Met 21
21
Abialé Izak
(Met 17:15-21; 18:9-15; Hé 11:11-12)
1Nti a nga mvamane Sara, aval a nga jô de, a Nti a nga bo mfa'a Sara aval a nga jô. 2Sara a nga nyoñ abum a biaé Abraham monafam e nnôme wé été éyoñ é mbe ntiñetan nje Zambe a nga kobô nye. 3Abraham a nga yôlé na Izak e monafam a nga bialé nye, e nyô Sara a nga biaé nye. 4Abraham a nga tyi'i monafame wé Izak atyel. 5Abraham a nga bili mimbu ntet, éyoñe mone wé Izak a nga bialé. 6Eyoñe te nje Sara a nga jô na: Zambe a nga bo ma éwovioé be bôt; môt ase a ye wô'ô jame te a ye woé amu ajô dam. 7A nga beta jô na: Za a nga kôme jô Abraham na: Sara a ye nyaa *bon? Ve da me biaya nye monafam e nnôme wé été.
Agar e nkôte si
(Ga 4:21-31; Met 16; 25:12-18; Sam 146:7-9)
8Mon a nga yaé a tyi mebé. Abraham a nga kôme beta ndian e *môs Izak a nga tyi mebé. 9Sara a nga yene mone ngone y'Ejipte Agar a nga biaé Abraham a woék. 10Nye Abraham na: Tita'ane mbo ésaé minga nyô a mone wé, amu mone mbo ésaé minga nyô aa ye ke kaban élik a monafame wom Izak. 11Abraham a nga wô'ô nkobô ôte étua *abé, amu monafame wé. 12Ve Zambe a nga jô Abraham na: Te wô'ô *abé, amu monafam a mbo ésaé minga wôé. Va'a Sara e jam ese a ye sili wo; amu e be Izak nye wo ye bi mvoñe bôt ja ye be'e jôé dôé. 13Ma ye fe bo mone, mbo ésaé minga wôé ngum ayoñ, amu a ne mvoñe bôte jôé. 14Abraham a nga kôlô si ndibe tyé; a nga nyoñe belet a nde'e mendim a nga ve Agar a beté nye bie étul; a nga kee fe nye mongô a a nga suu nye. A nga ke a jañe *nkôte si Birséba. 15Eyoñe nde'e mendim é nga man, a nga li'i mongô e mon élé éziñe si, 16asu ya ke tabe si a lôô nye, nté ngalé é ne wulu, amu a mbe a jô'ô na: Me bo'o te yen ane mongô a wu! Ane ñhe a nga tabe be lôane mesu a kuli mili'i mis. 17Zambe a nga wô'ô tyiñe monafam; a éngele Nti a nga loon Agar e yôb été a jô nye na: Jé, Agar? Te ko woñ, amu Zambe a wô'ôya tyiñe mongô, e vôm a né. 18Kôlô'ô si, nyoñe monafam, bii nye wo; amu ma ye bo nye beta ayoñ. 19Zambe a nga kui nye mis, a a nga yen anjeñe mendim; a nga ke jalé nde'e mendim a nyuu monafam. 20Zambe a nga too be monafam, nye ve yaé, a nga too e *nkôte si a a nga bo ñwua *élaé. 21A nga too e *nkôte si ya Parañ a nyia wé a nga lu'u nye minga, ngone y'Ejipte.
Elat Abraham a Abimélék
(Met 1:6; 12-33)
22Melu mete Abimélék baa Pikol, évete nsamba mewosane wé be too nsamba, a nga zu kobô Abraham na: Zambe a ne a wo e jam ese wo bo été. 23Kane ñhe me ngana a jôé Zambe na: Wo ye bo te du'u ma, nge bone bam nge bendaé bam, a na wo ye liti ma *mvam a si wo te tabe; avale da ma fe ma te liti wo *mvam. 24Abraham a nga jô na: Ma ye kane de ngana. 25Ve Abraham a nga ve Abimélék bijô ajô anjeñe mendim e nde bebo bisaé b'Abimélék be nga nyoñ a ngul. 26Abimélék a nga yalane na: Ma dimi môt a nga bo jame te, ô nji ke kate ma de a ma yeme de ve dene nyô. 27Eyoñe te Abraham a nga nyoñe mbame bone biyem a wu beta biyem a ve bie Abimélék; wôna bebaane bese be nga bo élat. 28Abraham a nga telé bitoñe beyale mintômba zamgbwale fefel; 29a Abimélék a nga jô Abraham na: Bitoñe mintômba zamgbwale wo te telé fefele bi bi ne jé' 30A nga yalane na: Wo ye kañese bitoñe beyale mintômba zamgbwale bi e mo mam ane nkañesane na ma me nga fa'a anjeñe di. 31Ajô te ba loone vôm ate na Birséba. Mvus éte, amu vôm ate be nga kanane ngana, môt ase e be nyô mbok. 32Abimélék a nga kôlô si baa Pikol évete nsamba mewosane wé a be nga bulane si Befilisteñ. 33Abraham a nga bé élé tamaris e Birséba a a nga loone jôé Nti, e Zambe a too nnôm éto. 34Abraham a nga tabe ayap e sii Befilisteñ.
Выбрано:
Met 21: BDCB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible en langue Bulu © L'Alliance Biblique du Cameroun, 2007, 2015.
