Matiye 3

Beneyti Yaaya ma batasayya giimi ammo

(Elloŋ Mark 1.1-8, Lik 3.1-18, Yaaya 1.19-28)

1Maa gu gaari kooko ƴiiliɗe, gaa lekkiɗo miiɗi kaƴi ma goo Yaaya ma batasayya giimi. Gata pa ase kayne ka Yudee. Gaa asiyyoo taasa oko giimo, 2gaa: «Meeloŋgu gaartoŋ ku miɗɗa asan gi mulunniti Mellayi#3.2 Beneyyiŋgee kooko ma beneyco Gireknigeyyo gu ay ‘mulunne tee ta uwwa samaani’. Mulunne ta uwwa samaani taata pa ay mulunniti Mellayi. Yawudigee pa, mileŋ gu karmayyiy semeetee Mellayi, gu talakkay ɗa. Ay ɗakko appe ga Matiye kitipiyɗo gaa mulunne ta uwwa samaani. aseero katta.» 3Yaaya pa ay gata maa ga Mella beneyye gaartee ma nabiinice Esaya gaa:

«Gimu kaƴi beneyya ma raɗɗa kayni gaa:

Panoŋga botol oko Miltine.

Leeneegu bottolli gu deeɗo cur#3.3 Elloŋ Esaya 40.3.!»

4Yaaya pa esekke kaɗiyyu maa gu paree ma lawtee lukumi o abuuti ga onokkica ma haguune ka tukki. Tiyawti pa ay baggi o ƴimbe. 5Guu giimi asawɗee min geegar ka Zerizalem o min diyargee ku kiɗa ta Yudee parattí o min diyargee paracco ma aaye sariptí ƴiiro ta Yurden ma sorotta diiman. 6Guu beneyɗiy zunubgeeco unco giimo, hatta gaa batisiyɗiy ƴiiro ta Yurden.

7Gaa Yaaya elelɗo aacco giimo Pariziyennigee o Saduseyennigee maani ma asaa wikirti maa ga batasayɗo giimi kaaka. Gaa beneyyiyyoo gaa: «Kuŋ ma ay ronco koykokko! Ay we ma gaaritoŋ paawo min bogorti Mellayi ma akka asa wikinne ka parlanti? 8Deyyoŋ aleŋ ettee ma weewa miici ku daana. Leewoŋ gaari ku samaane ma gaara kadar ku meeliy ma seene gaartoŋ ku miɗɗa. 9Aɗoŋ lee ɗa kuu gi arakke paaɗe maa ku alɗo ronco rontee Biraayim. Na beneyyatoŋ kadar ga Mella gederra ga leeɗiy dambee kooko gu deeɗo ronco rontee Biraayim. 10Elloŋ ƴa bolaa ka daɗɗiti carco etteyyo aaye appe. Kulla ettu aɗe ma weewa ɗa miici ku daana gu daɗakkaa gu uwwiya okkati. 11Naa batasayyatoŋ ma ammi ku maa ku gaariɗo kadar ku aŋka ku meeliɗiy gaartoŋ ku miɗɗa. A gata ma asa taartu soopa, tatta ƴiila min oko naa. Na arakke ɗa kulla na settiyeegu n̰uurtee. Gata kaaka pa akkitoŋ batisiya ma Ruuhanti Mellayi o ma okko. 12Gata pa bakamme pitti asiyaane ka booyiti, ku maa ga jagiɗiy korƴo ma susuma. Maa ga gaamiɗe booyo pa, gaa sawwiyya putuuriti. Gaa timmiɗiy korƴo urditi. Susuma pa ga akkica oosa ma okko ma batakka ɗa ta kaw.»

Yaaya batasayyaa Iisa

(Elloŋ Mark 1.9-11, Lik 3.21-22, Yaaya 1.29-34)

13Gaa wikinne paalta omma, ga Iisa asiɗe min kiɗa ta Galilee. Gaa sarɗe ƴiiro ta Yurden, wikirti Yaaya ku maa ga deeɗiya batisiya ammo. 14Gaa Yaaya aŋkiɗe pooco. Gaa beneyyiɗe gaa: «Ay naa ma aŋka ki asinno batisiya, gaa kii asawɗo oko naa kii na batisiyum?» 15Gaa Iisa soopa tiiliyyee gaa: «Haŋka ki oyyu ki batisiyinno. Ay goŋŋa appe ke tattipiya paratti maa ga Mella aŋka.» Ay kaaka appe ga Yaaya oyyiɗe ga batisiyiyya Iisa. 16Gaa maa ga batisiyya kaaka, ga ma haŋka keeke aɗe ga Iisa oomiɗe min ammo. Gaa oko wikinne kaaka saa ga samaane iyyiɗe, gaa ellicca Ruuhanti Mellayi ma beeriyee aleŋ hamam, gii asiyyee joppa. 17Gii ur̰e beneyyiɗe min samaani gee: «Gata keeke ay Runtu, na ƴekkaa ta kaw. Parhantu parattí aaye oko gata#3.17 Elloŋ Soom 2.7 o Esaya 42.1..»

Выбрано:

Matiye 3: mmy

Выделить

Копировать