Met 14
14
Abram a dañ abui bejô bôt
(1 S 30; Yer 41:11 akk)
1Melu Amrafél, njô bôt ya Sinéar, Aryok, njô bôte ya Elasar, Kedorlaômer, njô bôt y'Elam a Tidéal, njô bôte ya Gôyim, 2e nga kui na bejô bôte bete ba wosane Béra, njô bôte ya Sodom, a Birka, njô bôte ya Gômor, a Sinéab, njô bôte ya Adma a Semeber, njô bôte ya Sebôyim, a njô bôte ya Béla, nalé a ne na Sôar. 3Balé bete bese be nga bôôé e nja wop e mbi'ili Sidim e ne na Mañ me bili nku. 4Tañe mimbu awôm a mibaé be mbe alo Kedorlaômer, a e mbu awôm a lale, be nga bene njôane wé. 5Ve mbu awôm a nyini Kedorlaômer a bejô bôt baa be be be mbe, be nga so a dañe Berefayim bita e Aktérôt-Karnayim, Bezuzim e Ham, Beémin e Kavékiryatayim, 6Behorieñ e minkôle mi Séyir, a kui bilône ya Parañ, e nye a ne bebé *nkôte si. 7Wôna be nga bulan, be nga kui Eyin-Mikpat, nye a ne Kadés, a dañe Beamalésite bita, e si jap ése, nalé fe Beamorééñ be nga too Hatsôn-Tamar. 8Ane bejô bôte ya Sodom, Gômor, Adma, Sebôyim a Béla e ne na Sôar be nga kui atan a tebe na ba wosane be e mbi'ili Sidim: 9be too na Kedorlaômer njô bôte y'Elam, Tidéal, njô bôte ya Gôyim, Amrafél njô bôte ya Sinéar, a Aryok njô bôte ya Elasar bejô bôte benyin be wosa'ane bejô bôte betan. 10Mbi'ili Sidim ô mbe njalane menjeñ me nkon ba late wô biôm; e njô bôte ya Sodom a nyô ya Gômor be nga tup a ku été; ba bevok be nga mate mfa'a ya nkôl. 11Ba be nga dañ, be nga nyoñ akum ése ya Sodom a Gômor a menga'abane map mese; ane be nga ke. 12Be nga bi fe Lot, mone monyañ Abram a akume dé ese, e nde be nga ke. Lot a mbe a too Sodom. 13Môte wua ya ba be nga tup a nga zu kate de Abram, mone Hébre; a mbe a too e bilône bi Mamré, mon Amorééñ, monyañe Ekkol a monyañ Aner, e mbe be nga bo élat a Abram. 14E nné ane Abram a nga wô'ô na mone monyañ a ne mbilan, a nga ve bôte 318 ya adidi'i bebo bisaé dé mengal, ba be nga bialé e *nda jé été, a a nga tôñe bejô bôte bete a kui Dañ. 15A nga kap nkane bita wé, asu ya tya'a mewosan a alu, émien a bebo bisaé bé; a nga bôme be a tôñe be a kui Hôba, e nye a ne Damas mfa'a y'akôé. 16A nga beta soo akum ese; a soo fe Lot monyañe wé a akume dé, nalé fe binga a bôt.
Melkisédék
17Eyoñ Abram a maneya so dañe Kedorlaômer bita a bejô bôte baa be be be mbe, njô bôte ya Sodom a nga kui atan a zu tôbane nye e mbi'ili Kaavé, e ñwô ô ne Mbi'ili Njô Bôt.
18Melkisédék, njô bôte ya Salem, a nga bo na be zuu belet a woon; a mbe *ntuni e Zambe a dañ Oyabe Yôp. 19A nga botan Abram a jô na:
Ebotan é bo'o be Abram é so'o be
Zambe a dañ Oyabe Yôp,
Masa ya yôp a si!
20Duma e bo'o be Zambe a dañ Oyabe Yôp,
Nyô a te ve besiñ e mo môé!
A Abram a nga ve nye ngab awômô ya jôm ése.
21Njô bôte ya Sodom a nga jô Abram na: Ke'e ma bôt, a nyoñ akum asu dôé. 22Abram a nga yalane Njô bôte ya Sodome na: Ma bele wo e be Nti, e Zambe a ne Oyabe Yôp, masa ya yôp a si: 23Teke jôm éziñ é ne énjôé ma ye nyoñ, teke to'o ve nkol nge éfuse silefas, ô za bo ngule ya jô na: Me boya Abram kum. 24Teke jôm éziñ asu dam, vengevenge ve jôme bendôman be nga di a e ngabe bôt bia be be bi nga ke: Aner, Ekkol a Mamré; e mbe ba ye nyoñe ngabe jap.
Выбрано:
Met 14: BDCB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible en langue Bulu © L'Alliance Biblique du Cameroun, 2007, 2015.
