Luk 8
8
1Ebyo ku byahwaire, Yesu yaagyenda naaraba omu birorero n'omu byaro naayegyesa kandi naarangirira Amakuru Marungi g'obukama bwa Ruhanga. Obwo akaba aine eikumi na babiri, 2hamwe n'abakazi abaabaire batambiirwe ebyago n'endwara, barimu Mariya owaabaire naayetwa Magadaleena, owaihirweho ebyago mushanju, 3na Yoana muka Kuuza omureeberezi w'ebya Herode, na Susaana, n'abandi baingi abaabaire babaha eby'okubahwera nibakora aha byabo.
Enfumu y'omubibi
(Mat. 13:1-9; Mar. 4:1-9)
4Abantu baingi ku baayeteeraniire ahi Yesu yaabaire ari nibaruga omuri buri kirorero, yaabacwera enfumu egi, ati: 5Omubibi akashohora kubiba embibo ze. Ku yaabaire naabiba, ezimwe zaaragara aha rubaju rw'omuhanda, zaaribatiirirwa, enyonyi z'omu kaabunga zaazirya. 6Ezindi zaagwa aha rukiri, ku zaamezire, zaayoma ahabw'okuburwa amaizi. 7Ezindi mbibo zaagwa omu mahwa, gaakura nazo, gaazinyuruza; 8n'ezindi zaagwa aha itaka rirungi, zaakura, zaayera zaakanya emirundi igana. Ku yaabaire naagwisa, yaagamba n'eiraka rihango ati: Oine amatu agarikuhurira, ahurire.
Eki Yesu yaabaire acwera enfumu
(Mat. 13:10-17; Mar. 4:10-12)
9Abatendekwa be baamubuuza amakuru g'egyo nfumu. 10Nawe yaabagira ati: Imwe mukaatirwa eibanga ry'obukama bwa Ruhanga, kwonka abandi babigambirwa omu nfumu, ngu
bareebe, kwonka bateetegyereza,
bahurire, kwonka batashoboorokyerwa.
Yesu okushoboorora amakuru g'enfumu y'omubibi
(Mat. 13:18-23; Mar. 4:13-20)
11Mbwenu aga nigo makuru g'egyo nfumu. Embibo nikyo kigambo kya Ruhanga. 12Ezaaragaire aha rubaju rw'omuhanda nibo bantu abakihurira, Sitaane akaija, akaiha ekyo kigambo omu mitima yaabo, ngu barekye kwikiriza bakajunwa. 13Ezaabibirwe aha rukiri nibo bantu abahurira ekyo kigambo, bakakiikiriza bashemereirwe; kwonka ahabw'okutagira mizi bakiikiriza akaanya kakye, bwanyima ku boohibwa, bagwa. 14Ezaagwire omu mahwa nibo bantu abakihurira, kwonka omu magara gaabo bakanyuruzibwa okwemereza omutima n'eby'obutungi n'eby'amashemererwa g'amagara aga, haza bakabura kukagata omu mutima. 15Reero ezaagwire omu itaka rirungi nibo bantu abahurira ekyo kigambo, bakakigumya omu mutima murungi kandi ogw'amazima, haza ahabw'okugumisiriza bakaana ebyana.
Enfumu y'etabaaza
(Mar. 4:21-25)
16Tihariho n'omwe ohemba etabaaza, akagijuumikira ekiibo, nari akagita omunda y'ekitanda; kureka agita aha kikondo, ngu ehwezese abarikutaaha omu nju. 17Manya tihariho kisherekirwe ekitaryorekwa, nari eky'omu naama ekitarimanywa kikareebwa butunu.
18N'ahabw'ekyo mwerinde oku muraahurire, ahabw'okuba weena oine, aryaheebwa ebirikukiraho, kwonka otaine, nangwa n'eki arikuteekateeka ngu aine, aryakyakwa.
Ab'oruganda rwa Yesu omu mazima
(Mat. 12:46-50; Mar. 3:31-35)
19Nyina wa Yesu na barumuna be bakaija nibamuronda, kwonka tibaabaasa kumuhika ahabw'akamigano k'abantu. 20Baamutumaho bati: Nyoko na barumuna baawe beemereire aheeru nibenda kukureeba. 21We yaabagarukamu ati: Maawe na barumuna bangye nibo abo abahurira ekigambo kya Ruhanga, bakakihitsya.
Yesu okucureeza eihunga n'enyanja
(Mat. 8:23-27; Mar. 4:35-41)
22Eizooba rimwe Yesu akaza omu bwato n'abatendekwa be, yaabagira ati: Ka twambukye seeri y'enyanja. Batyo baagyenda. 23Ku baabaire nibakyambuka, yaagwejegyera. Omuyaga gw'amaani gwatabangura enyanja, amaizi gaatandika kweshuka omu bwato, baagwa omu kabi. 24Mpaho baamuhika, baamusisiimura bati: Mwegyesa, Mwegyesa, twafa!
Atyo akanguka omu turo, akabukira ogwo muyaga n'okutabanguka kw'amaizi, biikaikana, hacureera. 25Reero abagira ati: Mbwenu okwikiriza kwanyu kuri nkahi? Baitwa obwoba, baatangaara, baagambirana bati: Beitu ogu ni muntu ki orikuragiira omuyaga n'enyanja bikamuhurira?
Omunyageraseene owaihirweho ebyago
(Mat. 8:28-34; Mar. 5:1-20)
26Ku baayambukire, baahika omu nsi y'Abanyageraseene eshungaine na Galilaaya. 27Yesu ku yaabaire yaaribata ati aha nkungu, yaizirwa omushaija oriho ebyago naaruga omu kirorero ky'aho. Ogwo mushaija akaba amazire omwanya muraingwa ataine ki ajwaire, kandi akaba atakiraara mu nju, kureka omu bituuro. 28Ku yaareebire ati Yesu, yaaborooga, yaamugwa omu maguru, yaayamuza munonga ati: Iwe Yesu, Omwana wa Ruhanga Rukiraboona, noofa ki naanye? Naakweshengyereza, otaanyita kubi. 29Eki yaagambiire atyo, n'ahabw'okuba Yesu akaba yaaragiire ekyo kyago kumurugaho. Manya kaingi kikaba kimuniga, abantu bamubohesa enjegyere n'emihama kumurinda; kwonka obutoosha acwa ebi bamuboheise, kimurariza omu ihamba. 30Yesu nikwo kukibuuza ati: Eiziina ryawe ori oha? Nakyo kiti: Niinye Ihe; ahabw'okuba ebyago bingi bikaba bimutaahiremu. 31Mpaho byayeshengyereza Yesu kutabiragiira kuza okuzimu owa Nyamuteza.
32Mbwenu obwo hakaba hariho omukumbi gw'empunu nyingi niziriira omu kibungo. Ebyo byago byayeshengyereza Yesu kubiikiriza kuba nizo byazamu. Nawe yaabiikiriza. 33Byaruga ahari ogwo muntu, byataaha omuri ezo mpunu; ogwo mukumbi gwahiringitira aha nengo, gwagwa omu nyanja, gwarohama.
34Bwanyima abariisa b'ezo mpunu, ku baareebire ebyabaho, baahunga, baabiteekyerereza ab'omu rurembo n'ab'omu byaro. 35Abantu baahurura kureeba ekyabaho. Ku baahikire Yesu, baashanga ogwo mushaija owaarugirweho ebyago ashutami aha bigyere bya Yesu, ajwaire kandi aine obwengye; baatiina munonga. 36Abaabaire bariho baabateekyerereza oku ogwo mushaija owaabaire ariho ebyago yaakizibwa. 37Abageraseene boona emitima ebahwa omunda, beeshengyereza Yesu kubarugira omu nsi. Nawe aza omu bwato, agarukayo.
38Ku yaabaire atakagyenzire, omuntu ori owaihirweho ebyago yaamushaba ku amwikiriza kuguma nawe; kwonka we yaamwangira naamugira ati: 39Garuka owaawe, omanyise byona ebi Ruhanga yaakukorera! Ogwo muntu nikwo kugyenda akabuzya omu kirorero kyona ebi Yesu yaamukorera.
Yesu okukiza omukazi n'okuzoora muhara wa Yairo
(Mat. 9:18-26; Mar. 5:21-43)
40Yesu ku yaabaire naagarukayo, yaatangirirwa enyanja y'abantu, ahabw'okuba boona bakaba bariyo bamutegyereize. 41Omuri ago magingo haija omushaija orikwetwa Yairo, owaabaire ari omukuru w'eiteeraniro. Yaakwata Yesu amaguru naamweshengyereza kuza owe, 42ahabw'okuba akaba aine omuhara omwe wenka, ow'emyaka nka ikumi n'ebiri y'obukuru, owaabaire ari haihi kufa.
Reero Yesu ku yaabaire naazayo, abantu baingi baamumigisiriza, bamuturukire oku n'oku. 43Mbwenu obwo hakaba hariho omukazi owaabaire amazire emyaka ikumi n'ebiri arwaire ekyejwiso, amariire ebye byona omu bafumu, kwonka bambe, hatariho n'omwe owaabasize kumutambira. 44Yaamureetwa enyima, yaakora aha mukugiro gw'ekijwaro kye; ahonaaho ekyejwiso kyakira. 45Yesu nikwo kubuuza ati: Beitu n'oha owankoraho? Boona baayehakana ku bataamukoraho. Petero na bagyenzi be nikwo kumigira bati: Mwegyesa, manya enyanja y'abantu ekwehinguririize, niyo erikukumiga. 46Kwonka Yesu yaagira ati: Haine owankoraho, ahabw'okuba naahurira amaani gandugamu. 47Omukazi ku yaareebire yaamanywa, yaarugayo naatetema, yaamujuumara omu maisho, yaagambira ahagati y'abantu eki yaamukoreraho, n'oku yaatambirwa omuri ako kaanya. 48Onu amugira ati: Mwana wangye, okwikiriza kwawe nikwo kwakukiza; gyenda n'obusingye.
49Yesu ku yaabaire naakigamba, haija omuntu owaaruga omu nju y'omukuru w'eiteeraniro aizire kumubikira; agira ati: Muhara waawe yaafa, otagaruka kurusya Omwegyesa. 50Kwonka Yesu nawe akihurira, amugambira ati: Otatiina, fa okwikiriza, omwana naija kukira. 51Ku yaahikire aha nju, tiyaikiriza muntu weena kutaahamu nawe, kureka Petero, Yohaana, Yakobo hamwe na ishe w'omwana na nyina. 52Boona bakaba nibarira nibamucurira. Kwonka Yesu yaabagira ati: Murekyere aho kurira; tafiire, agwejegyeire. 53Batyo baamushekyerera, ahabw'okuba bakaba nibamanya ku afiire. 54Kwonka we amukwata omukono, amugira ati: Mwana 'we, imuka. 55Ahimbuuka, ahonaaho abandaituka. Atyo Yesu abaragiira kumuha ekyokurya. 56Abazaire be baatangaara munonga; kwonka abeehanangiriza kutagira u baagambira ekyabaho.
Okutuma eikumi na babiri
(Mat. 10:5-15; Mar. 6:7-13)
Выбрано:
Luk 8: RKK2008
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
