Yoosuwa 11
11
YAABIN KEE KAA'LIH GACTE MALIKWAK ELLE YEYSEN INNA
1Israayil mari qeebil gee iisa, malik Yaabin deqsita malikiy Caxor deqsitta magaalal yenehiyya yoobbe. Too waqdi malik Yobab deqsita malikiy Madon deqsitta magaalal yenehiyya kee, Simron kee Aksaf deqsitta magaaloolih malikwa kee, 2tonnah kaadu, kilbat le kabuk woo qaleelah tan baaxol malikwah yen mara kee, Galiil deqsita badak gabbi qaxak Ordon weeqaytih qaxat raqta baaxoh malikwa kee, mango koomaami le baaxo kee Door deqsitta magaalah xaqul tan baaxoy baddi afal tanihiyyah malikwah inkih farmo ruube. 3Qagteh kaadu, Kanqaan baaxoh maray ayrô-culma kee ayrô-mawqat raaqahiyya kee, Amoorah yooboke maraay, Ciitah yooboke maraay, Feriidah yooboke maraay, Yabuusah yooboke maray woo qaleelah tan baaxol guubuh yenehiyya kee, tonnah kaadu, Ciiwih yooboke maray Cermon qaleh ragidil Mixfa deqsitta baaxol guubuh yenehiyyah edde farmo ruube. 4Too mari inkih tan qaskaray mangah baddi afih qiddeytih gide takkehiyya luk yemeeten. Toh lih kaadu mango faariisa kee faaris beyta gaariira luk yemeeten. 5Too amoytitte kee ken qaskar tikka 'yaanamaak Israayil marat qeebi akak aboonu waan Meerom weeqaytu deqsita aracal yinfiddigen.
6Too waqdi YALLI Yoosuwak iyyemii, «Keenik mameysitin. Ah yoo YALLAAY; beera ta uddur, Israayil marih foocal, tikka 'yaanamaak sella ken heeh sugeyyo. Tohuk lakal faaris-gaariira keenik cararisettoonuuh, faariisak arqo keenik argiqetton» kaak iyye.
7Tohuk lakal Yoosuwa kee kay qaskar Meerom weeqaytul too mara garciik yanin waqdi, qeebi keenit aben. 8YALLI Israayil mara qeebil keenik yiysiiseh, ken gabal ken hee. Israayil mari Misrafot-Mayim kee Sayda deqsitta baaxo fan ken ayradduk been. Tohuk kalah kaadu Mixfâ Golo deqsitta baaxoy ayrô-mawqa le kabut raqtahiyyah amma 'yaanam fan xiiriyak ken been. A maray Israayilik naqboytiitih yenehiyya saabo cabba haam fanah qeebi gexak suge. 9Yoosuwa YALLI a marak aba iyyeh kaa elle amrissa hee innal, faariisak keenik arqo yirgiqeeh gaariirat gira ruube.
10-11Too saaku Caxor deqsitta magaalal yen malik, Caxor magaalah dariifal enna 'ta baaxol inkih ackamuk yen. Edde sugen carbik gaba kalla heen waqdi, Yoosuwa kee kay mara Caxor magaala yabbixeeni'gidih gexen. Magaala yibbixeeniih, teetil suge malik qideenih. Wokkel suggu 'ye marak num macabinnoonuy seefit selen. Magaala kaadu carriseenih.
12Yoosuwa amoytitte elle sugte magaalooli kee woo magaaloolih malikwa inkih yibbixeeh; Muusay YALLIH naqasuh yenehiyya elle inxicca 'ye innal, tokkel suggu 'ye mara inkih qideenih. 13Takkay immay woo fayya 'ta'kkel ten magaaloolik Caxor deqsitta magaalay Yoosuwa gira edde ruubehiyyak kalihim macarrisinnon. 14Israayil mari woo yibbixen magaaloolil sugga 'te meqe duyye kee saqak tu macabinnoonuy isinnih beeten. Ummattakaay tu macabinnoonuy inkih qiden. 15YALLI ah abaana'gidih, amri Muusal oobiseeh; Muusa kaaduuy woo amri Yoosuwah warseeh; Yoosuwa too amri duuduseh. Yoosuwa, YALLI Muusa amrissa heem inkih yugdube.
YOOSUWA YIBBIXE BAAXOOXA
16Yoosuwa baaxo inkih yibbixe. Qaleela le rasu kee, mango koomaami le rasu kee, tikki 'ta Gosen deqsitta baaxo kee, Gosenik gabbi-qaxat raqta baaxoy bacarih tani kee, Ordon weeqaytih agantah yibbixeh. 17-18A baaxo xexxaarah Calak deqsitta qaley Edom baaxoh garit tanik xabba haanamaay Baqal-Gaad deqsita aracay Lubnaan-Daqaral yanihiyyah amma 'yaanam fanah xexxar kee nabnah akkuk ten. Lubnaan-Daqar Cermon qalek ragidit raaqa. Yoosuwa ta baaxooxah amoytittet qeebi mango wakti fanah abak suge. Takkay immay inkih qeebit ken yibbixeeh ken qide. 19Israayil mara lih qalla haysittem, dibuk Gibqon magaalah marak teneeh; too magaalal Ciiwi deqsita marak tu takkem ten. Raqqa 'ye mara inkih edde yibbixeenim carbik ten. 20YALLI a mari inkitanuuk Israayil marih gabat akah yambaxeeniih; Israayil mari saabo ken akah cabsiisa innah, Israayil marih qeebit ken ugse. YALLI dumaak, «A marah maracmatina; qeebit selli hee ikkal macabina» 'yaanam Muusa amriseh yen.
21Too saaku Yoosuwa gexxa 'yeh woo qaleelah tan baaxok Cebron kee Dabiir kee Qanab deqsitta magaalooli kee, tonnah kaadu, Yuuda kee Israayilik qaleelah tan baaxol sugga 'ye Qanaakim deqsita xeeruk yen marih nasab bayseh. Yoosuwa too mari elle yen magaalooli kee ken amoh bayse. 22Israayil baaxoh bagul Qanaakim deqsita marak num maraaqinna. Dago mari keenik Gaada kee Gat kee Asdood deqsitta magaaloolil raaqe.
23Tonnal YALLI Muusa akah amrise innal, Yoosuwa woo baaxo yibbixeh. Yoosuwa woo baaxo Israayil marah ikoytah yeceeh; kulli kedohuuy exxa-exxah keenih kure. Kulli kedoh ken gufa ken xexxar keenih yecee. Too ayrok wadir ummatta carbik toffoofeh raqte.
Выбрано:
Yoosuwa 11: NKM
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь