मती 10
10
ईसूरिकुःआ बारहगोटोंग मूक चेलाकू
(मरकूस 3:13-19; 6:7-13; लूका 6:12-16; 9:1-6)
1हनते ईसू आँयगरिकुःआ बारहो मूक चेलाकू अनँयग एचेरेय राःतेडकुःआ अरू हँकू भूतकू उडुंगकू लगा अरू जमा बरानाः बेमरियाकू नपायकू लगा हातपाते एमेवातेडकुःआ। 2हँकुःआ मूक चेलाकूराः ञावकून ननानाः हवे;
मड़ंगीग सिमोन (हाँयराः एटाः ञाव दोहोना पतरस),
अरू आँयगरीग बोहोत अंदरियास,
जबदीरीग बेटात एकूब
अरू आँयगरीग बोहोत एहुना,
3पिलिपूस,
बरतुलमाय,
तोमा,
मलगुजारी गोः होड़ मती,
हलपाइरीग बेटात एकूब,
तददे,
4सिमोन कनानी#10:4 एहूदाकूराः मीटोंग गउदारिकुःआ होड़कू दोहोना कनानी। हँकू रूमी देसरिकुःआ होड़कू अते अजइतकू पवाः लगाकू कड़ीगा। अरामिया भासीरे मीटोंग लबद हवे कनानी अरू हनानाः लबद उनानी भासीरे जेलोतीस माःआनकू कतायता। (लूका 6:15),
अरू तयोमरे ईसूय एचे साबतेरा हाँयग जूदा इसकरियोती।
5नँकुःआ बारहो मूक चेलाकू ईसू नाःआ हुकुम एमेवातेडकूखने वारतेडकुःआ, “बेगर एहूदाकू एचेरे सहे समरिया छतररिकुःआ होड़कू एचेरे अलोपे सेन। 6मनदो अपे इसराएल जइतरिकुःआ केड़ेत भेड़ाकू इया इदानकुःआ हँकुःआ होड़कू एचेरेपे सेन। 7अपे सेनेन मेला नाःआ इया परसारकेडखनपे कताय, भगवानराः राइज अपे तलारे बुँहड़ीकिया, माःआन। 8हसूत होड़कूपे नपायगोड, कुड़गा होड़कूपे नपायगोड, गोएगतो होड़कूपे जियाव रेमगोड अरू होड़कू अते भूतकू एचे उडुंगगोडकूपे। अपे बेगर दामतेपे पवावकिया हना अपे बेगर दामते होड़कूपे एमेगोडवा। 9अपे सेन मेला पेटाररे सोना, चाँदी सहे तंबा अलोपे गोः। 10तोनोंगाः बुताय बुताता हाँयग होड़के हनानाः बुताराः बनी पवाः जुकूर इदानिया।#1 कुरि 9:14; 1 तिमु 5:18 हनालगा अपे सेन दूर लगा झोला सहे बारगोटोंग अंगा सहे चाटी सहे हाप हों अलोपे गोः।
11अपे तोनोंगाः सहररेपे बोल दो, हना सहररीग नपाय होड़पे ञामवा अरू हना सहर अते अपे अरीन सेन वरी हाँय सुदापे दोहोन। 12अपे तोनोंगीगराः ओड़ाःरेपे सेन दो हना ओड़ाःरिकुःआ होड़कूपे सलामगोड। 13हना ओड़ाःरिकुःआ होड़कू नपाय जीव होड़कू दोहोन दो, हँकुःआ होड़कू अपे अते भगवानराः सलसतकू पवाःता। मनदो हना ओड़ाःरिकुःआ होड़कू नपाय जीव होड़कू मेरकू दोहोन दो, भगवानराः सलसत अपे एचेरे कुदा जुवाःता। 14अरू तोनोंगीग अपे मेरकू नेत-नेवारपे अरू अपेराः कता मेरकू अयूमगे दो, हँकूराः सहर सहे ओड़ाः अते अपे उडुंग मेला अपेराः काट अते धुंदराकून कोटा एंडा अटूपे। 15अपे ईंगपे अयूम! फड़ियावराः दिनरे नाःआ सहररिकुःआ होड़कू, सोदोम अरू गोमोरा सहररिकुःआ#रेःएत 19 बेलूर होड़कू अते बगरा डंडकू पवाःता।”
अनँयग मूक चेलाकू ईसू सेतावकूतना
(मरकूस 13:9-13; लूका 21:12-17)
16सवासितीपे दोहोना। रमू बुःआकूराः तलारे भेड़ाकू इयायिंग वारपेतना। हनालगा अपे बींगकू इया कनहूनदारकूपे दोहोन अरू पेरवाँकू इया बेगर गारबारतेपे दोहोन। 17अपे बेलूर होड़कू अते सवासितीपे दोहोन। हँकू अपे पंचाइतरेकू जिमापेता अरू अँकूराः अरजी ओड़ाःकूनरे अपे गुरुंदतेकू ञेडपेता; 18अरू ईंग ञाव बदीरे राजाकू अरू हातपात होड़कू मड़ंगरे अपेकू ओर गोःयाता। हनमेला अपे हँकू एचेरे अरू बेगर एहूदाकू एचेरे ईंगराः हिदइतदारकूपे दोहोनता। 19हँकुःआ होड़कू कोट कछेरीरे अपेकू इदीता हनमेला अपे चिला कता इदा हना बदीरे अपे अहापे ओंगोल दोहोगे। हनमेला अपेके हँकू सुदा बड़रा लगा कनहून भगवान एमेवापेता। 20नाःआ कता अपे उहियार दोहोका, अपे अँननपे मेरपे बुतुड़ुता। मनदो अपेरीग अपांग भगवानराः बिरुवा, अपे कता लगा इदा हना कता अपे जीवरेय उदुःवापेता।
21वगत अनँयग बोहोत एचे साबकेडखन अरू अपात बेटात एचे साबकेडखन ञेड एंडाय लगाकू जिमागेयता। अरू लइंकू अँननकूरिकुःआ एंगा-अपा घंटावकेडखनकू ञेड एंडागोडकूता। 22अरू ईंगराः ञाव अते जमा होड़कू अपेकू हिनइस-बिनइसवापेता। मनदो अरीन टुटीगगुः वरीय सनाहाव ञवन हनाँयग होड़ भगवान सडावगेयता। 23अपे दोहोनता हना सहररे होड़कू अपेकू संतावपे दो, हना सहर अते एटाः सहर अगीपे ञीर जुवाः। अपे ईंगपे अयूम, अपे इसराएलराः जमा सहरकूनरे अरीनपे दँड़ा पुरावगे अते मड़ंग, मनुवारीग बेटात वेग जुवाःता।
24तोनोंगीग चेला अनँयगरीग चेडदार अते मरंग मेरेय बड़ाँःता। अरू तोनोंगीग सेवकिया अनँयगरीग मालिक अते मरंग मेरेय दोहोनता। 25मनदो चेला चेडदारतेन सुदा अरू तोनोंगीग सेवकिया आँयगरीग मालिक सुदा बरोबइरगुः दो हाँय संतोकगे लगा इदा। हँकुःआ होड़कू, ओड़ाः मालिकतुकू दरहा माःआनकू कतावायता दो, ओड़ाःरिकुःआ एटाः होड़कू चिला लगा मेरकू ओपताकेःआ?
परबू सुदापे बोर
(लूका 12:2-7)
26एटाः होड़कू अते ओकोकेडखनकू पसावगोडता हन कताकून भगवान उडुंगगोडता, अरू ओकोत बड़रा भगवान जमा होड़कूय एचे सुदीगोडकूता। हनालगा अपे होड़कू सुदा अहापे बोर। 27ईंग अपे एचेरे अंदरारेयिंग उदुःवापेतना, हना बड़रा अपे मरसलरेपे कता उदुःवाकू। अरू अपे अँननपेराः लुतूररे जहड़ घड़ीनपे अयूमकेरा हना बड़रा सड़ुम चोटतेपे परसारगे। 28अपेराः देहकू ञेड एंडाता, मनदो अपेराः बिरुवा ओरोकू गोएग अवेतेरा हँकुःआ होड़कू सुदा अलोपे बोर। मनदो अपेराः बिरुवा अरू देह दगलीकून नरगरेय लाय एंडा अवेता हनाँयपे बोरोवा। 29अपे जमाकूपे सुसुदीतना, मीटोंग रिचकी ढिबुवाते बारटोंग गोरेलाकिनबू किजाता। मनदो अपांग भगवानराः बेगर ओंगोलते मीटोंगीग गोरेला हों ओरोय कसड़नेना। 30अपेराः बोःराः मेमेडटोंग ऊब हों भगवान गँड़ाव दोहोकेराय। 31हनालगा अपे अलोपे बोर। अपे गोरेलाकू अते हों मरंग इदानपेःआ।
ईसू एचेरे बिसवास
(लूका 12:8-9)
32हनते ईसू अरूय कताया, “अपे ईंगपे अयूम! तोनोंगीग होड़, होड़कू मड़ंगरे ईंगे मान मरजइत दो, ईंग हों सेरमो देसरीग अपांग भगवान मड़ंगरे हाँयग होड़िंग मान मरजइतगेयता। 33मनदो तोनोंगीग होड़, होड़कू मड़ंगरे ईंगे आड-बेकारवा दो, ईंग हों सेरमो देसरीग ईंग अपांग भगवानराः मड़ंगरे हाँयग होड़िंग आड-बेकारवायता। 34अपे नाःआ इयापे ओओंगोलतना जा, नाँय चउंदीसरिकुःआ होड़कू एचे राजू नमाकू लगाय वेगकिया, माःआन? ईंग होड़कू एचे राजू नमाकू लगा मेरिंग वेगगना। ईंग होड़कू एचे हिगार हटिंगकू लगायिंग वेगकिया। 35अपात बेटात अते अरू बिटीत एंगात अते अरू किमिनतो आँयगरीग हनहारतो अते एटाःगोडकू लगायिंग वेगकिया। 36अनँयगराः ओड़ाःरिकुःआ होड़कू, मी होड़रीग मुदइए दोहोनता।#मीका 7:6
37अनँयग एंगात सहे अपात, ईंग अते बगराय दुलारगेयता हाँयग होड़, ईंग जुकूर कोवाया। अरू ईंग अते बगरा, बेटात सहे बिटीते दुलारता हाँयग होड़ हों ईंग जुकूर कोनोवाया। 38अरू अनँयग कुरूस रेमकेडखन ईंग तयोम मेरेय सलाः दो, हाँय हों ईंग जुकूर कोनोवाया। 39मी होड़ अनँयग जीव बनसाव लगाय चहाः दो, हनाँयगराः जीव लाय एंडा जुवाःता। अरू ईंग लगा अनँयग जीवे लायगोडता हनाँयग होड़राः जीव भगवान बनसावगोडता। 40अपेकू नेत-नेवारता हँकुःआ होड़कू ईंगकू नेत-नेवारता, अरू ईंगकू नेत-नेवारता हँकुःआ होड़कू ईंगे वारकेरा हाँयग भगवानकू नेत-नेवारता। 41भगवानराः बड़रा कता होड़े नेत-नेवारता हाँय, भगवानराः बड़रा कता होड़राः इमान भगवान अगीतेय पवाता। तोनोंगीग बेगर गारबार होड़ माःआन मनेवाडिगखने नेत-नेवारगेयता दो, हाँयग होड़ बेगर गारबारीग होड़राः इमान भगवान अगीतेय पवाःता। 42अपे ईंगपे अयूम! तोनोंगीग होड़ ईंगरिकुःआ चेलाकू अते मी होड़ हुडिंगीग चेला लगा दाः ञूय लगाय एमेवाय दो, हाँयग होड़ भगवान अगीते इमाने पनावाःता।”
Выбрано:
मती 10: kfp
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© (Active) Wycliffe Bible Translators, Inc. All rights reserved.
