Seemthawhnak 9
9
Noah rum Thukam
1Pathian ni Noah leh a tiapale thluasuah hngai hratin, “Pungzai in karh u la, vulei hi khah uh. 2Vulei parih ramsa kip, huih lakih va kip, khur parih bokvak kip, rili nga an zate ni an tan hrul in an tan ṭih-aw thok; nan kut tangah siah an ii. 3Nunnak ngei ih a tekmi kip nan caw an i thok; thlai hring kungpawl ka tan piak hngai mangin izongza ka tan pia hngai. 4Sa cu a nunnak a imi a thisan rum zongbelte nan aw thok lo. 5Mipace ih nunnak a la tu cu amah ih thisan ka ngeen thok. Ramsa ni mi a thah a’cun thah a i thok. A minung-pi pakhat parih lai a nawng tu cu a thi thok.
6Minung pakhat ih thisan a suahsak tu cu
mi ih kut in a thisan suah a i thok;
icatile amah ih muihmel kengin
Pathian ni minung a vua.
7Nangmi cu pungzai in karh uh, vulei parah tamliangluang u la karh ciamco uh,” tiah a ti hngai.
8Cuhnukah Pathian ni Noah leh a tiapale hemah, 9“Kei ni cu nanmah leh nan hnukih nan hrinsarle, 10cun nanmah rum a ommi sumnung kip—vatepawl, innvulh sumhnamle, cun vulei parih ramsa kip, lawngpi sungin a va suakmi hmawh—nan zate rum thukam ka vua thok. 11Khawcang hmanah nunnak a ngeimi hmawhhmawh cu tinik in siatsuah an i ti thok lo, cun vulei siatsuah ding tinik a om dah ti thok lo, tiah nangmi rum thukam ka vua,” tiah a ti 12Cun Pathian ni, “Kei leh nangmi leh nanmah rum a ommi sumnung phunzakip lakkarah, hmaila san hmawhhmawh ca-ih ka vuak leimi thukam khithmuhnak cu hihi a ii: 13Meicipawl laka’ khin ka sumhmusa#9:13 Sumhmusa ti cu Hebru ah Cantiang tican. ka sia rom ih kei leh vulei lakkarih khithmuhnak a i thok. 14Vulei parih meici ka zaamsak leh a sungih ka sumhmusa hmuh a ik tikah, 15kei leh nangmi leh sumnung phunzakip lakkarih ka thukam cu ka mang thok; culeh tipawl cu nunnak ngeimi zate siatsuah tu ding tinik ah a cang ti dah thok lo. 16Meicipawl lakih sumhmusa a om tikah acu ka hmu thok ih Pathian leh vulei parih nunnak a ngeimi hmawhhmawh lakkarih kumkhua thukam cu ka mang thok,” tiah a ti. 17Pathian ni Noah cu, “Hihi kei leh vulei parih ommi nunnak ngeimi hmawhhmawh lakkarih ka vuak rommi thukam khithmuhtu a ii,” tiah a ti.
Noah leh a Tiapale
18Lawngpi sungin a va suak tu Noah ih tiapale cu Shem, Ham leh Jafeth an ii. Ham cu Kanaan ih pa a ii. 19Hile hi Noah ih tiapale pathum cu an ii; ahile hin a ii vulei punpuhluk ah minung an om remro. 20Noah cu lothlo a ii ih a peitatleng sabit duum vuatu a ii. 21Sabitti a ding ih a rittia, culeh a puanthlaam ah takpalawng in a me. 22Culeh Kanaan ih pa Ham ni a pa ih takpalawng-iknak a hmu ih pawnla ah a ule pahnih a sim hngai. 23Cutikah Shem leh Jafeth cu puan an la ih an liang veve ah thuantia hratin, an dunglasan in an tat ih an pa ih takpalawng iknak cu an khum; an hmai cu hmun ce pi an hoih ruangah an pa ih takpalawng iknak cu an hmu lo. 24Noah cu a sabit ritnak in a han ṭhangtia ih a tiapa hniangtleng ni a parih a timi a tiah tikah,
25“Kanaan cu camkhaat ii seh;
a ule hemah sal niamtleng ii seh,” tiah a ti.
26“Shem cu Bawipa ka Pathian ih
thluasuahmi ii seh;
cun Kanaan cu a sal ii seh.
27Pathian ni Jafeth cu punzaisak seh,
cun Shem ih puanthlaampawl ah
om hngai niarno seh;
culeh Kanaan cu a sal ii seh,” tiah khaw a ti.
28Tinik hnukah Noah cu kum 350 a nung. 29Noah a nun sung hmawh cu kum 950 a ii; cun a thi.
Выбрано:
Seemthawhnak 9: KHBF
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Khualsim Holy Bible © Bible Society of Myanmar, 2021.
