Malikɔ 2
2
Yɛsu osoolola mondo wɛ ɛlɛɛlɛ
(Mat 9:1-8; Luk 5:17-26)
1Kɔmɔngɔ kwe masu makɛɛkɛ, Yɛsu na koolea kabee mo kalya ke Kapɛlɛnaumu, bando na kuungwa itɛ oe monda mwe ndabo. 2Babua mwingya abɔ na koyachaa mo ndabo, na koolea mo koena naa ne iboa monda ne anjɛ kombaa kwe mukinda. Yɛsu wabɛchaya mo kobaeyecha Ikomo lya Kakua.
3A kea kyanya, bando banachi mwingya mwe ketongo na komobea Yɛsu ne mondo ɔmɔɔsa wɛ ɛlɛɛlɛ. 4Alakini, ndebakonja njea yee komoolecha kombaa kwa Yɛsu ko kibwiichi kye bando. Kɔ bɔbɔ, abɔ na kusunjua lotanda a nganda yee ndabo#2:4 Bamɔ Bayula babɛchaya mu kuchibea maabɔ ne makɔmbamɔya monganda, kokaka fitɔ ne koasea. a iboa lyabɛchaya Yɛsu. Kusia, mo kea kyoolo ne mwaikyea abɔ kipɔyɔ kya kɛsɛaya molwachi. 5Amɔa Yɛsu iekekeo lya baa bando, awɛ na kosaolea olya wɛ ɛlɛɛlɛ: «Mwaana waanɛ, bwabea bwao bosoebeelwa.»
6Mo elya ndabo mwabɛchaya baeyechi bamɔ be Salia babɛchaya mo kwibocha mo metema yaabɔ. 7«Booni bɔtɔɔcha ona mondo bobo? Oe mɔ kɔbɛngɛa Kakua! Naani otaɔsɔnɛ kwebeela bwabea ataasi Kakua mwɛɛnɛ?» 8Akaɛ alya Yɛsu na kocheba lokani lwabɔ, na kobabocha: «Ko eke kotoiyɔchɛa banu mo metema maa makomo basɛ? 9Kyalɛnga ne keni kosaolea mondo wɛ ɛlɛɛlɛ itɛ bwabea bwakɛ bosoebeelwa ɔbɛɛ komosaolea itɛ otaoke oende kipɔyɔ kyaakɛ ne koya? 10Kɔ bɔbɔ natokonda mochebe itɛ mee Mwaana we Mondo nae nɛ bɔkɛtɛ bye kwebeela bwabea moono mɔ mɔsɛngɛ.» 11«Natɔɔcha, enda kipɔyɔ kyao yaaka kwao!»
12Akaɛ alya olya wɛ ɛlɛɛlɛ na kotaoka, na koenda kipɔyɔ kyaakɛ na kwiyea kombaa kwe bando basɛ. Bando basɛ na kokanakana, na koseka Kakua itɛ: «Tunamɔa naa lɔmɔ lusu makomo boe mama!»
Yɛsu usuitana Lawi omoyee
(Mat 9:9-13; Luk 5:27-32)
13Kɔmɔngɔ kwɛ bɔbɔ, Yɛsu na koya kabee mɔ mɔkɔngɛ we kichibachiba kye Kalilaya. Ndongo ya yanaka yee bando na komoolelea, awɛ na kobaeyecha. 14Kusia, abɛchaya awɛ mo koeta, na kɔmɔa Lawi, #2:14 Lawi itwitaniwa kabee Matayɔ. Yɔɔla Mat 9:9. mwaana wa Alufayɔ. Ona Lawi wabɛchaya a iboa lye kolambosea molambo. Yɛsu na komosaolea: «Mbyea!» Akaɛ alya awɛ Lawi kotaoka na komoyea.
15Kusia, Yɛsu na koya kwalye mo ndabo ya Lawi. Bakinɛ batolamboesa molambo ne bakinɛ batoketa bwabea bachikaa kolya kɔmɔɔsa na Yɛsu ne baeyechwa bakɛ, kɔ kɔmɔa bando babua ba olya mutindo bamoyea. 16Amɔmɔa baeyechi be Salia be ndongo yee Bafalisayɔ amɔa abɔ Yɛsu otolya na baa bando, abɔ na kobocha baeyechwa bakɛ: «Koe eke kotolya Yɛsu kɔmɔɔsa ne bando batolamboesa molambo ne batoketa bwabea?»
17Yɛsu waungwa makomo maɔchaya abɔ, kɔ bɔbɔ awɛ na kobasaolea: «Bae ne iyɛma lyaachi batoenga moboki, ila baa balwachi ikɛɛsa. Sabaaka kwaenge bando bɛ kiinɛkinɛ, alakini batoketa bwabea.»
(Mat 9:14-17; Luk 5:33-39)
Kwiyicha kolya
18Lɔmɔ lusu, baeyechwa ba Yɔana Mobatisi ne Bafalisayɔ babɛchaya mu kwiyaya kwe kwiicha biebwa. Ko bobo bando bamɔ na koba kwaboche Yɛsu: «Ko eke baeyechwa ba Yɔana Mobatisi ne Bafalisayɔ baanga kwiyaya kwe kwiyicha kolya, alakini ko eke baeyechwa bao batoketa bɔbɔ?»
19Yɛsu na kobasaolea: «Mutuninga itɛ batwitaniwa ku ilangya batɔɔsɔna kwiyicha kolya biebwa ingɛ bakee amɔsa ne motombi? Kuusi! Ingɛ motombi okee amɔsa nabɔ, bakaɔsɔnɛ kwiyicha kolya. 20Alakini ona motombi, kotabɛ lusu lotaendiwe awɛ mwingya mwabɔ. Kɔ bɔbɔ maɔ masu ne ataiyaye abɔ mu kwiicha biewa.
21«Kuusi mondo otasambe kilɛmbɛ keya keya kye ngubɔ mo nganda mwe ngubɔ yee kaɛ. Ingɛ osoketa bɔbɔ, kea kyunda keyakeya ketaate ngubɔ yee kaɛ. Kɔ bɔbɔ nɛ kɔɔnɛka kwe elya ngubɔ yee kaɛ kotanake byabua. 22Bwakaɛ bɔbɔ kuusi mondo ɔtɔtɛcha lifai leyaleya mo lokombo lwe kɛkɔba#2:22 lokombo lwe kɛkɔba Bayula basɛngaya lokombo lwɛ kɛkɔba. Monda mwe bia bikɔba babekaya maache ɔbɛɛ lifai ɔbɛɛ makuta. Chia ngombo kende chie chiyachiya chaiembyaya. Alakini kende chitae kɔkɔɛka ne chiokoba; ko boa chikaiembye kabee. Ingɛ ooketa bɔbɔ, lea lifai leyaleya letaate loa lokombo lwe kɛkɔba kye kaɛ. Alya ne lifai ne lokombo lwɛ kɛkɔba biisɛ bitachimbee bokata. Alakini biengye kɔtɛcha lifai leyaleya monda mwe lokombo lwe bikɔba biyabiya. kye kaɛ.»
(Mat 12:1-8; Luk 6:1-5)
Bitɔɔcha salia ko mbanga ye sabatɔ
23Lɔmɔ lusu lwe sabatɔ Yɛsu ne baeyechwa bakɛ babɛchaya mo koeta mwingya masio me nganɔ. Abɛchaya abɔ mo koya, baeyechwa bakɛ na kobangoa kɔlɔla bichɛngɛ bye nganɔ. 24Kɔ bɔbɔ Bafalisayɔ na kosaolea Yɛsu: «Ko eke kotoketa baeyechwa bao lee ikomo letokandelwa lusu lwe sabatɔ?»
25Yɛsu na kobasaolea: «Muunayɔɔla naa ne kyɛndɔ ko byaketaya nombe Lauli byaketa akonda awɛ kolya, kɔmɔa awɛ ne bando bakɛ baungwa njaa? 26Awɛ na kwingea mo ndabo ya Kakua#2:26 ndabo ya Kakua Mo keeko kya Nombe Lauli, ndabo mekoo ya Kakua yabɛchaya iina iinaabokiwa Yɛlusalɛma. na kolya mikati yabɛchaya bando mo koochea Kakua. Abiatali wabɛchaya musia mokoo kɔ kɛɔ keeko. Salia yiito yaɛcha basia ikɛɛsa sambo yee kolya elya mikati, alakini Lauli na komeenda na kɔɛcha bando bakɛ.» 27Yɛsu na koseboa kobasaolea: «Lusu lwe sabatɔ lwabekiwa ne ko mondo, alakini mondo ndabombiwa ko sabatɔ. 28Ne ko bobo mee Mwaana we Mondo ne Mwaame naa ne we lusu lwe sabatɔ.»
Выбрано:
Malikɔ 2: ZMB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
©2022 Seed Company in coordination with Forum Communautaire des Traducteurs de la Bible et Alphabétisation
