मत्ती 8
8
येशूये काट कुष्ठरोगीकी गेपाक्च
(मर्कूस १:४०-४५; लुका ५:१२-१६)
1येशू डाँडालकीङ म्हाका झालार राहा अनी भर्मीकुङ बाड्को भीडै होसकोकी डुटा। 2होडीक न बेला काट जना कुष्ठरोग लक्डीस्च भर्मी राहा र होसकुङ अगाडी घुँडा टुसार डेया, “ए प्रभु, नाकै मीमन जाटा डेनाङ ङाकी गेपाक्की य्होक्ले।” 3येशूये होसे भर्मी मीटाक मीहुट डार डेया, “ङा मीमन जाट्ले, नाङ गेप्की क्योटो!” होडीक न बेला होसे कुष्ठरोग लक्डीस्च भर्मी गेप्की क्योटा। 4होटै येशूये होसकी डेया, “इसे कुरा सुकीर माडेकी। टर लाहाकी पुजाहारी लेठाङ नुङार टान्हाक्की, र मोशौ व्यवस्थाङ डेनाङ लेखा न भर्मीकोलाक नाङ गेप्च साक्षीयो लागी भेटी योहो।”
रोमी कप्टानौ विश्वास
(लुका ७:१-१०)
5जब येशू कफर्नहुम सहराङ टाराहा, अनी काट जना रोमी कप्तान राहार होसकोकी बिन्ती जाट्चै डेया, 6“ए प्रभु, ङौ नोकर पक्षाघात रोगै छाम इमाङ ठला पर्न ङुमने।” 7येशूये होसकी डेया, “ङा राहार होसकी गेपाक्ले।” 8टर कप्तानै डेया, “ए प्रभु, नाकोकी ङौ इमाङ भीत्री आल्खी ज्योस्च ङा माले।#८:८ होसे कप्तानकी थाहा लेया यहूदीको सेन्र अन्यजाटीकुङ इम भीट्री मापर्ले। टर नाकै वचन मट्टै ङाक्ङ यान्ही, र ङौ नोकर गेप्ले। 9हीजैडेनाङ ङा र बाड्को हाकीमकुङ अधिनाङ ले। ङौ अधिनाङ र सीपाहीको ले। काट्की ‘नुङ्ना’ डेले, होसे नुङ्ले, अर्कोकी ‘रान्हा’ डेले, होसे राल्हे, अनी ङौ नोकरकी ‘इसे जाटो’ डेले, र होचे जाट्ले।”
10होच्यो याङ्च कुरा सेयार येशू छक्क पर्या अनी लहो न्हुङ-न्हुङ राछ भर्मीकोलाक डेया, “साँच्ची न, ङा नाखुरीककी डेले, इस्राएलाङ इडीक बाड्को विश्वास लेच ङै सुकीर माडुप्मने। 11ङा नाखुरीककी डेले, वास्टै अन्यजातिको पूर्व र पस्चीमलकीङ राल्हे, र अब्राहाम, इसहाक र याकुबखाटा स्वर्गौ राज्यौ भोजाङ ज्याकी ङुले। 12टर स्वर्गौ राज्यौ सन्तान छान्की पर्च इस्राएलीको चहीँ बाहीर छुम्ठाङ लोम्हकाले। होला भर्मीको मीस्याक जीक्चै राप्म ङुले।”
13टब येशूये कप्तानकी डेया, “नुङ्नी, नाकै कुङ्च छान्की विश्वास जाट्नने होङ्च न छान्ले।” अनी होच्यो नोकर होडीक न बेला गेप्की क्योटा।
छाचको गेप्च
(मर्कूस १:२९-३४; लुका ४:३८-४१)
14जब येशू पत्रुसौ इमाङ नुङा, होला होसकै पत्रुसौ गुमाकी जर राहार ठला पर्न ङुच डाङा। 15होसकै पत्रुसौ गुमौ मीहुट छुवा र होसकी जरै डास्की क्योटा। अनी होसे सोवार ज्यामा गामा खासार होसकोकी याहा।
16नाम्बीक्रखीङ भर्मीकै भूत लक्डीस्च वास्टै भर्मीकोलाक येशू लेठाङ राका। होसकै वचनलकीङ भूतको छ्युका,#८:१६ यहूदीकुङ म्हुङ बाट्च डीनाङ सुयेर काम माजाट्नन्या। टर नाखान कीम्रखीङ चहीँ म्हुङबाट्च डीन भ्यामन्या र कुसे काम जाट्की मीमन ले होसे न जाट्की य्होक्न्या जस्टै छाच भर्मीकोलाक बुवार येशू लेठाङ राक्की। र पट्ट न छाचकोलाक गेपाका। 17इटजाट्न यशैया अगमवक्तै ङाक्च कुरा पुरा छाना,
“होसको लहे न कानुङ कमजोरीको ला,
अनी कानुङ रोगको सोटार आल्हा।”#यशैया ५३:४
चेलाकै टेरीकी पर्च मुल्य
(लुका ९:५७-६२)
18जब येशूये लहो वरीपरी भर्मीकुङ भीड डाङार लहो चेलाकोलाक डेया, “लौ काल्हा टाल पारी नुइङ।” 19टब काट जना धर्मगुरु होसको लेठाङ राहार इट डेया, “ए गुरु, नाको कुला-कुला नुङ्ले, ङा र नाकोखाटा न नुङ्ले।” 20येशूये होसकी डेया, “सीलौ ओडार र ग्वाजाकुङ मीम छान्ले। टर भर्मीयो मीजौ लागी च मीटालु ठोन्होक्च ठाउँ र माले।”
21अनी चेलाको मध्याङ काट जनै डेया, “गुरुज्यु, पहीला ङाकी नुङार ङौ बोइ सीरखीङ ठाक्की डीन्हीङ।” 22टर येशूये होसकी डेया, “मुर्डाकोलाक मुर्डाकै न ठाक्ख्यो।”#८:२२ यहूदीकै चहीँ सीच भर्मीकी ठाक्की चहीँ साफ्फी महट्वपुर्न मन्डीले। टर येशूये डेया सीच भर्मीकी ठाक्की डेनाङ र मेखोल्हाकी डुट्की चहीँ साफ्फी महट्वपुर्न हो।
येशूये नाम्सु र टालौ छाल बाहाक्च
(मर्कूस ४:३५-४१; लुका ८:२२-२५)
23येशू डुङ्गाङ काल्हा र होसकुङ चेलाको र होसको खाटा न नुङा। 24मोसोमायाङ टालाङ बीर्हीमसेच बाड्को नाम्सु राहा, अनी डीयो छाल सोवार डुङ्गा डीये न्हेपार ठाखी पा। टर येशू चहीँ मीस्न ङुमन्या। 25चेलाको नुङार होसकोकी सोट्चै डेया, “ए प्रभु, कानकी जीवाक्नी! काल्हा थाहार सीकी पाम भ्यामने!” 26अनी येशूये होखुरीककी डेया, “ए चेक्जा र विश्वास मालेचको, नाखुरीक हीजै बीर्हीछ?” टब सोवार होसकै नाम्सु र डीयो छालकी हक्कारीया र बाखी क्योटा। 27याङ्च डाङार होखुरीक पट्ट न छक्क पर्यार डेकी ठाला, “इसे भर्मी कुङ्च हो? नाम्सु र टालौ छालै समेट इसकै डेच मन्डीच लेसा!”
भूत लक्डीस्च नीस जना भर्मीको गेप्च
(मर्कूस ५:१-२०; लुका ८:२६-३९)
28जब येशू टालौ पारी पट्टी गदरिनीकुङ मुलुकाङ टाराहा, होला भूत लक्डीस्च नीस जना भर्मीको चीहानलकीङ राछै जाट्नाङ होसकोकी डुपा। होखुरीक इडीक बीर्हीमसेच लेया, की होसे लामीङ सुर राम्ह नुङ्ङ जाट्की माय्होक्नन्या। 29होखुरीकै च्याक्चै इट डेया, “ए परमेश्वरौ मीजा, नाकुङ कानखाटा ही काम ले? ही नाको टोक्डीच समय डेनाङ अगाडी न कानकी डुख याखी राछ हो?”
30होखुरीक लकीङ चेक पारी काट बाड्को वाकौ बगाल स्यास्न न लेया। 31होटबाटै होसे भूतकै येशूकी इट डेचै बिन्ती जाटा, “इडीक कानकी नाकै डोन्ले डेनाङ, कानकी होसे वाकौ बगालाङ नुङ्की आज्ञा यान्ही।” 32अनी येशूये होखुरीककी डेया, “नुङ्नी!” होडीक न बेला भूतको होसे नीस भर्मी लकीङ ख्योहार वाकौ बगाल भीत्री पर्या, र पट्ट न वाकौ बगाल भीरीङ हुर्रडीस्चै नुङार टालाङ थाहार सीया।
33वाक आर्छाचको भोग्डीसार सहराङ नुङा। पट्ट न घटना र होसे भूत लक्डीस्च भर्मीकोलाक ही छानार गेपा डेम सेटाका। 34इसे कुरा सेरखीङ पट्ट न सहराङ लेच भर्मीको येशूकी डुप्की डेम राहा। अनी डुप्च पछी होसे भर्मीकै होसकोकी, कानुङ इलाका लकीङ नुङ्की क्योट्नी डेयार बिन्ती जाटा।
Выбрано:
मत्ती 8: EMGP
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2024 (Active), Wycliffe Bible Translators, Inc. All rights reserved.
