मत्ती 1

ईसू मसीह कर खानदान

(लूका 3:23-38)

1एहर ईसू जेहर मसीह लागे ओकर खानदान हवे, ईसू हर राजा दाऊद कर पीढ़ी कर रहीस अऊ राजा दाऊद हर अबराहम कर पीढ़ी कर रहीस।

2अबराहम हर इसहाक कर दाऊ रहीस, इसहाक हर याकूब कर दाऊ रहीस, याकूब हर यहूदा अऊ ओकर भाई मन कर दाऊ रहीस, 3यहूदा हर फिरिस अऊ जेरह कर दाऊ रहीस, ओमन कर दाई कर नांव तमार रहीस, फिरिस हर हिसतोरोन कर दाऊ रहीस अऊ हिसतोरोन हर एराम कर दाऊ रहीस। 4एराम हर अमीनादाब कर दाऊ रहीस, अमीनादाब हर नहसोन कर दाऊ रहीस अऊ नहसोन हर सलमोन कर दाऊ रहीस, 5सलमोन हर बोअज कर दाऊ रहीस, बोअज कर दाई राहाब रहीस, बोअज हर ओबेद कर दाऊ रहीस अऊ ओबेद कर दाई कर नांव रुत रहीस, ओबेद हर ईसे कर दाऊ रहीस, 6ईसे हर राजा दाऊद कर दाऊ रहीस।

दाऊद हर सुलेमान कर दाऊ रहीस, सुलेमान हर ओ महतारी ले जनमीस; जेहर आगू ऊरियाह कर परानी रहीस, 7सुलेमान हर रहबाम कर दाऊ रहीस, रहबाम हर अबियाह कर दाऊ रहीस अऊ अबियाह हर आसा कर दाऊ रहीस, 8आसा हर यहोसापात कर दाऊ रहीस, यहोसापात हर योराम कर दाऊ रहीस, अऊ योराम हर उजियाह कर दाऊ रहीस, 9उजियाह हर योताम कर दाऊ रहीस, योताम हर आहाज कर दाऊ रहीस अऊ आहाज हर हिजिकियाह कर दाऊ रहीस, 10हिजिकियाह हर मनससे कर दाऊ रहीस, मनससे हर आमोन कर दाऊ रहीस, अऊ आमोन हर योसियाह कर दाऊ रहीस, 11अऊ इसराएली मन बंधुवा होए के बाबूल देस में जाए कर जुआर यकुनयाह अऊ ओकर भाई मन योसियाह ले जनम लेहीन।

12बंधुवा होए के बेबीलोन जाए कर पाछू यकुनयाह हर सालतिएल कर दाऊ रहीस, अऊ सालतिएल हर जरुबाबिल कर दाऊ रहीस, 13जरुबाबिल हर अबीहूद कर दाऊ रहीस, अबीहूद हर इलयाकीम कर दाऊ रहीस, अऊ इलयाकीम हर अजोर कर दाऊ रहीस, 14अजोर हर सदोक कर दाऊ रहीस, सदोक हर अखिम कर दाऊ रहीस अऊ अखिम हर इलीहूद कर दाऊ रहीस, 15इलीहूद हर एलियाजर कर दाऊ रहीस, एलियाजर हर मतान कर दाऊ रहीस, अऊ मतान हर याकूब कर दाऊ रहीस, 16याकूब हर यूसुफ कर दाऊ रहीस, यूसुफ कर परानी मरियम रहीस, जेकर ठन ले ईसू जनमीस; जेके ला मसीह कथें।

17एही कस अबराहम ले दाऊद तक सब लगाए के चौदह पीढ़ी होईन अऊ दाऊद ले बाबूल में बंधुवा होए के जाए तक चौदह पीढ़ी अऊ बंधुवा होए के बाबूल में जाए कर जुआर ले मसीह तक चौदह पीढ़ी होईन।

ईसू मसीह कर जनम

(लूका 1:26-38; लूका 2:1-7)

18तेकर ईसू मसीह कर जनम ए नियर होईस, कि जे घनी ओकर दाई मरियम कर मंगनी यूसुफ कर संगे होए रहीस बकिन ओमन दुनों झन घरदार-घरदारीन कर रूप में एक संग रहे कर आगूच ले, मरियम हर पबितर आत्मा कती ले आसापती होए गईस। 19मरियम कर होवईया घरदार यूसुफ हर परमेस्वर कर नजेर में सुघर जिनगी जिवईया मईनसे रहीस अऊ ओहर मरियम ला मईनसे मन कर आगू में बईदनाम करे बर नई चाहत रहीस, एकरे बर यूसुफ हर मरियम ला कले-कस छोंएड़ देहे कर बिचार करीस। 20जे घनी ओहर ए सब बात मन कर बिचार करत रहीस, तेहीच घनी परभू कर एगोट दूत हर सपना में ओके दिखीस अऊ ओके कहीस, “दाऊद कर पीढ़ी कर ए यूसुफ! तंए मरियम ला अपन परानी बनाए बर झईन डरा, काबरकि जेहर ओकर कोख में हवे, ओहर पबितर आत्मा कती ले हवे। 21ओहर एगोट बेटा जनम देही अऊ तंए ओकर नांव ईसू राखबे, काबरकि ओहर अपन मईनसे मन ला ओमन कर पाप ले छुटकारा देही।”

22ए सब जाएत हर एकरले होईस कि जे बचन ला परभू हर अगमजानी मन कर जरिये कहे रहीस, ओहर पूरा होए। 23ओ बचन एहर रहीस “सुना, एगोट कुंवारी हर आसापती होही अऊ एगोट बेटा ला जनम देही, अऊ ओकर नांव इमानुएल राखल जाही, जेकर मतलब होथे; परमेस्वर हमर संगे हवे।” 24तेकर यूसुफ नींद ले जाएग के परभू कर दूत कर अगींया कर अनुसार मरियम ला अपन परानी बनाईस। 25अऊ जब तक मरियम हर बेटा ला जनम नई देहीस तब तक यूसुफ ओकर संगे नई सुतीस; अऊ ओहर ओ लईका कर नांव ईसू राखीस।

Выбрано:

मत्ती 1: SGJ

Выделить

Копировать