मत्ती 10
10
बार्ह जना प्रेरितकुङ काम सुरु
(मर्कूस ३:१३-१९; ६:७-१३; लुका ६:१२-१६; ९:१-६)
1येशूये लहो बार्ह जना चेलाकोलाक आर्घार अशुद्ध आत्माको छ्युक्च र खाल-खालुङ रोग र छाचकोलाक गेपाक्च अधिकार याहा।
2बार्ह जना प्रेरितकुङ म्यार्मीन इसे न हो पहीलो पत्रुस डेच सीमोन र मेन भाइ अन्द्रियास, जब्डीयो मीजाको याकुब र होच्यो भाइ युहन्ना, 3फीलीप र बारथोलोमाइ, थोमा र कर सोट्च मत्ती, अल्फायासौ लेन्जा मीजा याकुब, थेदियस, 4देशभक्ट डलुङ सीमोन र येशूकी घोवाक्च यहूदास इस्करीयोट।
5येशूये होसे बार्ह जना प्रेरितकोलाक इट डेयार बीर्न्हका, “नाखुरीक अन्यजातिकुङ मीघ्याङ र सामरीकुङ सहरकोवाङ मानुङ्की। 6टर म्हाट्च भेडाको ल्याक्च इस्राएली जातिको लेठाङ मट्टै नुङ्नी। 7‘स्वर्गुङ राज्य खेरेप राम्हने’ डेयार प्रचार जाट्नी। 8छाचकोलाक गेपाक्नी, सीच कोलाक जीवाक्नी, कुष्ठरोग लक्डीस्चकोलाक शुद्ध पार र भूतको छ्युक्नी। नाखुरीकै होट न डुपा अरुकी र होट न यान्ही। 9नाखुरीकै सुन, चाँडी र टामौ काट पैसा र माबुनी। 10नुङ्नाङ लामुङ लागी झोला, फेर्म्या डौरा, जुत्ता, डाङ्गा हीर मालानी। हीजैडेनाङ य्हामीये होसे काम लकीङ न ज्याकी डुप्की पर्ले।
11“नाखुरीक कुसे लाङ्घा र सहराङ नुङ्ले, होला नाखुरीककी सुये स्वागत जाट्ले होखुरीककी पानी र होटै बीदा माछान्ठर होखुरीक खाटा न ङुनी। 12नाखुरीक इम भीत्री पर्नाङ ‘नाकोकी शान्ति’ डेनी। 13होसे इमुङ भर्मीको नाखुरीकुङ शान्ति लाकी ज्योस्च लेसा डेनाङ होला शान्ति ङुले। टर होखुरीक ज्योस्च मालेसा डेनाङ होसे शान्ति नाखुरीक लेठाङ न ल्हेसार राल्हे। 14इडीक सुयेर नाखुरीककी स्वीकार माजाटा डेनाङ र नाखुरीकुङ वचन मासेया डेनाङ र, होसे इम र सहरीङ ख्योन्हाङ लहो मीखुट्यौ झाबुल होला न खार्हाम यान्ही।#१०:१४ पाइटालुङ ढुलो खार्हाकी डेच अर्थ चहीँ येशूकी बीस्वास माजाट्च सहरुङ भर्मीकोलाक इन्कार जाट्की हो। होटै होखुरीकुङ लागी नाकै हीरठोक जाट्की बाँकी मालेकी हो। 15साँच्ची न, ङा नाखुरीककी डेले, न्यायौ डीनाङ होसे सहरौ डसा डेनाङ बरु सदोम र गमोरौ#१०:१५ सदोम र गमोरौ सदोम र गमोरा डेच सहरुङ भर्मीकुङ वास्टै पापै जाट्नाङ परमेश्वरै होखुरीककी नस्ट पार्नन्या। ङोस्नी: उट्पट्टी १९ डसा सहडीकी य्होक्च छान्ले।
राखी पाच सतावटौ बारेयाङ
(मर्कूस १३:९-१३; लुका २१:१२-१७)
16“सेनी, ङा नाखुरीककी सीलाकुङ मीघ्याङ भेडाकी बीर्न्हकानाङ लेखा न बीर्न्हकामन ले। होटबाटै नाखुरीक बुल लेखा चङ्ख र ढुकुर लेखा सोझो छान्नी। 17टर भर्मीकोलकीङ होसीयार छान्नी, हीजैडेनाङ होखुरीकै नाखुरीककी अदालतकोवाङ जीम्मा याल्हे, अनी होखुरीकुङ सभाङुच इमकोवाङ नाखुरीककी कोर्रा ङाप्ले। 18नाखुरीककी ङौ खाटीर हाकीम र राजाकुङ म्याहासाङ टोङ्हाक्ले। होखुरीक र अन्यजातिकुङ लागी नाखुरीक साक्षी छान्ले। 19जब होखुरीकै नाखुरीककी घोले, टब होडीक बेला ही डेकी र कुटजाट्न ङाक्की डेयार सुर्टा माजाट्नी। हीजैडेनाङ नाखुरीकै ही ङाक्की पर्च हो, होडीक न बेला नाखुरीककी याल्हे। 20हीजैडेनाङ होडीक बेला ङाक्च नाखुरीक लाहा न होइन, टर नाखुरीकुङ परमेश्वर बोयो आत्मा नाखुरीक लकीङ ङाक्ले।
21“भाये लहो न डाजेकी साट्कीयो लागी घोवाक्ले, बोये मीजाकोलाक र मीजाकै मोइ-बोयो विरुद्धाङ सोवार होखुरीककी साट्की लैडीले। 22ङाकी विश्वास जाट्च बाटै नाखुरीककी पट्टकै झीर्ले। टर सु न्हुइङ सम्म न स्थिर ङुले, होसकी न जीवाक्ले। 23जब होखुरीकै नाखुरीककी काट सहराङ सटडीले टब अर्को सहराङ भोक्डीस्नी। साँच्ची न ङा नाखुरीककी डेले, भर्मीयो मीजा राखी अगाडी नाखुरीकै पट्ट न इस्राएलुङ सहरकोवाङ काम जाट्न भ्याच माछान्ले।
24“चेला लहो गुरुडेनाङ र नोकर लहो मीमुरुङ डेनाङ बाड्को माछान्ले। 25चेलै लहो गुरु ल्याक्च छान्नाङ सन्टोक मन्डीख्यो, होटजाट्न न नोकरै र लहो मालीक ल्याक्च छान्नाङ सन्टोक मन्डीख्यो। इडीक होखुरीकै इमुङ मालीककी न भूतौ राजा बालजीबुल डेले डेनाङ, होच्यो जाहानकोलाक झन कुडीक मासेछ डेले औँला?
सुखाटा बीर्हीखी?
(लुका १२:२-७)
26“होटबाटै भर्मीकोखाटा माबीर्हीनी, हीजैडेनाङ हुप्च कुरा कुडीकले, होसे पट्ट न डाङ्ले र आर्च्युक्च कुरा कुडीकले, होसे पट्टकी थाहा छान्ले। 27ही ङा नाखुरीककी छुम्ठाङ डेले, होसे नाखुरीकै ट्याङ्ठाङ डेनी। अनी ही नाखुरीकै खुसुक्क मेन्केपाङ सेले, होसे इमौ ढुरीलकीङ सेटाक्नी। 28होखुरीक खाटा माबीर्हीनी सुये शरीरकी मट्टै साट्की य्होक्ले, टर आत्माकी साट्की माय्होक्ले। बरु नाकुङ आत्मा र शरीर नीसकी न नरकाङ नास जाट्की य्होक्च परमेश्वरखाटा बीर्हीनी। 29ही काट पैसाङ नीस भँङ्गेरा मालुम्ल्हे र? टर होसे मध्याङ काट जा र नाखुरीकुङ परमेश्वर बोयो इच्छाबीना मासीले। 30नाखुरीकुङ मीटालुङ मीछामको र पट्ट न काट-काट हील्नने। 31होटबाटै नाखुरीक माबीर्हीनी, नाखुरीक वास्टै भँङ्गेरा डेनाङ वास्टै मुल्यवानौ ले।
32“होटबाटै सुये ङाकी भर्मीकुङ म्याहासाङ स्वीकारीले, ङा र होसकी स्वर्गाङ लेच ङौ बोयो म्याहासाङ स्वीकार जाट्ले। 33टर सुये ङाकी भर्मीकुङ म्याहासाङ माचीन्डीले डेयार इन्कार जाट्ले, ङा र होसकी स्वर्गाङ लेच ङौ बोयो मीहासाङ इन्कार जाट्ले।
चेलाकै टेरीकी पर्च मोल
(लुका १२:५१-५३; १४:२६-२७)
34“ङा पृथ्वीयाङ शान्ति राक्की डेम राछ हो डेयार माआर्मीट्नी। शान्ति राक्की होइन, टर टरवार क्योट्की लैडीकीयो लागी ङा राछ हो। 35ङा लेन्जा मीजाकी लहो न बोयो विरुद्धाङ, मास्टो मीजाकी मोयो विरुद्धाङ र मेखोनकी लहो मीनीमौ विरोध जाटाक्की राछ हो। 36भर्मीकुङ शत्रु लहो परीवार भीत्रीयुङ न छान्ले।
37“सुये ङाकी डेनाङ वास्टै लहो मोइ-बोइकी माया जाट्ले, होसे ङौ चेला छान्की ज्योस्च माछान्ले। होटजाट्न न सुये ङाकी डेनाङ वास्टै लहो मीजाकोलाक माया जाट्ले, होसे र ङौ चेला छान्की ज्योस्च माछान्ले। 38लहो क्रूस बुवार#१०:३८ लहो क्रूस बुवार क्रुस बुकी डेच चहीँ येशूओ लागी डुख भोक्डीकी र सीकी र टयार छान्की डेच हो। सुये ङाकी माडुट्ले, होसे ङौ चेला छान्की ज्योस्च माछान्ले। 39सुये लहो जीवन जोगडीकी पाले होचे होसे गुमडीले, टर लहो जीवन ङौ लागी गुमडीचये चहीँ होसे डुप्ले।
चेलै डुप्च इनामौ बारेयाङ
(मर्कूस ९:४१; लुका १०:१६)
40“नाखुरीककी स्वीकार जाट्चये ङाकी र स्वीकार जाट्ले, ङाकी स्वीकार जाट्चये ङाकी बीर्न्हकाचकी र स्वीकार जाट्ले। 41सुये अगमवक्ताकी अगमवक्ता न डेयार स्वीकार जाट्ले होचे अगमबक्टौ न इनाम डुप्ले। होटजाट्न न परमेश्वरौ म्याहासाङ धर्मी भर्मीकी धर्मी न डेयार स्वीकार जाट्ले होचे धर्मी भर्मीयो न इनाम डुप्ले। 42सुये इसे मार्जाको मध्याङ काट्की ङौ चेला मन्डीयार काट गीलास चीसो डी मट्टै गाकी याल्हे, साँच्ची न ङा नाखुरीककी डेले, होचे लहो इनाम माम्हाटाक्ले।”
Выбрано:
मत्ती 10: EMGP
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2024 (Active), Wycliffe Bible Translators, Inc. All rights reserved.
