Met 18
18
E mfefé nkatane foé abialé Izak
(Hé 13:2; Met 21:1-7; 2 Bb 4:12-17; Yo 14:23)
1Nti a nge yené be Abraham e bilône bi Mamré a too anyiine *nda éndelé jé, éyoñ ayôñe *môs da bo. 2A nga bete mis a yene: befame belaa be tele nye fefe. Eyoñ a nga yene be a nga mate mbile ya ke tôbane be, ataté anyiine ya *nda éndelé jé, a nga kute meboñe si 3a jô na: A Nti, nge me ne nguleya bi mvame be wo, te lôt, ma ye'elane wo, ôyab a mbo ésaé wôé. 4Be za'a ñhe abe mendim asu ya sôbe mia mebo! Woka'an élé jina si. 5Ma ye ke nyoñ éfuse belet, asu ya ve mia ngule nyô; mvus éte, mia ye kee dulu denan ôsu; nalé ate mia ye bo te lôte zesé e be mbo ésaé wônan. Be nga yalane na: Yaa, bo'ok ane wo te jô.
6Abraham a nga ji'a ke e *nda éndelé jé e be Sara a jô na: Avô, ékekep avut, mve'an biyoñ bilaa; #18:6 Fu'uk a bo begatô.Lita avut 36 7Abraham a nga ke mbil e mfa'a biyem bi né, ve nyoñe mone nyak a too nte'an a mvaé, a ve nye ésoé mbo ésaé, ji é nga yame nye avôl. 8A nga nyoñe fe boto a menyañ, a mone nyak be nga kôm, a a nga telé bie asu dap. Emien a nga tebe be fefe élé si, a be nga di.
9Ajô te be nga jô nye na: Minga wôé Sara a ne vé? Nye na: A ne valé, e *nda éndelé. 10Wua ya be be a nga jô na: Teke selane na: Ma ye beta zu be wo e mbu wo zu: Tame yene na, Sara, e minga wôé, a ye bi monafam. Sara a mbe a vô'ôlô'ô anyiine *nda éndelé é mbe mvuse jé.
11Abraham a Sara be mbe minnôm, abui mimbu, a Sara a nji fe bo nguleya biaé *bon. 12A nga woé *nlem été a jô'ô na: Eyoñe ji me ntoo nte'an, ye me ne nguleya beta bi minkômban? Masa, e nnôme wome fe a ntoo nnôm. 13Nti a nga jô Abraham na: Amu jé Sara a te woé a jô na: Ye bebela na me ne nguleya beta bi mon, e ma me ntoo nnôm' 14Ye jam éziñ é ne di ya kam e be Nti? E mbu wo zu, éyoñ é ne ntelan, ma ye beta zu be wo, a Sara a ye bi monafam. 15Sara a nga laa minsos na: Me nji ke woé amu a nga ko woñ. Ve Nti a nga jô na: Yaa, wo te woé'
Abraham a ye'elan ajô Sodom
(Yo 15:15; Nk 32:9-14; Nlb 14:11-20; Yak 5:16-18)
16Befam bete be nga kôlô si a ke a be nga fombô mfa'a ya Sodom. Abraham a nga li'itane be asu ya kandane be. 17Ve a koone Nti a jôya na: Ye ma ye solé Abraham jam ma zu bo' 18Abraham a ye fo'o bo beta ayoñe bôt e ne ngul, a *meyoñ mese ya *si nyô ma ye bi ébotan amu nye. 19Amu me nga tobe nye ane a ye bendé bobefame bé a *nda bôte jé e mvuse jé na be ba'ale zene Nti, a mboone zôsôôô a nya ntyi'ane mejôô; nalé ate Nti a ye tôé asu Abraham, e jam a nga jô ajô dé. 20Nti a nga jô na: Jame ba komekane de Sodom a Gômor é ne étua anen, a *abé dap énye'e menyu 21avale ya na ma ye sis a yen nge be nga bo mam bebé ane ma wô'ô be kobô'ô; nge e nji bo nalé, ma ye fe yem. 22Befam be nga lume mvus a ke e Sodom. Ve Abraham a nga beta tebe asu Nti. 23Abraham a nga zu bebé a jô na: Ye wo ye fe bo na zôsôôa môt a wu baa mbo *abé' 24Ndô'ôtô bezôsôôô be bôt be ne tison mewôm metan: Ye wo ye fe bo na be wu, a ye wo ye bo te jamé bôte ya valé amu bezôsôôô be bôte mewôm metan be ne valé' 25Mboon avale jame te ô kele wo ôyap: a wôé zôsôôa môt baa mbo *abé avale ya na teke fe nkandan e zañe zôsôôa môt a mbo *abé, nalé a kele wo ôyap! Ye nyô a tyi'i si ése mejô a ye bo te wulu ane metiñ ma jô' 26E Nti a nga jô na: Nge ma koon e Sodom bôte be ne zôsôôô mewôm metan e tison été, ma ye jamé vôm ate ase amu be. 27Abraham a nga beta kobô a jô na: Tame ñhe yen, me boya ayo'o ya kobô Nti, e ma me ne fo'o ve mbuluk a asup. 28E ndô'ôtô na e bezôsôôô be bôt mewôm metan, betan ba ye jemban, ye wo ye tyame tison amu betan? E Nti nye na: Ma ye bo te tyame je nge ma koone mewôm menyin a betan. 29Abraham a nga ke ôsu a kobô nye na: E ndô'ôtô bôt ba ye bo mewôm menyin. Nti nye na: Ma ye bo teke bo jam amu mewôm menyin bete. 30Abraham nye na: Nti a bo'o teke yôñ a ayaa, a ma ye beta kobô. Ndô'ôtô ba ye bo valé mewôm melaa. Nti nye na: Ma ye bo teke bo jam nge ma koone mewôm melaa. 31Abraham a nga jô na: Tame yen me boya ayo'o ya kobô Nti. Ndô'ôtô ba ye koone mewôm mebaé valé. Nti na: Ma ye bo teke tyame je amu bôte mewôm mebaé bete. 32Abraham nye na: Nti a bo'o te yôñ a aya'a, a ma ye su'ulane kobô v'éyoñe ji. Ndô'ôtô ba ye bo bôt awôm tison été. Nti nye na: Ma ye bo teke tyame je amu bôt awôm bete. 33Ane Nti a nga ke, éyoñ a maneya kobô Abraham, a Abraham a nga bulan e *nda jé.
Выбрано:
Met 18: BDCB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible en langue Bulu © L'Alliance Biblique du Cameroun, 2007, 2015.
