IIMU/UUNGW 6

Tlakweemaá muu

1Qoomaadae muu ina tlaáhh baraá yaamuwo, nee dasu kuna laqwaál. 2Daaqoó Mungú dasuuduú muu kuna ár adór kur hhohhó'. Adoorihe inooín dasú naa tsawaariyé', nguna duxuutiyé'. 3AAKOÓ MUNGÚ iri oó', «Qeerueé' nee hee ti tlampa'amisiaaká daqisleém, asma hee a slaqwtá gwaa'. Slám deelór hotaawós a har kureeraá tsiiru nee mibeeri tsár.» 4De'emudaádae múk ló'wa tlét i deer baraá yaamuwo. Nee tam aluuwo sleeme i deer. Mukwí an xwaylár daaqoó Mungú nee dasú muu. Inooín a pihhuuseedár aáng, nee a múk xirfuú koóm.

5Aako gari ár adór tlakweemaá muu kir úr baraá yaamuwo, nee adór umuúqo inslawoó baraá muner'ín kur tlákw umuú daqto. 6AAKOÓ MUNGÚ iri oó', «Gár hám hee ngusa tleéhh nguri qaás baraá yaamií alé.» Ina ló'wa gurhamuút baraá muunaáwose, iri oó', «Masók una tleehhiiká.» 7AAKOÓ MUNGÚ iri oó', «Mukdá' naa tleéhh u fiíts baraá yaamuwo, hee tam nee makaywo, nee muruú gur'eér hi'iimiít nee tsir/ór gáwtí tlatlaawa a fiíts sleeme. Asma muruuwí sleémeero naa tleéhh, aníng iga gurhaamír i qaás. Masók una tleehhiiká.» 8Ala AAKOÓ MUNGÚ Noa guna i qaytsiít ar gurtleemu.

Kángw Noa

9Kuká' an xwaylár Noa. Noa a heé gan'amkú koóm. Inós a heé hhoó' ta múk hatlá' oo qoomaarose. Noa nee Mungú tana aldinku'uumaamiís. 10Noa daaqoó tám guna laqwaál, umer'ín a Shemu nee Hamu nee Yafeti. 11Múk baraá yaamu aa hhitiruuta hhe'eés dír geeraá Munguhe, yaamu nari hatsiyé' hara/untsawo. 12Mungú yaamu giri ár, naxés, naa hhitiruutiyé', asma umuúqo heewo aa hhitiruút baraá yaamuwo.

13Mungú Noa guri báy, «Aníng gár naa ístí tsaát, a umuúqo heewo un qwaareés, asma hara/untsaín naa tlahhiyé' baraá yaamuwo. Daxta inooín i fiíts baraá yaamuwo. 14Gimáy, miringamo tleehheek oo xa'anoó tlanmo, kutuwoó yaariír baraawósí tleehheek. Miringamo ku ninkiríts ar boohhayaangw daanduú tsee/a nee guruú do'o. 15Adoorí an adór kur tlehh, tlenángw miringamo a miíta tsiiruú wák nee mibeeri tám nee gwaleél, bihhe a miíta mibeeri tsár nee kooán, nee tlenángw gawa a miíta mibaá nee kooán. 16Pa/ángw dákw wák geexaweek tla/ángw koo/i nee dabe, daqaní dabe ka qás. Bihhaá miringamo ki áfkwí tléhh. Kitaardaá tám tleehheek, ar baraay, ar tla/aangw nee ar gawa. 17Nee ga/aaweek, aníng tluwoó ló'wa úr ngu huúw baraá yaamu, as umuúqo gár slafa ngiwa hhitiim, as miwa deerút baraá yaamuwo. Umuúqo gár baraá yaamií diriia i gwá'. 18Ala án kuúng u alqadór i haniís. Kuúng an dát baraá miringamo nee na/iiwók nee hareerók, nee tlaawoó daaqaywók. 19Nee baraá umuúqo gár slafa ar slaqwtá kooma ar umuúqo daa'awto, /ameeni nee yaqaamba, ki tsár wa dahás as niwa slafiya' dinkwa nee kuúng baraá miringamoowo. 20Umuúqo daa'awtá makaywo nee tsir/o nee muruú gur'eérár hi'iimita nin tsár tsár wa dahiyá' amoorógií alé as iwa slafiya'. 21Umuúqo gár /aymaaro ya/aam na ar daheek, burumbureek tawa muruú /aymaarók nee muruú /aymar'ín.» 22Noa adoodá' sleémeero kwaa báy nee AAKOÓ MUNGÚ gana tleéhh.

Выбрано:

IIMU/UUNGW 6: IRQW

Выделить

Копировать