मत्ती 4

सैतान हर ईसू कर परीछा लेथे

(मरकुस 1:12-13; लूका 4:1-13)

1तेकर पबितर आत्मा हर, ईसू ला सुनसान जघा में जाए कर डगर देखाईस कि सैतान कर द्वारा ओकर परीछा होए। 2ईसू हर चालीस दिन अऊ चालीस राएत उपास रहीस, तेकर पाछू ओके भूख लागीस। 3तब परीछा लेवईया सैतान हर ओकर ठांवें आए के कहीस, “अगर तंए परमेस्वर कर बेटा लागस, त हूकुम दे कि ए पखना मन रोटी बएन जाए।”

4बकिन ईसू हर जवाब देहीस, “परमेस्वर कर किताब में लिखल हवे,

मईनसे हर सिरीप रोटीच खाए के नई जीए,

बकिन ओ सबेच बचन ले जीथे, जेहर परमेस्वर कर मूंह ले निकलथे।”

5तेकर सैतान हर ईसू ला पबितर सहर यरूसलेम में ले गईस अऊ ओके मंदिर कर सबले उपरे टीप में ठढ़वाईस, अऊ ओके ला कहीस, 6“अगर तंए परमेस्वर कर बेटा लागस, त इहां ले खालहे तरेक दे, काबरकि परमेस्वर कर किताब में लिखल हवे:

‘परमेस्वर हर तोर बारे में अपन

दूत मन ला हुकुम देही,

अऊ ओमन तोके ला अपन हाथ में उठाए लेहीं,

तेमेकि तोर गोड़ ला पखना ले ठोकर झईन लागे।’”

7त ईसू हर ओके कहीस, “एहूच कस लिखल हवे कि तंए परभू, अपन परमेस्वर कर परीछा झईन कर।”

8फेर सैतान हर ओके एगोट ढेरेच ऊंच पहार में ले गईस अऊ ओके संसार कर सबेच राएज पाठ अऊ ओकर सोभा ला देखाए के कहीस, 9“अगर तंए गोड़े गिर के मोर पांव परबे, त मंए तोके ला ए सब जाएत ला दे देहूं।” 10तेकर ईसू हर ओके ला कहीस, “ए सैतान मोर जग ले दुरीहां भाएग जा, काबरकि लिखल हवे,

तंए परभू अपन परमेस्वर कर अराधना कर

अऊ सिरीप ओकरे सेवा कर।”

11तेकर सैतान हर ओकर जग ले भाएग गईस अऊ सरगदूत मन आए के ओकर सेवा करे लागीन।

ईसू हर गलील में परचार करे बर सुरू करथे

(मरकुस 1:14-15; लूका 4:14-15,31)

12जब ईसू हर ए गोएठ ला सुनीस कि यूहन्ना ला जेहल में डाएल देहीन हवें, त ओहर गलील जिला में चएल देहीस। 13ओहर नासरत ला छोंएड़ देहिस अऊ कफरनहूम सहर में जाए के रहे लागीस, ए सहर हर जबूलून अऊ नपताली देस कर इलाका में बड़खा दह कर धरी में हवे। 14एहर एकर बर होईस, तेमेकि यसायाह अगमजानी कर द्वारा, कहल बात हर पूरा होए जाए:

15“जबूलून कर इलाका अऊ नपताली कर इलाका,

बड़खा दह कती जाए कर डगर में,

एरदन नदी कर ओ पार,

गैर यहूदी मन कर गलील जिला

16जे मईनसे मन अंधार में रहत रहीन,

ओमन ढेरेच बड़खा इंजोर ला देखीन,

अऊ जेमन मिरतु कर छांए कर देस में रहत रहीन,

ओमन कर उपरे इंजोर चमकीस।”

17ओही घनी ले ईसू एकस परचार करे लागीस, “तुमन अपन पाप ले पछताप करा, काबरकि सरग कर राएज हर ढेरेच ठांवे आए गईसे।”

ईसू हर पहिलो चेला मन ला बलाथे

(मरकुस 1:16-20; लूका 5:1-11; यूहन्ना 1:35-42)

18जब ईसू हर गलील कर बड़खा दह कर धरी में रेंगत रहीस, त ओहर दुई झन भाई मन ला देखीस, ओमन कर नांव समोन जेला पतरस कहल जाथे अऊ ओकर भाई अंदरियास रहीस। ए दुनों भाई मन बड़खा दह में जाल डालत रहीन, काबरकि ओमन मछुवारा रहीन। 19ईसू हर ओमन ला कहीस, “मोर पाछू आवा, मंए तुमन ला मछरी ला नहीं, बकिन मईनसे मन ला मोर जग लनोईया बनाहूं।” 20त ओमन तुरतेंच जाल मन ला छोंएड़ के, ओकर पाछू होए लेहीन।

21उहां ले आगू जाए कर पाछू, ईसू हर दुई झन अऊ भाई मन ला देखीस; याकूब अऊ ओकर भाई यूहन्ना ला, जेमन जबदी कर बेटा रहीन। ओमन अपन दाऊ जबदी कर संगे डोंगा में अपन जाल मन ला सुधारत रहीन। ईसू हर ओमन ला बलाईस। 22त ओमन तुरतेंच डोंगा अऊ अपन दाऊ ला छोंएड़ के, ओकर पाछू होए लेहीन।

ईसू हर बेमरिहा मन ला चंगा करथे

(लूका 6:17-19)

23ईसू हर सबेच गलील जिला में जाए के, यहूदी मन कर धरम सभा कर घर मन में उपदेस देहीस अऊ परमेस्वर कर राएज कर सुघर खभेर कर परचार करीस अऊ मईनसे मन कर सब मधे कर रोग अऊ बेमारी ला चंगा करीस। 24तेकर ले ईसू कर खभेर हर सबेच सीरिया देस में फईल गईस अऊ मईनसे मन रोगीया मन ला, जेमन कईयो मधे कर बेमारी अऊ दुख में परे रहीन अऊ जेमन ला दूस्ट आत्मा धरे रहीस अऊ मिरगी मारत रहीस अऊ लकवा कर बेमारी रहीस, ओ सब झन ला ओकर जग लानीन अऊ ओमन ला ईसू हर चंगा करीस। 25गलील जिला कर दस सहर (दिकापुलीस), यरूसलेम, एहूदिया अऊ एरदन नदी कर ओ पार कर मईनसे मन कर, एगोट बड़खा भीड़ हर ओकर पाछू होए लेहीस।

Выбрано:

मत्ती 4: SGJ

Выделить

Копировать