Dibandu 9
9
Pangini aji Nsambi amavangana na Noe
1Nsambi amagabila Noe na baana bandi bababaala miula na amabatsingula rie: Funanu na burasananu te na butamba bubasa de. 2Bibulu biotsu bimaduwakusu nesi batsoli botsu nesi biotsu abivu va butamba nesi nyama tsimamba tsiotsu; biotsu bina biubanganga na goma na yomumu: 3biotsu abikungi na abivu monyu biuba nyama tsienu nana nyimaduveyila bivaru dedi mosi nyiduveyi biotsu bina. 4Dimosi buandi duyaji nyama atsisamadekisa malungu motsu mu mbari malungu la monyu. 5Malungu menu amavu monyu enu mobanganga nderi dibumi adi nyusuyiga; dedi mosi nyudisuyiga bibulu abiuboka batu. Nyusuyiga dibumi dimonyu mutu agumabokisa tindi muana nguji andi.
6Pa mutu oboka mutu,
jaʼ wandi oboku na mutu nandi;
mu mbari Nsambi amasunda mutu
mu yikebutsu yiandi.
7Funanu na burasauianu te na butamba bubasa de nyidurumi rie: Burasananganu.
8Nsambi amamuetsingula Noe na baana bandi bababaala rie: 9Gufuanu pangini aji nyivangini nemi na bategula benu; 10na biotsu abivu monyu abivu nenu: nesi batsoli nesi biruitsi nesi bibulu biotsu bimusiru abimaba nenu o dikumbi dimamba, diwendi rie: bibulu biotsu. 11Nana nyibanovanginina pangini nenu rie: Batu botsu bagomueboku na nyidu na vagomueba nyidu ajiubunga butamba buotsu. 12Nsambi amavosa rie: Ayiyi la yilimba yipangini ami jimutubu aji nyivangini nenu na biotsu abivu monyu ubandila namunyi te na mutubu: 13nyimasunsa muyama ami mu mamungi aguba yitimba yipangini ami vagari jetu na bisi butamba. 14Ava nyusobininanga mamungi o julu na ava muyama ulabininanga muna; 15ngolibana pangini ami va gari jetu nenu na biotsu abivu monyu bimunongu na munongu: diwendi rie: nyidu jigomuetsiemusa biotsu abivu monyu. 16Muyama uba mu mamungi; ava nyugulabilanga nyutasanga pangini aji, menu Nsambi, nyimavangana na biotsu abivu monyu bimunongu na munongu abivu va butamba. 17Mbana Nsambi amamuetsingula Noe rie: Ayiyi la yilimba yipangini ami jimutubu aji nyimavangana nenu na biotsu abivu monyu. Baana barieru bababaala baNoe.
18Miina mabaana bababaala baNoe abamapala nandi o dikumbi dimamba amama: Sem, Cham na Japhet Cham amabura Canaan. 19Abana la baana barieru bababaala baNoe: jogu bamaburasana te na batu bamamuebasa butamba buotsu.
20Noe amabanda usala butamba: amavara mfuga. 21Anonu malamu amalanga na amasilama penyi o gari ndagu andi jitsanda. 22Cham taji Canaan, amalaba penyi jitaji andi, amapala va gusu kana na amayeditsingula baana banguji bandi babeji. 23Mbana Sem na Japhet bamabonga yijungi, bamayivakiga mu masambaka mogu na bamakota mansinsima uyekubiga penyi jitaji ogu; bamawenda mansinsima la dibandu basamalabila penyi jitaji ogu. 24Ava Noe amasaguyila dilangi amagulu adi marina mandi amamuvayila. 25Mbana amavosa rie:
Mulogu ubi na Canaan!
Abi musalitsi ubasalitsi babaana
banguji bandi bababaala!
26Amamuevosa rie:
Diboti ombu Fumu Nsambi
aguvu Nsambi Sem!
Canaan abi musalitsi andi!
27Miula miNsambi mibi na Japhet!
Tumba atsani o ndagu Sem!
Canaan abi musalitsi andi!
28Nyidu jinokamuga Noe amabuela kama yirieni na magumaranu mabilima. 29Yitsingu yiotsu yiNoe yimabayifu yikama na magumaranu mabilima; mbana amafu.
Выбрано:
Dibandu 9: PUU1992
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
La sainte Bible en langue Yipunu © Alliance Biblique du Cameroun, 1992.
