Marc 2
2
1Mua bilumbu binovioga Jesus amagabuga o Capernaum na botsu bamagulu yiri amaruga. 2Batu bapuela bapuela bamabenguna o ndagu andi na jimabasa te no dulombili. Jesus yika ulonsa elonsi 3na babaala bana abamanangula yibomfi bamaruga. 4Basamarungula utola ombu gandi mu diambu dimugungi kabogu bamatoba muansa va nsungisini na mbura aji Jesus amaba. Banotoba mbura bamasundusa yibomfi va tangi andi. 5Jesus anolaba yitu yiogu amavosa na yibomfi rie: Muana ami masumu magu mamagutandu. 6Milonsi mimosi mimigaga abamaba batsana vana bamatasa o gari mirima miogu rie: 7Dibandu yi mutu egugu ana bukidi ulensila Nsambi? Anyi orungula utanda masumu? Tsia yika Nsambi buandi? 8Vana vana Jesus amajaba matasa mogu kabogu amabawivula rie: Dibandu yi duitumuni paga nana? 9Adiviolila uvura yi, uvosa na yibomfi rie: Masumu magu mamagutandu? Vo rie: Relama, bonga tangi agu, tsie wendingi? 10Jabanu yiri Muana Mutu ana musuga vava tsi utanda masumu.
Mbana amavosa na yibomfi rie: 11Relama, bonga tangi agu, wenda o ndagu agu.
12Vana vana amarelama na amabonga tangi andi na va misu mogu amapala. Botsu bamakambulu mu dionyi na bamadodisa Nsambi novosa rie: Na kala tusakalaba nana.
Jesus unengila enengili Levi
(Matt 9.9-13; Luc 5.27-32)
13Mbana Jesus amagabuga o yiari yiGalilee. Batu bapuela bamaruga ombu gandi na amabalonsa. 14Yika uvioga evioyi na amalaba Levi muana dibaala uAlphee atsana va mbura aji amabongilanga lepu. Amamutsingula rie: Nduki. Levi amarelama na amamuduka.
15Jesus amakota o ndagu Levi uyeji. Babongitsi balepu bapuela na bango bikumbu bamaduka Jesus kabogu bamosi bamatsana nandi va tavula va mosi na badukitsi bandi. 16Milonsi mimigaga abamaba baPharisie bamamulaba uji eji na babongitsi balepu na bango bikumbu kabogu bamawivula badukitsi bandi rie: Mu mbari yi elili nonu na babongitsi balepu na bango bikumbu?
17Jesus anodigulu amabawagula rie: Abavu polu bagaa na nsala mubuyitsi, yika bibedu. Nyisamaruga mu diambu dibasungama tumba mu diambu dibango bikumbu.
Bivu mu diambu diubusa uji
(Matt 9.14-17; Luc 5.33-39)
18Yilumbu yimosi badukitsi baJean Baptiste na baJuif abamaba baPharisie bamabusa uji. Batu bamosi bamaruga ombu Jesus nomuwivula rie: Mu mbari yi badukitsi baJean na babaPharisie bebusili uji tumba badukitsi bagu bagedivayi?
19Jesus amabagabusila rie: Bambatsi bayiwela-mugetu borungula ubusa uji ava yiwela-mugetu aki nogu? Tsatsabi! Ava yiwela-mugetu aki nogu bagorungula ubusa uji. 20Diweru diuruga adi yiwela-mugetu obapatulu mbana borungula ubusa uji.
21Mutu agepasi tsanda jigona ulonda yikutu yigulu. Pa evayi nana yirendi yigona yigesoyini na yikutu yigulu na diluta diuviolila uroga. 22Na mutu agewitili malamu mamienga mu mambuta mamikata magulu. Pa evayi nana malamu mamienga mbe mopansa mambuta na malamu na mambuta mbe motsiemuga. Nyiina, mambuta mamikata magona mavu mawelimina na malamu mamienga.
Bivu mu diambu diyilumbu yitsona
(Matt 12.1-8; Luc 6.1-5)
23Yilumbu yitsona Jesus na badukitsi bandi bamavioga mu nungi tsiputu. Badukitsi bandi bamayenadokulanga putu. 24BaPharisie bamavosa na Jesus rie: Adi badukitsi bagu bevayi yilumbu yitsona digaa diwelimina na migaga mietu.
25Jesus amabagabusila rie: Mbe dusakaranga adi David amavaga ava amagululu nsala, jogu na badukitsi bandi? 26Amakota o Ndagu Nsambi na amaji mapa amamavagulu pagu ombu Nsambi. Dimalabana mu temu Abiatar amaba yivunda yibavagulitsi bapagu. Tsie jetu tugaa na mugaga aguiveyi yika bavagulitsi bapagu musuga umaji? Tumba David amamaji na amamavega ombu abandi.
27Mbana Jesus amabatsingula rie: Yilumbu yitsona yimavagulu mu diambu dimutu; mutu asamavagulu mu yionyi. 28Kabogu Muana Mutu ana musuga uvaga adivu diwelimina yilumbu yitsona.
Выбрано:
Marc 2: PUU1992
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
La sainte Bible en langue Yipunu © Alliance Biblique du Cameroun, 1992.
