Yòwanìrzɛ̀ 17

Yerzù à mà akànɛlɛlɛ mɔ̀ ŋmìti

1Nà òma Yerzù à mà kulɛ lì òhwa hwenè hweyà, à mà ɔ̀ŋgɔ ò ŋmanyu yà lohwà rzìi a òhwa nanù ema, “Tatà e hvònda e ma ja, uŋmɛ̀lɛ̀ hwatò èluhwe ya ama è Ŋmanà wà aŋgɔ̀, aŋga nanù è Ŋmanà wà aŋgɔ̀ mɔ̀ hvɛ a ò uŋmɛ̀lɛ̀ èluhwe. 2Èhwanja ò mò ŋgbelì wònjà lì kànèyà hwatò hwa arzɛ ò lì arza nanù ema a ŋgbè hwaŋga ema ò mò ŋgbelì lòŋgɛ la gbìndèyà. 3Lòŋgɛ la gbìndèyà lì hwèlì ndi nanù ema wɔ̀ hwa ò hwiye, ò wa ema ò hwèlì Lòohwà la jɔ̀kɛ̀ na ò lì hwiya Yerzù Krirztò ema ò wa ò òmi. 4Nà ma uŋmɛ̀lɛ̀ èluhwe e aŋgɔ anù rze na òma nà mà kulɛ èwòlò ema ò wa ò nò ŋgbelì ò ma na gbeye. 5Ìi Tatà wuluhwa èluhwe ya ami ò èki ema ò wà witi ò hwèlì, mòlemilemi mò èluhwe ema nà mà hwɛnɛ na ò hwa ndèŋgàna hwewòtelì hwe ene rze.

Yerzù à mà kànɛlɛlɛ hwà-òkòwèlì hwa eni

6“Nà gbèyi hwatò hwa ene rze ema ò nò ŋgbelì nanù ema hwa ò hwiye. Hwà mà hwɛ ndi e hwa aŋgɔ, ò ma nò ŋgbà e wɔ̀, ndèŋgàna hwa hwèlì ò lì gbeyà na òma ò ma hwa òhweyà ò lì gbeyà. 7Ndi ò naŋgɛ nanù hwa hwi ema tɔ̀ mamɛ ò ma nò ŋgbe e uwɛ̀lɛ̀lɛ̀yi ndi na ò wa. 8Nà hwa òhwèlì mamɛ ya arzɛ ò nò òhwèlì ò lì hwa òhweyà rzìi hwa lòkɛ̀yi hwene hweyà, hwa hwi na e tɛ̀ɛtɛ nanù ema na uwɛ̀lɛ̀lɛ̀yi ndi ò mba aŋgɔ ndèŋgàna hwa lòkɛ̀yi hvɛ nanù ema ò wa ndi ò nò òmi. 9Nà hwa kànɛlɛlɛyi. Nà rza kànɛlɛlɛ hwatò hwa e rze ndi na kànɛlɛlɛ ndi hwaŋga ema ò nò ŋgbelì, èhwanja hwa hwèlì ndi e hwa aŋgɔ. 10Hwatò hwa arzɛ ema na hwɛnì hwa hwèlì ndi e hwa aŋgɔ, ndèŋgànɛlɛ e hwa aŋgɔ hwa arzɛ ema ò hwɛnì wɔ̀ hvɛ hwa hwèlì ndi e hwa ami, ndèŋgàna hwa wuluhwa èluhwe e ami. 11O naŋgɛ na jà lì ò ùŋmanɛlɛ, ò ŋmanà hvònda na rza ò hwɛ hvɛ ò rze ndi wɔ̀ hwa hwèlì nanù mɛnɛ anù rze. Ìi Tatà wa Wòtani! O wa ò hwa kòmbɛ ò e ŋginyà ya lìna la aŋgɔ, lìinà ema ò ma nò ŋgbe, aŋga nanù hwa hwɛ mòtò mɔ̀kɔ na òma irzɔ na òhwa i hwèlì mòtò mɔ̀kɔ. 12È hvònda nà mà hwɛ na wɔ̀ nà mà hwa kòmbɛ ò e ŋginyà ya lìinà la aŋgɔ, lìinà ema ò ma nò ŋgbe. Nà ma hwa kòmbɛ, ò rza enje tɔ̀ mɔ̀kɔ ema a wɔ̀ɔ lì aka tɛ e mòtò ema à mà hwɛnɛ lì wɔ̀ aŋga nanù e gbèyɛ̀nɛ na òma e tìlahwì ò Kaàti ya Lohwà. 13O naŋgɛ na e jèeyà. Nà òhwa ndi hwenè hweyà na òma e hwèlì nanù mɛnɛ ò rze aŋga nanù mɔ̀nyɛ̀ŋgì mò awù mo òndìrzɛ̀hwɛ̀yi, mòlemilemi na òma e mò ami mò òndirzɛhwɛyi. 14Nà ma hwa òhweyà hweyà hwe arzɛ ema ò ma nò òhweyà ò lì hwa òhweyà. Nàŋgɛ rzɔ hwatò hwa ene rze hwa hwà kɔwu, èhwanja hwa rza enje hwatò hwa ene rze hvɛ. Nà òma imba hvɛ na rza enje wa ene rze. 15Nà rza o òhwèlì nanù ema ò hwa ulɛ ò rze, ndi na òhwi ndi nanù ema ò hwa kòmbɛ ò lì arza nanù ema e Mòtò wa Wòhwe a rzi ja lì hwa gbeyà wòhwe. 16Tɔ̀ nanù ema na rza enje mòtò wa ene rze, wɔ̀ hvɛ hwa rza enje hwatò hwa ene rze. 17Gbeyana e jɔ̀kɛ̀ ya aŋgɔ aŋga nanù hwa tanɛ lì ò gbèeyà. Èya ya aŋgɔ e hwèlì ndi jɔ̀kɛ̀. 18Nà hwa òmi ò rze, na òma ò ma nò òme ò ene rze. 19Wɔ̀ hwa èŋgànɛ̀lɛ̀ nà mà aŋgbɛ imba mbiti ò lì ò gbèeyà ò lì arza nanù ema wɔ̀ hvɛ hwa aŋgbɛ wɔ̀ hwiti ò lì ò gbèeyà.

Yerzù à mà kànɛlɛlɛ hwatò hwa arzɛ ema hwa mò lòkɛ̀yi

20“Nà rza kànɛlɛlɛ ndi hwà-òkòwèlì hwa ami mɛnɛ ndi na kànɛlɛlɛ hvɛ e wɔ̀ ema hwa nò lòkɛ̀yì èhwanja hweyà ema na òhwa hwà hwe hweyàna. 21Ìi Tatà, na kànɛ nanù ema wɔ̀ hwa hwɛ mòtò mɔ̀kɔ. Inyɛ̀ hwa hwɛ mɔ̀kɔ na irzɔ na òma ò wa ò hwèlì mɔ̀kɔ na imba ndèŋgàna na òma imba na hwèlì mɔ̀kɔ na ò wa. Inyɛ̀ hwa hwɛ mòtò mɔ̀kɔ aŋga nanù e rze e lòkɛ̀ nanù ema ò wa ndì ò nò òmi. 22Nà hwa ŋgbelì mòlemilemi mò èluhwe ema ò nò ŋgbelì aŋga nanù hwa hwɛ mòtò mɔ̀kɔ na òma irzɔ na ò wa i hwèlì mòtò mɔ̀kɔ. 23Imba na hwèlì ndi mɔ̀kɔ na wɔ̀ ò wa hvɛ ò hwèlì ndi mɔ̀kɔ na imba, aŋga nanù hwa kuwa lì hwɛ mòtò mɔ̀kɔ. Hwa ò kuwa lì hwɛ mòtò mɔ̀kɔ aŋga nanù e rze e hwiya nanù ema ò wa ndi ò hwèlì e mɔ̀ ema a nò òmi, hwa hwiya hvɛ nanù ema ò hwa lìŋgàni na òma imba hvɛ na ò lìŋgàni. 24Ìi Tatà ò nò ŋgbelì e wɔ̀, na arza nanù ema, hwa hwɛ na imba èki ema imba na hwèlì, aŋga nanù hwa ɛnɛ èluhwe ya ami. O ma nò ŋgbà èluhwe èhwanja ò ma nò lìŋgana ndèŋgàna e rze ye e wekahwa. 25Ìi Tatà ò tɛmi ehve-ehve. È rze e rza ò hwi ndi imba na ò hwi, rzìi hwanù hwa hwi nanù ema ò wa ndi ò nò òmi. 26Imba na gbèyi nanù ema hwa ò hwiye, na ɛ̀ndɛ ndi ò wòrzò lì gbeyà nanù mɛnɛ, aŋga nanù e ndìŋgɛ ema ò nò hwɛnɛni e ò hwɛ ò tenì ya awu, ndèŋgàna imba hvɛ na hwɛ na wɔ̀.”

Выбрано:

Yòwanìrzɛ̀ 17: bri

Выделить

Копировать