Yòwanìrzɛ̀ 19

1Pìlatò rzìi a òhwa à mà hwa ɛndɛ hwa tiye Yerzù. 2Hwàànà njùma rzi hwa lìŋgɛ̀lɛ̀ hwèkɔ̀kɔ̀ hwe mayi è mà hwe mà òhva ì njenje, rzìi hwa wèka tamba ema è mà àyɛ̀kɛ̀nɛ̀ ekòòtò rzìi hwa mò wɔ̀tìrzɛ̀ è yɔ̀ ò mòhvò. Rzìi hwa mò wɔ̀tìrzɛ̀ hvɛ mòŋgòmbè mò teya ema mò mà àyɛ̀kɛ̀nɛ̀ mòŋgòmbè mò ama kiŋgɛ̀. 3Hwa mà hwɛ lì ɛndɛ lì mò kòmbɛnɛ, rzìi hwa à mò òhweyà nanù ema, “Kìŋgɛ wà wònyà Yudà Èluhwe è hwɛ nà ò wà.” Hwa mà hwɛ hvɛ lì mò rzama màwumbɛ. 4Pìlatò rzìi à wurza hvɛ ò èwòka rzìi à òhweyà hwaŋga hwatò hwa arzɛ nanù ema, “Nà è wùrzìrzɛ̀lɛ̀ è mɔ̀ nàŋgɛ, ndi è hvɔ̀ŋgɛ̀ kɔ̀yi-kɔ̀yi nanù ema nà rza mò lùwànì tɔ̀ njɔ̀mì.” 5Yerzù rzìi à wurza ò èwòka nà è tamba yà njenje ò mòhvò mò eni nà mòŋgòmbè mò teya ema hwa mà mò wɔ̀tìrzɛ̀. Pìlatò rzìi à òhwa nanù ema, “È ɔ̀ŋgɔ tɛ è mòtò mɔ̀ ònò!” 6Nà òma Ipìlìrzì ndɛnɛ nà hwàgbèèlì hwa Ndawò yà Lohwà hwa mà mò ɛnɛ rzìi hwa wòteyà lì tɛɛ nanù ema, “È mò wòmeyà ò mburza! È mò wòmeyà ò mbarza!” Pìlatò rzi à hwa alàhwɛ̀ nanù ema, “Inyɔ hwiti è mò wòwe è ɛ̀ndɛ, è mò wòmeyà ò mbarza, èhwanja nà rza mò lùwànì tɔ̀ njɔ̀mì.” 7Hwàŋga hwatò rzìi hwa tìmbìrzɛ̀lɛ̀lɛ̀ Pìlatò nanù ema, “Ì òhvi mbenda ema jo òhwa nanù ema à hwɛni lì ŋwa èhwanja à òhwa nanù ema mɔ̀ ndi à hwèlì è Ŋmanà wà ama Lohwɛ̀.”

8Nà òma Pìlatò à mà hwèye ene eyà à mà lɛ̀mbeya mòkambiya lì aka lìmɛni. 9Pìlatò ama timba hvɛ ò mààndà mà eni, rzìi à ijòwa Yerzù nanù ema, “One ò uwɛ̀lɛ̀lɛ̀yi e?” Yerzù à mà kina e ya eni. 10Pìlatò rzìi à mò ijòwa hvɛ nanù ema, “Ò rza arza lì nò alàhwɛ̀, ò rza embi nanù ema nà hwɛnì wònjà ò lì òhwa ema hwa ò hwɛmɛ e? Tɔ̀ lì òhwa nanù ema hwa ò wòmeyà ò mbarza e?” 11Yerzù à mà alàhwɛ̀ nanù ema, “Ò rza hwɛnì wònjà ò ŋmanyu yà ami natɛ̀ɛ Lohwɛ̀ à ò ŋgbà eŋgè wònjà. Ò èŋgànɛ̀lɛ̀ rzɔ è mɔ̀ ema à nò àkɛ̀lɛ̀lɛ̀ ò màa aŋgɔ̀ à gbèyi wòhwe wò ndɛnɛ.” 12Nà òma Pìlatò à mà hwèye nanù rzìi à wòteyà lì arza nɛ à rzòlòhweyà Yerzù ndì hwaŋga hwatò hwa mà tɛ̀ɛ̀ nanù ema, “Ò rzòlòhwì tɛ ònò mòtò, nanù òma ò rza enje yòrza yà ama Kàyìrzà. Tɔ̀ njɛnɛ à ahwɛlɛyi ŋmìti Kìŋgɛ òma à teŋgɛ̀nɛ̀yi Kàyìrzà.”

13Nà òma Pìlatò à mà hweye nanù rzìi a wurzana Yerzù ò ewòka rzìi Pìlatò a lìya ò kònda ya lìkànèyà. Èki ema à mà lìya e hwɛ̀lɛ̀hwɛ̀ ndi Maanda ema mà òŋgahwi na Màŋyàyi. O mbɔrzi ya wònyà Hibrù e hwɛ̀lɛ̀hwɛ̀ ndi Gabata. 14Ène hvònda e ma hwɛ ndi e yaa kɔrzi ya ŋmerze wùùnya ema hwà mà wòŋgìrzɛ̀nɛ̀ è Ndèma yà lì Akà Ɔ̀nɛ̀yi. Pìlatò rzìi a òhweyà hwaŋga hwatò nanù ema, “È Kiŋgɛ ya anyu ene!” 15Hwàŋga hwatò hwa tɛ nanù ema, “È mò òŋwe! È mò òŋwe! È mò wòmeya ò mbarza.” Pìlatò rzìi a hwa ijòwa nanù ema, “Nà wòmeya e kìŋgɛ ya anyu ò mbarza e?” Ipìlìrzì ndɛnɛ rzìi i tɛ ò ŋmanyu nanù ema, “I rza òhvi ehvɛhvɛ kiŋgɛ̀ lì aka tɛ Kàyìrzà.” 16Pìlatò rzìi a hwa ŋgbà Yerzù à mà hwa ɛ̀ndɛ hwa mò wòmeya ò mbarza.

Hwà mà wòmeya Yerzù ò mbarza

(Mat 27.32-44; Mak 15.21-32; Luk 23.26-43)

Àŋga ndi hwà mà wurzana Yerzù. 17Yerzù ŋmitɛ-ŋmitɛ à mà hwanɛ̀ e mbarza rzìi a e ɛ̀ndɛnɛ èki ema e hwɛ̀lɛ̀hwɛ̀, nanù ema, “Èki ya ekeke ya mèyòhvò” eŋge èki e hwɛ̀lɛ̀hwɛ̀ ndi Gòlgotà ò mbɔrzi ya Hibrù. 18Àŋga ndi hwa mà mò wòmeyà ò mbarza. Ò mà hwɛ hvɛ hwahvɛhvɛ hwatò hwahwàkɛ̀ ema hwa mà wòmàhwɛlɛ ò mbarza nà mɔ̀. Mɔ̀kɔ è èhvàrzù yɔ̀kɔ ɔ̀nɛyi hvɛ enɛyi è èhvàrzù Yerzù ò ìtììtènì jà awu.

19Pìlatò rzìi à tìla mòtìla ò ehwambò rzìi à è wòmeyà ò mbarza, ò ŋmanyu teŋyi lì aka èki ema mòòhvò mò ama Yerzù mò mà hwɛ. Mòtìla mò mà hwɛ nanù ema, “Yerzù mòtò wà è mbòwa yà Nàrzarɛ̀tì è Kìŋgɛ yà wònyà Yudà.” 20Èki ema hwa mà wòmeyà Yerzù ò mbarza è mà kòmbɛ̀nɛ̀ è mbòwà ndɛnɛ yà Jèrurzalɛ̀mù. Mòŋgò mòtìla mò mà tìlahwa ndi ò mbɔrzi yà Hibrù, ò mbɔrzi yà Latìnì nà ò mbɔrzi yà Grìki. Ò èŋgànɛ̀lɛ̀ rzayi-rzayi jà hwatò hwa mà laŋga mamɛ ema è mà tìlahwà. 21Ipìlìrzì ndɛnɛ rzi ì òhweyà Pìlatò nanù ema, “Ò rzi tìla nanù ema, ‘Kiŋgɛ yà wònyà Yudà,’ ò tìle ndi òma, ‘Onò mòtò à òhwi nanù ema, imba ndi nà hwèlì è Kìŋgɛ yà wònyà Yudà.’” 22Pìlatò rzìi à timbirzɛlɛ nanù ema, “Nà mà màa lì tìla mamɛ ema nà tìli.”

23Nà òma hwàanelì hwa njuma hwa mà kulɛ lì wòmeyà Yerzù ò mbarza hwa wòwa ì mbɔti jà eni hwa jì kahwa mòŋgò mànìì mòtò tɛ à wòwa lòŋgò lɔ̀kɔ. Hwa mà wòwa hvɛ è mbɔti ema à mà wɔ̀te ò tenì. Liŋgi lìhwatù lì rzi kɔlɔhwe tɔ̀ èki. Liŋgi lìhwatù lì rzi latahwe lì wòteyà ò ŋmanyu natɛ̀ɛ nà ò rze. 24Àŋga ndi hwa òhwalɛnɛ nanù ema, “I rza lì ŋyàawà. Ja aŋgbe ndi lìnjaŋgà jò ɔ̀ŋgɔ njɛnɛ a lì kùwàna.” Ène ema gbèyɛ̀nɛ ndi ò lì òndìrzɛ̀ mamɛ ema e ma tìlahwa ò Kaàti ya Lohwà nanù ema,

“Wɔ̀ hwiti hwà mà a kahwɛnɛ̀ màatù ma ami.

Rzi hwa aŋgbaanɛ hvɛ lìnjaŋgà ò lì kawa mòŋgòmbè mò ami.”

O èŋgànɛ̀lɛ̀ nanù ndi hwaŋga hwàanà njuma hwà mà gbèye. 25Yerzù nyàŋgɛ, nà nyàŋgɛ ŋmanyàŋgò wà eni, Màlìyɛ̀ jòjìyɛ̀ jà ama Klòpàrzì nà Màlìyɛ̀ Màdàlènì hwa mà tɛ̀mɛ̀ lì kòmbɛ̀nɛ̀ è mbarza yà ama Yerzù. 26Nà òma Yerzù à mà ɛnɛ nyàŋgò yà eni nà è mòòkòwèlì ema à mà lìŋgàne hwa tɛ̀mì aŋga rzìi à òhweyà nyàŋgɛ nanù ema, “Iyàkà è ŋmanà wà aŋgɔ̀ òŋgò.” 27Rzi à òhweyà hvɛ òŋgò mòòkòwèlì wà eni mɔ̀ hvɛ nanù ema, “Nyɔ̀ŋgɛ òŋgò.” Lìwòteyà èŋge hvònda òŋgò mòòkòwèlì à mà wòwa Yerzù nyàŋgɛ ò ndawò yà eni.

Yerzù à mà undɛnɛ

(Mat 27.45-56; Mak 15.33-41; Luk 23.44-49)

28O mburza nanù Yerzù à mà hwiya ema hweyà hwe arzɛ hwe ma kùwa. O lì òndìrzɛ̀ mamɛ e ma tìlahwa ò Kaàti ya Lohwà rzìi mɔ̀ à òhwa nanù ema, “Nà hwèya e nyìrzɛ̀.” 29O ma hwɛ kòmbò aŋga ema e ma ònda na mèkàkò me mimba. Rzìi hwa wòwà e kùcha hwa e ina ò tenì ya màŋga mimba hwa e lìŋgɛlɛ ò wòrzò wò ɛkɔ̀kɔ̀ ya hìrzɔ̀pì rzìi hwa mò rzɔ̀rzɛ̀lɛ̀ eyɔ ò wàna. 30Nà òma Yerzù à mà nyɔ hweŋge hwèkàkò hwe mimba, rzi a òhwa nanù ema, “O ku.” Rzìi à ujɛ mòòhvò rzìi a undɛnɛ.

Yerzù a uŋmahwi lìyɔ̀ŋgɔ̀ ò tòŋgòŋgò

31Wòŋgò wùnyà wò ma hwɛ ndi wùùnya wò mòòŋgòlelì mò Wùnyà wò lì Arziyòlɛ. Wònya Yudà hwa rzi arze nanù ema mòŋgò mìimba mò hwɛ ò mbarza ò Wùnyà wò lì Arziyòlɛ, rze hvɔni na òma wòŋgò wùnyà wò ma hwɛnɛ èluhwe ya tòwòtòwò. Àŋga ndi hwa uŋma Pìlatò nanù ema a hwa ŋgbe wònja ò lì hwɛndɛ meende me hwaŋga hwatò ema hwà mà wòmahwɛlɛ ò mbarza na lì hwa ulɛ ò mbarza. 32O èŋgànɛ̀lɛ̀ hwàanà njùma rzìi hwa ɛndɛ hwa hwɛndɛ meende me hwaŋga hwatò ema hwà mà wòmahwɛlɛ na Yerzù ò mbarza. Hwà mà lòma lì hwɛndɛ ŋmeende mò mòtò mɔ̀kɔ ndèŋgàna hwa ɛndɛ hvɛ lì hwɛndɛ hvɛ ŋmeende mò ma ɔ̀nɛyi mòtò. 33Ndi na òma hwà mà je òma Yerzù hwà mà ùŋmanɛlɛ nanù ema à mà màa lì ŋwa, ò èŋgànɛ̀lɛ̀ hwa rzi mò hwɛndɛ meende me eni. 34Ndi tɔ̀ nanù ŋmanèlì wa njuma mɔ̀kɔ à mà mò uŋmana lìyɔ̀ŋgɔ̀ ò tòŋgòŋgò ya eni. Lìwòkìmɛnɛ rzìi màyija na malìhwa rzìi ma wurza. 35È mòtò ema à mà ɛnɛ hwene hweyà na òma hwe ma gbèyɛ̀nɛ à mà tɛ̀mɛ̀ mbòŋgi, ndèŋgàna e mbòŋgi ya eni e hwèlì ndi e jɔ̀kɛ̀. A hwi nanù ema a òhwa ndi e jɔ̀kɛ̀, ndèŋgàna a òhwa ndi hwene hweyà nanù ema inyɔ hvɛ e lòkɛ̀. 36Hwenè hwèya hwà mà gbèyɛ̀nɛ ndi ò lì òndìrzɛ̀ mamɛ ema e ma tìlahwa ò Kaàti ya Lohwà nanù ema, “Tɔ̀ èerze ya eni yɔ̀kɔ e rza hwɛndɛhwɛ.” 37Ndèŋgana è tìlahwì ò Kaàti yà Lohwà nanù ema, “Hwa ɔ̀ŋgɔ è mɔ̀ ema à uŋmahwi lìyɔ̀ŋgɔ̀.”

Yerzù à làmìrzɛ̀hwɛ̀yi

(Mat 27.57-61; Mak 15.42-47; Luk 23.50-56)

38Ò mburza yà nanù, Jòrzɛ̀hvù ema à mà uwɛ̀lɛ̀lɛ̀yi ò mbòwa yà Àrìmàtìyà à mà òhweyà Pìlatò nanù ema à mò ŋgbe wònja ò lì wòwa èèmbè yà ama Yerzù. Jòrzɛ̀hvù à mà hwɛ ndi mòòkòwèlì wà ama Yerzù ndi à rza àwùŋmɛ̀lɛ̀ mɔ̀ ŋmìti èhwanja à mà òka hwatò hwa wònyà Yudà wɔ̀ŋgɔ̀. Pìlatò à mà mò ŋgbà è wònjà ò lì wòwa èèmbè yà ama Yerzù. Ò èŋgànɛ̀lɛ̀ à mà ɛndɛ lì wòwa èèmbè yà ama Yerzù. 39Nikòdemòrzi mɔ̀ hvɛ ema à mà lòma lì ɛndɛ lì ɛnɛ Yerzù wuu ama ɛndɛ nà Jòrzɛ̀hvù. Ndèŋgana hwa e ɛndɛ Nikòdemòrzi a wòwa hwèlòŋgìrzànì ema hwe ma gbeyàhwɛnɛ na mayi na alɔrzi ò lì rzeeya mìimbà. Liŋgi lìyɔki lì ma hwɛnɛ mòrzimbɔ mò eyà ya rzàyiyàwò ja kilò na ita. 40Hwa mà wòwa ŋmììmbà mò ama Yerzù rzìi hwa mò lìŋgɛ̀lɛ̀nɛ hweŋge hwèlòŋgìrzànì nà lìhwàtù là mbɔ̀mi. Nànù ndi ɛ̀ɛ̀mɛ̀ yà wònyà Yudà ema hwɛ ò lì rzèeyàneyà èèmbè. 41Èki hwa mò wòmeyà Yerzù ò mbarza è mà kòmbɛ̀nɛ̀ hvaya. Ò mà hwɛ rzɔ̀ŋgɔ hvènya ò tenì yà eŋge hvaya ema è rzìi ikahwi tɔ̀ èembè aŋga. 42Ò èŋgànɛ̀lɛ̀ rzɔ nà òma wòŋgò wùnyà wò mà hwɛ ndi mòòŋgòlelì mò wùnyà wò lì arziyòlɛ, ndèŋgàna èŋge rzɔ̀ŋgɔ̀ ema kòmbɛ̀nɛ̀ aŋga, hwa mà ika ŋmììmbà mò ama Yerzù aŋga.

Выбрано:

Yòwanìrzɛ̀ 19: bri

Выделить

Копировать