Luk 6

Zɛzi, Ku wa iyɔkɔ ja ba-Zufi

1O buya bwa iyɔkɔ ja ba-Zufi, Zɛzi alenanga makuba, ya bayokwɛ beji batɔ bekaso bya mambolo ma babanga te bele, bajɛlɛ bepazi ya bango aja menukwa. 2Ya ibate bafalizɛ basɔhɔ na bango te: «Sina ya byabeka emba ya eciya o buya bwa Saba bende?» 3Zɛzi ahungwɛ na bango te: «Byata langa o Makana emba ya Davidi wa nɛni abekasa usya bango na bananyangwɛ bayokasa za?» 4Okate ya bango akweyasa o Elongwɛ ya Zambe, na ikwaka bapɛmbɛ ba eciya babawɛsɛ bebuwa na Zambe. Ya ango aja na iwɛcɛ bato ba bango ango bajasa. Bapɛmbɛ bɛ anji ja bango bawe ba bebuwa. 5Okate Zɛzi, asɔhɔ na bango te: «Mwana moto Ku wa buya bwa Saba.»

6Ibwate buya bwa Saba, Zɛzi akweya o Elongwɛ ya mebɔndu, na ihɛlɛcɛ iyɔkɔ ja Zambe na bato. Okate yajasa na ndomana na ikɔhɔ obɔ wa hangwɛ. 7Melɔnji mya Nceko, na bafalizɛ baje o botaka ango, ice anyeni ihaka moto o buya bwa Saba. Bosina te, bahakakasa ikumɛcɛ emba ya bango behacɛcɛ ango ibuza. 8Okate, Zɛzi ayebakasa matemange mabango, ya ango asɔhɔ na ndomana mɛnɛ wɛ ajasa na ikɔhɔ te: «Yemwaka! Tɛmɛcɛ o lebebe ya moto wahajɛ!» Ndomana mɛnɛ wɛ te ayemwa na itɛmɛcɛ tɛtɛ. 9Zɛzi asɔhɔ na bango te: «Mahimwa bihi te: yaje eciya buya bwa Saba ibekaka bɔnhu ice bobe na moto? ihakaka moto kate ibomaka ango?» 10Okate Zɛzi, ata bango bahajɛ, na isɔhɔkɔ na ajasa na ikɔhɔ te: «Sambɛcɛ obɔ!» Ango te asambɛ obɔ, ya obɔ ahuwana ango obwɛji. 11Nde melɔnji mya nceko mwa Zambe na bafalizɛ banganya buce, na iyokanaka opanga ango, ihakaka etɛ ya bango benyeni beka na Zɛzi.

Zɛzi abɔnɔ batɔtu beji jonwu na mba

12O elɔmɔ mɛnɛ yɛ, Zɛzi adambwa nyo bya ikwa ibete ibɔndɔkɔ Zambe epundu ya ntula. 13O mayaye ma kwaji, ya ango abanga bayokwɛ beji, na ibɔnɔkɔ jonwu na mba, na iyocɛcɛ bango batɔtu. 14Okate abɔnɔ Simɔn wa ango ayocɛsɛ jinɔ te Pyɛli, na Andele wa mwana hangwɛ wa Pyɛli, Zaki, Za, Filipi, na Batelemi. 15Ya ango abɔnɔsɔ na Matye, Toma, Zaki mwana wa Alife, Simɔn ajasa mvu, 16Zudi wa mwana wa Zaki, na Zuda Isikaliɔti ahombasa Zɛzi.

Zɛzi ahɛlɛkɛsɛ iyɔkɔ ja Zambe na lupu, na ihakaka membɛlu

17Zɛzi ahula na ibete bango ango, na itɛmɛcɛ o isi ya sɛbɛtɛ, yajasa na ibate bayokwɛ beji, na lupu ja bato buce, ja yengasa bya mamboka ma Zude mahajɛ, na bya Zɛluzalɛmi, na baji okɔngɔkɔ mwa zowa ya macemba yaji o njenja mɔngɔ ya Tili, na Sidɔni. 18Bayasa iyokaka iyɔkɔ ja Zambe ja Zɛzi atandakasa na ihakubwɛcɛ, na bembamanganya byango, na bajasa na menkuku mya ibebe ngombɛkɛsɛ ajasa ehaka na bango. 19Okate lupu ja bato ja hakakasa ipitaka Zɛzi, bosina te, tuma ya pwakasa o nyo eji na ihakaka bango bahajɛ.

Bato ba mbɛ na bato ba bobe

20Okate Zɛzi, atakasa bayokwɛ beji, na isɔhɔkɔ te:

«Bihi mentende byaje o mana, bosina te Etomba ya Zambe ya bihi.

21Bihi baji na maza osatɛ, byaje o mana bosina te byabikumɛcɛ maja buce.

Bihi bangweya osatɛ, byaje o mana bosina te byabihɛcɛcɛ.

22Bihi ba bato banjinyɛ, na ibenaka, na ilowaka, na ikakwaka na bosina bwa jinɔ ja Mwana Moto, byajɛ o mana. 23O elɔmɔ mɛnɛ yɛ, jaka o mana, damaka na ncebo! Bosina te mahuta minɛnɛ mangwɛ bya iko. Yebaka te na batata bango babekakasa etɛ mɛnɛ ɛkɔ na mentɔci.

24Nde emba ya bohihi ya yabipundaka na bihi mekumani, bosina te, bihi ba asomɛ!

25Emba ya bohihi yabipundaka na bihi, bato baji na mambimbi osatɛ, bosina te byabiyɛnɛcɛ maza!

Emba ya bohihi yabipundaka bihi bato bahɛcɛ becɛ osatɛ, bosina te, byejakasa o malɛbu, na ingweyaka!

26Emba ya bohihi yabipundaka na bihi, bato ba bapaka! Yebaka te na batata bango bapakakasa etɛ mɛnɛ ɛkɔ na mentɔci mya ebonda.»

Nɔnɔkɔ bato banjinyɛ bihi

27«Nde matanda emba etɛ na bihi bayoka mɛ: Nɔnɔkɔ bapala ba bihi, bekaka bɔnhu na bapala ba bihi. 28Wɛcɛ ipota na bato basɛmɛ bihi, bɔndɔngɔkɔ Zambe bosina bwa bato bahema bihi. 29Wɛnɛ moto ahaza ɔbɛ o ilama hɛlɛcɛ ango ijate. Wɛnɛ moto akwa ɔbɛ kanda, teka bena iwɛcɛ ango na ngɔhu. 30Wɛnɛ moto nde moto aya ihimwaka ɔbɛ emba wɛcɛ ango, wɛnɛ moto nde moto, akwa ɔbɛ emba teka mici himwa ango yango. 31Bekaka na bato emba yabyahaka te babekace na bihi.»

32«Wɛnɛ byanɔnɔ bato banɔnɔ bihi okayi, banyeni we bihi mambomala? Na bato bamesɛmbɛ bango anɔnɔ bato banɔnɔ bango. 33Wɛnɛ byabeka bɔnhu na bato babeka bihi bɔnhu okayi, banyeni we bihi mambomala? Na bato bamesɛmbɛ bango abeka yumɛnɛ. 34Wɛnɛ byawɛ sanja okayi na bato babyabukwɛ te babihujɛcɛ bihi, banyeni wɛ bihi mambomala?, Na bato bamesɛmbɛ bango abeka yumɛnɛ, na ibokaka te bahujɛcɛ nyoko mwa bango bamuwɛ! 35Nde bihi nɔnɔkɔ bato bapala ba bihi. Bekaka bango bɔnhu, na iwɛcɛ bango sanja, teka temanga te babihujɛcɛ bihi wango. Usɛ bya ekumɛcɛ mahuta ma inɛnɛ, usi mɛnɛ yɛ, byabijaka bana ba Zambe wa nyangwɛ wa iko. Angwɛ mbɛ, na bato baji teka wɛ ango mambomala, na bato ba bwa. 36Yɛnɛcɛ cɛyi, nda Zambe Hangwɛ wa bihi ayɛnɛ cɛyi buce.»

Byako pabace banɛ!

37«Teka paba banɛ, baji paba na bihi. Teka yata banɛ, baji yata na bihi. Yɛnɛcɛ banɛ cɛyi, beyɛnɛcɛ na bihi cɛyi. 38Wɛcɛ na banɛ, na Zambe abiwɛcɛ bihi. Babilozɛcɛ ingala jɔbɛ na ngabo ya buce, ba babipukwɛcɛ ingala mɛnɛ, na ininjɛcɛ jango ijaka humɔn. Bosina te, ingala mɛnɛ ja byakaba banɛ, jango ja Zambe ekabaka na bihi na jango.»

39Zɛzi asɔhɔ na bango na lembya te: «Moto wa njimi anyeni hɛlɛ uwate aji na njimi pɛyi? Hamama! Bosina te bahajɛ baba betuwaka u ibenga. 40Ayokwɛ teka nyeni yeka ahɛlɛ ango, nde bayokwɛ ba bamuhɛlɛ obwɛji babijaka nda lɔnji mwango. 41Sina ya oyɛnɛ ngulukusu aji o jiyɔ ja mwanyɔngwɛ bende, moyɛne imanya ja inɛnɛ jaji nɔbɛ o jiyɔ? 42Yomusɔhɔ na mwanyɔngwɛ te: “Mwanyangwa mɛ, jikaka imɛ majɛlɛce ɔbɛ ngulukusu aji ɔbɛ o jiyɔ,” nde moyɛne imanya ja inɛnɛ jaji nɔbɛ o jiyɔ? Oje moto wa ipɔpi, jɛlɛcɛ boho imanya ja inɛnɛ jaji nɔbɛ o jiyɔ, obiyɛnɛcɛ obwɛji, ete ojɛlɛ ngulukusu ya aji na mwanyɔngwɛ o jiyɔ.»

Bayembia mwele na bebuma bweji

43«Mwele mwa mbɛ mwa we bebuma bya bobe, na mwele mwa bobe mwa we bebuma bya mbɛ. 44Bosina te bayembya mwele na bebuma byeji, bapanwe bebuma bya fingi o mwele manyɔn. Bapanwe bebuma bya nyabe o mwele mwa manyɔn. 45Moto wa mbɛ, adambwa bokumani bwa mbɛ o isɔsɔ ja lema mweji. Bobe bwa moto wa bobe abeka, bwa yenga o bokumani bwa bobe bwaji o lema mweji. Bosina te, beyinda byaji buce o lema mwa moto, byango bya honko mweji mwasɔhɔ.»

Belongwɛ bya menjanga memba

46«Byangu bangaka imɛ “Ku wamɛ, Ku wamɛ,” nde yabyaji teka beka bemba byamatanda bihi bende? 47Moto nde moto aya byamaji, ayoka mayɔkɔ mamɛ, na isiswaka mango, mabihɛlɛcɛ bihi janga mwango aji. 48Aje nda moto, alongaka Elongwɛ, apunda mabenga bodɔngɔ ukwa imanya. Usya mbuwa anɔ, na tonda ihazaka o Elongwɛ, Elongwɛ teka tuwa. Bosina te, bahumasa ya ango ukwa imanya. 49Nde moto ayoka mayɔkɔ mamɛ, ete ango teka siswa mango, aje nda moto ahuma Elongwɛ eji o hehe teka punda mabenga bodɔngɔ. Usya mbuwa amunɔ, na iyaka na tonda, tonda yahaza Elongwɛ, ibujɛkɔ Elongwɛ mɛnɛ te yatuwa, ya Elongwɛ mɛnɛ yahemana yahajɛ.»

Выбрано:

Luk 6: KOQ

Выделить

Копировать