Marko 5

Yesu wachizga munthu wa mzimu wa uyu

(Mateyu 8.28-34; Luka 8.26-39)

1Wanguza ku nyanja kusirgha, mu charu cha ŵaGerasa. 2Ndipo wachituwa iyo mu ngaraŵa, wangukumana nayo, kutuwa ku masano, munthu wa mzimu wawiyu, 3mweniyo wenga ni uja wake mu masano: pengavi yumoza wanthazi kumumanga chigana ndi unyoro; 4chifukwa panandi wangumangika ndi matangaja ndi maunyoro; ndipo maunyoro ghangudumuka ndi iyo, ndi matangaja ghangupikitika: ndipo kwengavi yumoza wanthazi kumgoda. 5Nyengo zose, usiku ndi msana, mu masano ndi mumapiri wakamburanga, ndi kujicheka ndi mya. 6Kweni wachiwona Yesu kutari, wanguchimbiya ndi kumlambiya; 7wakukambura ndi mazu ghakuru, wanguti, “Ndatinji namwe, Yesu, mwaMwana waku Chiuta Wamdengwendi? Ndikurapiskiyani ndi Chiuta, mungandisuzganga cha.” 8Chifukwa wangunena nayo, “Tuwamo mu munthu yo, mzimu we, wawiyu.” 9Ndipo Yesu wangumfumba, “Ndine zina lako?” Wangwamuka, “Zina langu ndine Liŵanja, pakuti te ŵanandi.” 10Ndipo wangumuŵeyere ukongwa kuti wangayidikamo mu charu cha. 11Kweni mskambu ukuru wa nguruŵi warghanga pa mtunthu po; 12ndipo yingumuŵeyere, kuti, “Titumizgeni mu nguruŵi zo, kuti tisere mwaku zo.” 13Ndipo wanguyizomerezga. Sono mizimu yo yawiyu yichituwa yingusere mu nguruŵi zo: ndipo mskambu wo ungungungunthiya ku sendemu ndi ungubira mu nyanja, akhumba vikwi viŵi; ndipo zose zingufwiya mwenimo.

14Ŵakuziliska ŵanguthaŵa, ŵanguchitauliya mu muzi ndi mu minda. Ndipo ŵanthu ŵanguza kwaziwona chakuŵapo cho. 15Ndipo ŵanguza kwaku Yesu, ŵangumuwona wademone yo wakuja ndeku pasi, wakuvwara ndi wakuŵa ndi zeru, mweniyo wenga liŵanja: ndipo wangopa. 16Ndipo wo ŵengapo ŵanguŵakonkhome mo kungumuŵiya wademone yo, ndi vyapa nguruŵi zo. 17Ndipo ŵangwamba kumuŵeyere Yesu Kuti watuwemo mu mphaka zawo. 18Ndipo wachisere mu ngaraŵa, yo wanguŵa ndi wademone wangumuŵeyere, kuti waŵe pamoza nayo. 19Kweni kuti Yesu wangumzomerezga cha, kweni wangumnene, “Kanga ku nyumba yako ku ŵabali ŵako, uŵatauliye vikuru vyo Ambuya akuchitiya ndimo akufwiya lisungu.” 20Ndipo wanguruta, wangwamba kumemeza mu Dekapoli ndi vikuru vyo Yesu wangumuchitiya ndipo wose ŵanguzizwa.

Mwana munthukazi waku Yairo ndi munthukazi wakusuruwa ndopa ŵachizgika ndi Yesu

(Mateyu 9.18-26; Luka 8.40-56)

21Wati wambukiya Yesu kusirgha so mu ngaraŵa, mzinda ukuru unguwunjikana kwaku iyo; ndipo wenga mu mphepete mu nyanja. 22Kunguza yumoza wa ŵara ŵa sinagoge, zina lake Yairo ndipo wachimuwona wanguwa pasi pa marundi ghake; 23wangumuŵeyere ukongwa, wakuti, “Kana kasungwana kangu kaziririka ke pafupi kufwa, zani, muzichiŵika pakemanja ghinu, alinga wachizgike waŵe ndi umoyo.” 24Ndipo Yesu wanguruta pamoza nayo.

Ndipo mzinda ukuru wamrondonga; ndi wamfinyirizganga. 25Ndipo mweni-muwa mwenga munthukazi msuruwa ndopa yo wangutama kwa virimika chumi ndi viŵiyo wangukunthiyapo vinandiku ng'anga zinandi, ndi wangumara vyake vyose, 26ndipo kuti wangovyeka kanthu cha kweni ukongwa watamanga uheniku, 27wati wavwa vyapaku Yesu, wanguza kuvuli mu mzinda wo, ndipo wangukwaska munjirira wake. 28Chifukwa watinge, “Asani ndingakwaska chingana ndi minjirira yake pe nkhachiranga.” 29Ndipo sosonukweni chingukamuka chisima cha ndopa zake; ndipo wanguziŵa mu liŵavu lake kuti wachizgika. 30Yesu pakuziŵa mwaku yija kuti nthazi ya mwake yatuwa, wangung'anamuka mu mzinda wo, wanguti, “Njani wakwaska minjirira yangu?” 31Ndipo ŵasambizi ŵake ŵangunena nayo, “Muwona mzinda utukufinyikizgani, ndipo mutiti, ‘Njani wandikwaska?’ ” 32Ndipo walereskanga kwakuzunguliya kuwona yo wanguchita chenichi. 33Ndipo munthukazi yo, wakopa ndi wakunjenjeme, wakuziŵa so chenicho chingumuŵiya, wanguza ndi wanguwa paurongo pake, ndipo wangumnene uneneska wose. 34Yesu wanguti kwaku iyo, “Mwana munthukazi we, chivwanu chako chakutaska; kanga mu chimangu, uchizgike ku nthenda yako.”

35Wenga wechekurongoro iyo, wanguza, kutuwa ku nyumba yaku Yiro, wakuti, “Mwana wako wafwa: utimusuzgiranji so Msambizgi?” 36Kweni Yesu wakuphwereko cha ku mazu ghakurongoroleka, watiti ku mura wa sinagoge, “Ungopanga cha, vwananga waka.” 37Ndipo kuti wanguzomerezga yumoza kurongozgana nayo cha, kweni Petro, Yakobe, ndi Yohane mhurwa waku Yakobe. 38Ndipo watuza ku nyumba ya mura wa sinagoge yo; wangusaniya chiwawa, ndi ŵanandi ŵakuliya ndi ŵakutenje ukongwa. 39Ndipo wachisere watiti kwaku wo, “Muwawatiyanji ndi kuliya? Kuti kana kafwa cha, kweni kara.” 40Ndipo ŵangumseka, kweni iyo wati waŵatuzga wose, wanguto wiske wa kana, nyina ndi wapamoza nayo, wangusere mwenimo kana kenga. 41Ndipo wakukole janja la kana, wanena nako, “Talita kumi”; ndiku kuti, “Msungwana we, ndikunene, yuka.” 42Sosonukweni wanguyuka msungwana, ndipo wendayendanga; pakuti wenga wa virimika chumi ndi viŵi. Ndipo ŵanthu ŵangurwita ndi chirwitu chikuru. 43Ndipo wanguŵalanguliya ukongwa, kuti wangachiziŵa chenichi yumoza cha: ndipo wangukamba kuti kupaskike kurgha kwaku iyo.

Выбрано:

Marko 5: TongaMw

Выделить

Копировать