Mapookyony 5

Ngyeeri ya Adamu

(1 Fye 1:1-4)

1Elu llo uramba lwa ufyari lwa Adamu. Llya Iruva aleumba nndu mmbo alemuumba wa fwana yakwe. 2Kaumba nndu nndumi na nndu nka, kavavikkya mbora kavafishya irina ni mwana wa “Nndu” nkonu ulya valeumbwa.

3Adamu katira myaaka iyana na makumi araru, kaira mwana wa kyuumi ambakkye wa fwana yakwe, kammbaanga Seti. 4Fyeeri fya Adamu amma yiira Seti ni myaaka mayana nyanya keera vana va kyuumi na va kyika. 5Mikonu myoose ya Adamu alekaa ulanin ni myaaka mayana kyeenda na makumi araru, naasa kafwa.

6Seti keera Enoshi eetiri myaaka iyana lyimwi na iraanu. 7Seti ekimaa yiira Enoshi kakaa-u myaaka mayana nyanya na mfungare, kaira vana va kyuumi na va kyika. 8Suku ta Seti toose ni myaaka mayana kyeenda na ikumi na ivii, kafwaany.

9Enoshi etiri myaaka makumi kyeenda keera Kenani. 10Enoshi ammira Kenani kakaa-u myaaka mayana nyanya na ikumi na iraanu, kaira vana va kyuumi na va kyika. 11Suku toose ta Enoshi ni myaaka mayana kyeenda na iraanu, kafwaany.

12Kenani kakaa myaaka makumi mfungare, kaira Mahalaleli. 13Kenani kakaa, myaaka mayana nyanya na makumi aana, ammaa yiira Mahalaleli, keera vana va kyuumi na va kyika. 14Suku toose ta Kenani ni myaaka makumi kyeenda na ikumi, kafwaany.

15Mahalaleli kakaa myaaka makumi arindaru na iraanu, kaira Yaredi. 16Mahalaleli ammiira Yaredi kakaa-se myaaka mayana nyanya na makumi araru, kaira vana va kyuumi na va kyika. 17Suku toose ta Mahalaleli ni myaka mayana nyanya na makumi arindaru na iraaru kafwaany.

18Yaredi kakaa myaaka iyana makumi arindaru na ivii, kaira Enoki. 19Yaredi ekiira Enoki kakaa myaaka mayana aana, kaira vana va kyuumi na va kyika. 20Suku toose ta Yaredi ni myaaka mayana kyeenda makumi arindaru na ivii, kafwaan.

21Enoki kakaau myaaka makumi arindaru na iraanu, kaira Metusala. 22Enoki keenda ariani na Iruva amma yiira Metusala myaaka mayana araru, kaira vana va kyuumi na va kyika. 23Kafwa etiri myaaka mayana araru makumi arindaru na iraanu. 24Enosi keenda ariani na Iruva, kareka kulu, mashika Iruva mmbwe alemwiipoo.

25Metusala kakaa-u myaaka iyana makumi nyanya na mfungare, kaira Lameki. 26Ekimaa yiira Lameki Metusala kakaau myaaka mayana mfungare makumi nyanya na ivii, kaira vana va kyuumi na va kyika, 27Suku toose ta Metusala ni myaka mayana kyeenda makumi arindaru na kyeenda, kafwaany.

28Lameki kakaa-u myaaka iyana makumi nyanya na ivii, kaira mwana, 29Kamfishya irina ni Noe, kaamba, “Yeu mmbwe yeto asheluviiryaa muu efo mashoreny eru na ngatareny ta maako eru yaa ulanin elu Nndumi Iruva aleludenga.” 30Lameki ammaa iira Noe kakaa-u myaaka mayana araanu makumi kyeenda na iraanu, kaira-se vana va kyuumi na va kyika. 31Suku toose ta Lameki mmbo alefwa etiri myaaka mayana mfungare makumi mfungare na mfungare.

32Noe katira myaaka mayana araanu. Noe kaira Semu na Hamu na Yafeti.

Выбрано:

Mapookyony 5: MAS2

Выделить

Копировать