MAWOOKIONYI 3

Wunyamaṟi wo mndu

1 Kyasia na njoka iwewode mtaambo kota mando hangeṟenyi hose halewumbo nyi Mndumii-Ruwa. Nayo ikachea mka ulya: “Alae na lohi Ruwa ahambie mulawone mochilya Ndunda tsa mashidi ha hakunu mndenyi hose?” 2Mka ulya kawia njoka, “Ndunda tsa mashindi ha hakunu mndenyi na lochikuliia; 3kyaindi ndunda tsa ikidilyo lyii makidi hawi ha mhunda Ruwa nalehamba, manya mlalye ma ilyipaaya mulawone mochipfa.” 4Njoka ikawia mndu mka ulya, “Nkya lohi mochipfa-pfo, 5Cha kipfa Ruwa naichi ili mkonu mochilya ndunda tsa ikidilyo mochitambaṟuka meso hanu muwe cha Ruwa, muwemanya shindo shicha na shiwicho.” 6Kyasia mndu mka ulya kaambuya ikidi lilya kawona lyii lyicha iambuya na lyekulia, lyichihiṟie meso, lya kiweṟe kipfa liweṟangusha; kyasia katowuo ho ndunda kalya; kainengaho na mii oke kawekulia. 7Wakatambaṟuka meso hawo wawawi wakakoya wai kitaṟe wakaoka mambale ha mkuyu, wakakuwutiaho nguo. 8Nahong'u wakaicho ṟu lya Mndumii-Ruwa kechichumia kulya mhundenyi kiheri mnengeṟi fomeembeṟuka; Mnducho na mka oke wakaowa kulya kiidi kya mashidi ha kulya mndenyi, kundu Mndumii-Ruwa nalawawone. 9Kyaindi Mndumii kalaha mnducho, kambia, “Nku oi?” 10Mnducho kahamba, “Ngaicho ṟu lyapfo kunu mndenyi ngaowuo kipfa kya ili njii kitaṟe, ngakuowia.” 11Mndumii-Ruwa kahamba, “Nyiu akuwia nyi ui kitaṟe? Nyi uliie ndunda ipfo ikidihu handu ndekuwawasa kulalye-ho?” 12Nalyo mnducho kahamba: “Nyi mkachu ulusanzie nao nyio anjiinenga ndunda tsa ikidi-lyo, ngalya.” 13 Mndumii-Ruwa kawia mka ulya, “Nkiki owuta iki?” Mka ulya kahamba: “Njoka yanlemba ngalya.”

Ihoṟoyo

14Mndumii-Ruwa kawia njoka, “Omtana ombuta kudo, kekaang'u kumsese kota shuma sho shose na kiidi kya mando hai na moo ha ngeṟenyi hose; nyi ochihenda ochikukuruo wanda na ndeu kiheri kyose, na nochilya teri mandi ui na moo hose.” 15 Njechiwika-ho kituwa kyanu na mka na kya oshari lopfo na lo mka. Nalo lochikuṟinjawia mdofo na iyo noluṟinjawie kitsinano-kyo. 16Kawia mka ulya, “Njechikufeṟia mawawio hapfo, ochiendio wana kui mawawio; na ilanga lyapfo nochilanga mii opfo, nao nawe mokuitoṟia.” 17 Kawia na Adamu: “Omtana omeidikia kidedo kya mka opfo kolya ndunda tsa ikidi lilya ndekututuma ngakuwia; makulalye-ho; mdemifo fukae fui msese kipfa kyapfo iyo, nokulie shelya kui mawina mandi ui na moo hose, 18nafo fuwekudosia msha na manduo na mmera. 19Ochihenda ochikulia kando kapfo kui mbiṟuko fo kyamu mtano owuya na ipfo terinyi kyamba mpfo kundo umbute. Cha kipfa ukeri kiluli na nochikaa nowuye na kilulinyi.”

20Adamu kadumbuya mka oke rina lyake nyi Ewa; kipfa nyio ai mayo-o wose wai na moo. 21Mndumii-Ruwa kasungusia nguo tsa njonyi kaṟika Adamu na mka oke.

Adamu na Ewa wawingio mhundenyi fo Edeni

22 Mndumii-Ruwa kahamba, “Kyasia, mndu chu ai cha umu odu, kui imanya mecha na mawicho; na wulalu nalache ihoṟuo owoko loke naire ndunda tsa ikidi lya moo nalye nakae na moo mlungana.” 23Mndumii-Ruwa kambuta kulya mhundenyi fo Edenyi, nademe terinyi ipfo kundo alewuto. 24Kyasia kafuna pfo mnducho, kawikapfo Makerubi, ora lo ngamenyi lo mhunda fulya fo Edenyi na oshu lo modo loweṟuka-weṟuka ipfo na ipfo, lochiringia njia ya ikidi lya moo.

Выбрано:

MAWOOKIONYI 3: KIM2

Выделить

Копировать