मती 11
11
ईसू अरू बतिसमा एमेयीग होड़ एहुना
(लूका 7:18-35)
1ईसू आँयग चेलाकू चेड उरियावनेनखन हंडा अते गलील छतरराः एटाः एटाः सहरकूनरे परसारतेडखन होड़कूय चेडतेरा।
2हनमेला एहुना जेहेलरेय दोहोना अरू ईसू एचेतेरा हना बुताकून हाँय अयूमतेरा दो, हाँय आँयग चेलाकू ईसू एचेरे वारतेडकूखने एचे होंबोरतेडकुःआ, 3“वेग लगाय दोहोना हाँय अनम हवे जा? अले एटाः होड़ लगा ततंगी इदा जा?”
4ईसू कता कुदातेरा, “अपे अयूमकेरा अरूपे ञेलकेरा हना एहुना एचेरेपे कता उदुःगे। 5अंधाकू ञेलतना, टुठा होड़कू सेनतना, कुड़गा होड़कू नपाययना, भइरा होड़कू अयुमेतना, गोएगतो होड़कू जियाव रिमुःतना अरू गरीब होड़कू एचेरे नपाय सरवनकू परसारगेतना।#एस 35:5-6; 61:1 6दो ईंग बदीरे बिसवासरे बड़ियाड़कू दोहोनता हँकुःआ होड़कूराः जीव-जहन भगवान भलावाता।”
7एहुनारिकुःआ चेलाकू हंडा अतेकू सेनेडा दो, ईसू एहुनाराः बदीरे होड़कू एचेरेय कताया, “अपे चिला ञेल लगा टयंगाब ततेररेपे सेनेडा? होयते डोलाःता हना सरपी इया होड़ ञेल लगापे सेनेडा जा? 8चिला ञेल लगापे उडुंगनेना? अपे नपाय सोनहेय तुसिंगतेरा हाँयग होड़ ञेल लगापे सेनेडा जा? बुरी। नपाय नपाय सोनहेकू तुसिंगता हँकू दो, राजा ओड़ाःरेकू दोहोनता। 9दो अपे चिला लगापे सेनेडा? अपे भगवानराः बड़रा कतायीग होड़ ञेल लगापे सेनेडा जा? हाव। ईंग अपे एचेरेयिंग कतायतना, एहुना जमा भगवानराः बड़रा कता होड़कू अते हों मरंगीग हवे। 10नाँयग होड़ बदीरे भगवानराः कागदरे नाःआ इया ओजाःतो इदा,
अयुमेमे, ईंग इनिंग बराहील आम अते मड़ंगिंग वारेयता,
अरू हाँय आम मड़ंगरे सेनेकियानखन, आमराः दूरे संजोड़गोडता।”#मला 3:1
11“अपे ईंगपे अयूम, नुँहू वरी चउंदीसरेकू जनमावकिया, हँकुःआ जमा होड़कू अते एहुना मरंगीग हवे। मनदो भगवानराः राइजरीग हुनुडिंगीग होड़ हों एहुना अते मरंग इदानिया। 12बतिसमा एमेयीग होड़ एहुनाराः बेला अते नुँहू वरी भगवानराः राइजरे मुरुक बगरा होड़कू रेनहा-पेलहाकू बोलतना अरूकू हातपातगेतना। 13एहुनाराः बेला वरी होयानेना हना कताकून, मोसेसराः नियमकूनरे अरू भगवानराः बड़रा कता होड़कूराः कागदरे हों ओजाःतो इदा। 14अरू नाःआ कतापे बिसवासगेता जा कोवान, कुदा वेग लगापे ततंगीःआ हाँयग इलियाह, एहुना हवे। 15अयूम अवेयता हाँयग होड़, नपायतेय अयूम ठुड़ावागे।”
16दो ईसू अरूय कतातेड, “नाःआ जूगरिकुःआ होड़कू इये सुदा ईंग अउल-तउलकू? नँकुःआ होड़कू बजाररेकू दुड़ुःता हँकुःआ लइंकू उड़ी इदानकुःआ अरू अँनकूरिकुःआ सउंगताकू एचेरेकू कतायता,
17अले अपे लगा सोहनाईले बजाःआ,
मनदो अपे मेरपे सूनगान।
अले अपे लगा फिकीर सेरेंगले सेरेंगा,
मनदो अपे मेरपे इयामगान, माःआन।
18बतिसमा एमेयीग होड़ एहुना, एटाः होड़कू इया मेरेय जोमगाड अरू मेरेय ञूगाड। मनदो हँकू कतायतना, हाँय एचेरे भूत इदा, माःआन। 19मनदो मनुवारीग बेटात जमाकूने जोमा अरूय ञूःआ अरू हँकू कतायतना, माँय हरहा होड़ हवे अरू कसूर होड़कू अरू मलगुजारी गोः होड़कूरीग सउंगता हवे, माःआन। मनदो भगवानराः कनहून इयाकू सलाःता हँकुःआ होड़कू नपाय दूररेकू सलाःता।”
ईसूराः सेताव
(लूका 10:13-15)
20ईसू बयाव जुवाः इयाःआ बुताकूने एचेकेरा हना सहरकूनरिकुःआ होड़कू अँकूराः कसूर अते जीव मेरकू कुदागाड। हनालगा ईसू हँकुःआ होड़कू बदीतेडखने कताया, 21“ने कोरेसीन सहररिकुःआ होड़कू, अरू ने बेतसइदा सहररिकुःआ होड़कू, अपे दोपे ठीकयना, अपेराः जीव नपाय ओरो दोहोनेना। अपे तलारे भगवान बुतातेरा हना जंगरराः बुता, सूर अरू सइदा सहररिकुःआ होड़कू तलारे होयाःकुः दो, हँकू ओहेन बोराराः सोनहेकू तुसिंगकेःआ अरू ओबरे दुड़ुःकियानखन कसूर अते जीवकू कुदाकेःआ। 22हनलगा फड़ियावराः दिनरे भगवान कोरेसीन सहर अरू बतसइदा सहररिकुःआ होड़कू, सूर सहर अरू सइदा सहररिकुःआ होड़कू अते मुरुके डंडियावकूता। 23अरू ने कपरनहूम सहररिकुःआ होड़कू, अपे नाःआ इयापे ओंगलेतना जा, भगवान अले सेरमो देस अगीय गोःयालेता। बुरी! हाँय दो अपे पतालपूररेय वारगोडपेता। भगवानराः जंगर बुतापे ञेलतेरा, हना इया सोदोम सहररिकुःआ होड़कू एचेरे भगवान एचेगोडकेःआ दो, हना सहर तिसिंगाः दिन वरी दोनोहोकुःआ। 24मनदो फड़ियावराः दिनरे भगवान कपरनहूम सहररिकुःआ होड़कू, सोदोम सहररिकुःआ होड़कू अते मुरुके डंडियावकूता।”
होड़कू लोड़ोन लगा ईसू एमेयता
(लूका 10:21-22)
25दो हनमेला ईसू कतातेरा, “ने सेरमो देस अरू चउंदीसरीग मालिक, ईंगरीग अपांग भगवान, ईंग आमिंग धनियाबादतना। आम नाःआ कताकून, कनहूनदारकू अरू सुदीदारकू अतेम ओकोतेरा अरू लइंकू इया होड़कू एचेरेम उदुःकेरा। 26हाव, ने अपांग भगवान, नाःआ अनमराः नपाय मरंगाः हिछा इया इदाना।
27ईंगरीग अपांग भगवान ईंग एचेरे जमाकूने जिमाकेरा। सनातायते अपात अड़ाःकेडखन तोनोंगीग होड़ बेटात मेरेय सुदीयता, अरू बेटात अड़ाःकेडखन तोनोंगीग होड़ अपात मेरेय सुदीयता। भगवान सुसुदी लगा बेटात सुनावकूता, हँकुःआ होड़कू एकला भगवानकू सुदी अवेता।
28ने भजल-तकल अरू बोझारे इदानपेःआ होड़कू, अपे ईंग एचेरेपे वेग, दो ईंग अपे लोड़ोन लगायिंग एमेवापेता। 29ईंग सुधा इदानिंगा अरू ईंग इनिंगते हुडिंगिंग ओंगलुःता। हनालगा ईंगराः जुवट अपे सेरमोपे रेमया अरू ईंग अतेपे चेडुः दो, अनपेराः जीव लोड़ोनता। 30ईंगराः जुवट गोः लगा रिता इदा अरू ईंगराः मोटा हलुका इदा।”
Выбрано:
मती 11: kfp
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© (Active) Wycliffe Bible Translators, Inc. All rights reserved.
