Luka 18

Enkitanyaanyukoto e nkoliai o laiguanani

1Neliki Yesu lkipaareta lenyenaenkitanyaanyukoto, aitodol inchere keishiaakino ake neomon anaake nemenauru. 2Nejoki, “Eetae apa te nkanasa nabo olaiguanani lemeure Enkai nemeshilaa tung'ani; 3neetae enkoliai teina anasa nalotu anaa ake enetii ajoki, ‘Tomituoki sii ake tele mang'atinta.’ 4Neng'as aany; ore te siadi nejo openy, ‘Ore hoo nemaure Enkai nemaikenu tung'ani, 5kake ore amu aateeka ena oliai, kamitu pee maaitoki aisomit te na lotunoto enye.’ ” 6Kejo Olaitoriani, “Entoning enajo ilo aiguanani arruoni. 7Paa aijojo memitu ninye Enkai ilgelunot lenyena, ooishiraki dama o kewarie? Ijojo keimutie tialo ninche? 8Ajoki intae kemitu asioki. Kake amaa eyia, keinepu pasa Enkerai e Tung'ani te nelotu, eetai enkirukoto te nkop?”

Enkitanyaanyukoto Olfarisayoi o Lasotoni le kodi

9Etolikio sii Yesu ena kitanyaanyukoto lelo ooisilig ate aajo supati te Nkai nemen ilkulikae; 10“Eilepa ltung'ana aare aapuo aaomon te nkaji e Nkai, naa Olfarisayoi obo naa olasotoni le kodi olikae. 11Neitashe Olfarisayoi neomon te nkorrok enye makewan nejo nji, ‘Na Ai, aaisho enashe amu matiu nanu anaa ikulikae tung'ana, matiu anaa ilaikonyak ilaimonkok, iloololoito, nematiu sii anaa ele osotu kodi. 12Kat are aen kewan aitupukoo te wiki, naishooyo ematua e tomon e pooki toki natum.’ 13Kake eitasho ninye olasotoni le kodi, te nelakua nemeshumu ninye inkonyek enyena aing'orie shumata kake olgoo eoshiosh, nejo, ‘Na Ai, ing'urrieki nanu olaing'okoni!’ 14#Mat 23.12; Lk 14.11Ajoki intae, etadoyie ele tung'ani alo enkaji enye eishooki esipata alang ilo likae; amu ore pooki ng'ae oilepie kewan neitadouni, ore oloitadou kewan neilepieki.”

Etamayiana Yesu inkera kutiti

(Mat 19.13-15; Mk 10.13-16)

15Neyakini sii Yesu nkera kutiti pee etum aiseyie, ore pee edol lkipaareta ina neisikong ninche. 16Kake eipotuo Yesu enetii nejoki, Enchoo nkera epuonu enatii emimitiki; amu enoo naatiu anaa kuna enkitoria e Nkai. 17Kedede, ajoki intae, ore pooki ng'ae lemeng'amu enkitoria e Nkai anaa enang'amu enkerai nemejing ina kitoria katukul.

Oltung'ani karsis

(Mat 19.16-30; Mk 10.17-31)

18Neikilikuan oltung'ani obo oitoreisho Yesu ajoki, “Laaiteng'enani supat, kaji aiko pee ajung enkishui oo ntarasi?” 19Nejoki Yesu ninye, “Kainyoo pee kijo kara supat? Meetae hoo obo supat leme Enkai ake. 20#Ena 20.14; Enkig 5.18; Ena 20.13; Enkig 5.17; Ena 20.15; Enkig 5.19; Ena 20.16; Enkig 5.20; Ena 20.12; Enkig 5.16Iyiolo iyie nkitanapat:

‘Miloloito,

miar metua,

mipurrisho,

minteeniki likae elejare

iyanyita minyi o ng'utunyi.’ ”

21Nejoki ninye, “Aibung'a kuna pooki ebaiki apa ara oti.”

22Ore pee ening Yesu ina, nejoki, “Kitong'orikia entoki nabo. Timira pooki toki niaata tooriki laisinak, naa itum olchumati te keper; nikilotu taa asuj.” 23Kake ina ake etoning'o neisinanuo oleng, amu karsis apa naleng. 24Neing'or Yesu ninye nejo, “Egol taa duoo to ltung'ani oata imasaa pee ejing enkitoria e Nkai! 25Amu kelelek te ntames pee eim enaudoto o ltidu alang oltung'ani karsis te nejing enkitoria e Nkai.” 26Nejo lelo ootoning'o, “Ai ng'ae naa doi eitajeuni?” 27Kake etejo, “Ore enemeidimayu too ltung'ana keidimayu te Nkai.” 28Nejo Petero, “Ng'ura ajo kitung'uaitie iyiook inkang'itie ang nikisuj iyie.” 29Nejoki Yesu ninche, “Kedede, ajoki intae, meetae oltung'ani otung'uayie enkaji, aashu enkitok, aashu lalashera, aashu ntoiwuo, aashu nkera, te nkaraki enkitoria e Nkai, 30lemetum nkatitin kumok taata te na kata, ore teidia kata nalotu netum enkishui oo ntarasi.”

Eiroro Yesu alimu keeya enye enkata e uni

(Mat 20.17-19; Mk 10.32-34)

31Nerik Yesu lelo tomon o aare enkilepata, nejoki, “Yerusalem kilep aapuo, naa ore mbaa pooki naatisiraki naaipirta Enkerai e Tung'ani too loibonok le Nkai naa keitabari. 32Keitarasakini ninye Iloreren nesurdaanyi neitaasi enesulare nenotakini; 33neoshi ninye, neari metua, ore te nkolong e uni nepiu.”

34Kake eitu hoo ening'u lkipaareta embae nabo e kuna; keisudoro ena bae te ninche, neaku eitu ening'u enatiaaka Yesu.

Eishiunye Yesu oltung'ani modooni oomonisho

(Mat 20.29-34; Mk 10.46-52)

35Ore pee enyikaki Yesu Yeriko, netii oltung'ani modooni otonita te mbata e nkoitoi aomonisho. 36Ore pee ening olorere egiroo aapuo, neikilikuanisho ajo kainyoo ina. 37Nejokini, “Yesu le Nasaret oimita ene.” 38Nebuaku ajo, “Yesu, olayioni le Daudi, ing'urrieki nanu!” 39Ore lelo ootii dukuya ninye nebuaaki metigirayu; kake etabuakua ninye aitulus oleng, “Ara Daudi, ing'urrieki!” 40Neitashe Yesu nejo metorikuni enetii; ore pee enyikaki, nejoki, 41“Kaa iyieu naaitaas?” Nejo, “Olaitoriani, kayieu nadolishoyu.” 42Nejoki Yesu ninye, “Todolisho; kinchiunye enkirukoto ino.” 43Nedolishoyu nabo kata nesuj ninye, eisisita Enkai; ore lelo tung'ana pooki, pee edol ina, neisis Enkai.

Выбрано:

Luka 18: BIBLIACATHO

Выделить

Копировать