooĭn.

18Kānookŭloo Lĕsweesŭk skat oolamsŭtŭmoonea oonĕkapelenĕs’ ha oomŭsŭnŭmŭlĭn oonŭmetalĭn, agĭmte wekwemawŏ oonekekoo tan oomŭsŭnŭmŭlĭn oonŭmetalĭn.

19Ha pabĕhchemawŏ eetŭmook: Wŏŏt kelooow’ ŭkwŏŏsooŏ tan eetŭmĕkw n’kapoo’s nĕmeekwoosĭt? Netŭloo’ tan ootŭle‐kesenŭmĭhtan tŭkāch’?

20Oonekekoo ootasedĕmawŏ ha eetŭmook: Nkŭjejĭhtoonĕn’ nookwŏŏsenĕn wŏŏt, ha ŭnkapoopŭn nĕmeekwoosĭt;

21Kānookŭloo tan ootŭle‐kese‐nŭmĭhtan tŭkā’ch skat n’kŭjejetoo’nāwĭn, kŭsŭna wĕn pantehtooŏt ooseskool skat n’kŭjejehawĭn. Nāgŭm kesegoo; pabĕhchemook nāgŭm: nāgŭm kŭloosĭtŭmooāusooch’.

22Yootŭl kŭlooswa’gŭnŭl etŭmooteejĭl oonekekoo, eebŭchŭl oonŭkalawŏ Lĕswees. Eebŭchŭl Lĕsweesŭk ookesloodŭmŭnea tan tĕpŏŏkt wĕn sapagŭnootŭk Sāsoos Oonewĕskooĭn, oochenootĕpha’p hemeāwĭgwamŭk.

23Netwāje oonekekoo eetŭmook: Nāgŭm kesegoo, nāgŭm pabĕhchemŏŏk.

24Netwāje net nesāwā wĭhkwematĭt ooskedapeŭl tanĭl nĕhkapĭlĭtpŭnĭl, ootehawŏl: Nŭkskam mela’n ŭkchetŭme‐tŭham‐koosooagun: n’kŭjejĭhtoonā’n wŏŏt ooskedap lakŭmĭksooenooweu.

25Netwāje asedāmat, eetŭm: Skat n’kŭjejehaoo ootŭlakŭmĭksooenooĭn. Pĕskoonŭloo kĕjejĭhtoo: nel nĕkapeepŭn; kānookŭloo tŭkāch’ nŭmĭht.

26Toocheu apch ootchawŏl: Tan k’tŭlĕhloogoonĕs? tan ŭktŭle‐kesepantĕh‐tagoonĕs’ ŭkseeskool?

27Asedāmat, ootĭha: Kes kese yŭhoolneapŭn, ha skat k’nootŭmooteebakoopŭn. Tanŭp apch k’tŭlejĭksĕtŭmŭn’ea? k’pawŏtŭmŭn’ea k’tŭkĕhkĭmkoo’nea?

28Unootalmema’nea ha eetŭmook: Kel ŭktŭkĕhkeemŭkw; kānookŭloo Mooes n’tŭkĕhkĭmkoon neloon?

29Nkŭjejĭhtoonān Nŭkskam ooskoocma’pŭnĭl Mooesŭl; kānookŭloo wŏŏt ooskedap skat n’kŭjejehawĭn tan tĕt ĕtlāowĭt, (wĕchāyawĭt).

30Nŭt ooskedap asedāmat, eetŭm: Asŭgenagwŏŏt skat kelooow’ ŭkŭjĭjetoo’nea tan wĕchāyawĭt, ha n’pantĕhtagoonŭl n’seeskool.

31Kŭjeje’toonā’n Nŭkskam skat oojĭksŭtooawe lakŭmĭksooenoo; kānookŭloo tan wĕn wekooaje‐wĭhwenooamat Nŭkskamŭl, ha ŭlĕhtagĕt ooledŭhadŭmooagŭn, nāgŭm Nŭkskam oojĭksŭtooŏl.

32Tanāk’ kesetasĭkpŭn ooskĭtkŭmĭkw māch mĕskw noodŭmawŭn wĕn pantĕdooŏn wĕn ooseeskool tanĭl net ĕlenŭmeekwŏŏseelĭt oonĕhkapeelĭn.

33Skat nāgŭm oochehakoosŭbŭn Nŭkskamooĭkŏŏk, skatŭp kĕkwsā’ keselĕhtagawŭp.

34Nāgŭmow ootasedāmawŏl, ootĭhawŏl. Kel nĕkaoochenŭmekoose‐yŭnpŭn lakŭmĭksooagŭn ĭkŏŏk, ha ŭktŭkĕhkemeepŭn neloon? Toocheu oonoodeâka’neăl.

35Sāsoos noodŭmat oonoodeâka’nea’l, ha mĕskooŏt, ootĭhal: Koolamsŭt’ŭmŭn Nŭkskam Ookwŏŏsŭl oohŭkĕk?

36Ooskedap asedāmat, eetŭm: Wĕn ëa’ nāgŭm, Sakŭm, noolamsŭtŭmŭn oohŭkĕk?

37Sasoos ootĭhal: K’nŭmehapŭn, ha nŭt nāgŭm wĕskooeemŭsk.

38Ha eetŭm: N’sakŭmam, noolamsŭtŭmŭn: Ha wĭhwenooamal.

39Ha Sāsoos eetŭm: Utploodŭmooagŭn wĕje‐pŭkŭchehae ooskĭtkŭmĭkw, wĕlaman tanĭk skat nĕmĭhtatekwĭk oonŭmĭhta’nea; ha tanĭk nĕmĭhtateejĭk oonŭka‐peegwĕhtasoolte’nea.

40Ha ankwŭch Palooseŭk tanĭk wejāooajĭk noodŭmŭn’eăl yootŭl kŭlooswa’gŭnŭl, ha ootĭhawŏl: Neloon nŭ nĕhkapoolteepŭn?

41Sāsoos ootĭha: N’kapoolteā’kw, skatŭp lakŭmĭksooagŭn ŭktëulteuneal. Kānookŭloo tŭkāch k’tetŭmooteepa nŭmĭhtateepŭn. Netwāje ŭktŭlkŭmĭk‐sooagŭnoowŏl ŭngĕsĭk.

Выбрано:

Wĭkheegŭn 9: PQM1870

Выделить

Копировать