Mathiu 4
4
1Ȧŋlɔkɔ ŋati ɔYina ɔ kera Yisɔsȧŋ ro wula kȧmȧ Sethani ɔ gbɔns kɔ. 2Ma ɔ po wop asum mǝrei tǝgba tǝrǝŋ pali gbɛsȧŋ, dor rǝ wop kɔ. 3Ka ɔgbɔns ɔ bek-e, ɔ pa ro ŋɔŋ, Bepi munɔ yi ɔWan ka Kuru-e, yamari kȧmȧ masar ame mǝ sǝkɛ tǝbo. 4Kɛrɛ Yisɔs ɔ pa, A po gbal kǝpa, Wuni ɔ ŋesǝm hɛ rǝ kǝbo gbo son, kɛrɛ rǝ rim o rim ara wur ka kasǝŋ ka Kuru. 5Ka Sethaniȧŋ ɔ kera kɔ ka kȧpet kǝsǝm, kɔ tǝmǝr kɔ rokɔm ka ȧŋseth ŋa Kuru, ɔ pa ro ŋɔŋ, 6Bepi mǝ yi ɔWan ka Kuru-e, tǝlpɛ roratha, kotȧy-e a po gbal kǝpa,
Ɔ tǝ yamari aŋmȧleka ŋɔŋ ta ȧtȧ mu,
Ɔwa aŋ tǝ kɛkǝr mu ka mȧta maŋ
Ta thani mǝ gbuŋanɛ akatǝk ka mu rǝ ȧsar.
7Yisɔs ɔ pa ro ŋɔŋ, A po sɔ gbal kǝpa, Te mɛmǝr ɔMarki ɔKuru ka mu. 8Ka Sethaniȧŋ ɔ kera kɔ sɔ ka kǝteŋ kǝbɔli rǝkɔm, kɔ tɔri kɔ tabȧy bɛ ta ȧdȧru, yi ɛyiki yati. 9kɔ pa ro ŋɔŋ, I ti sɔŋ mu mayɛt ame bɛ-e bepi mǝ gbǝpsa, ɔwa mǝ bȧtho mi. 10Ka Yisɔs ɔ pa ro ŋɔŋ, Sethani, sək mi rȧŋ! kotȧy-e a po gbal kǝpa, Mǝ yi tǝ kǝbatho ɔMarki ɔKuru ka mu, ɔwa kɔnɔ gbo son mǝ mǝ yɔna.
11Ka Sethaniȧŋ ɔ ter kɔ, ka aŋmȧleka aŋ der aŋ yɔna kɔ.
12Ma Yisɔsȧŋ ɔ tǝl kǝpa a bot Yɔnȧŋ ka ȧŋseth ŋa tǝrǝŋka-e, ɔ kɔnɛ ro Kalili. 13kɔ wur ro Nasarɛth, ɔ der yirȧ ro Kepaniyɔm ȧke yi ro baŋ rayɛr, ka mȧnǝnkǝra ma ro Sɛbulɔn yi Nafthalim. 14Kama tǝ lasǝr ȧte Isaya ɔnȧbi ɔ pa, kǝpa,
15Aŋthɔf ŋa ro Sɛbulɔn, yi ȧŋthɔf ŋa ro Nafthalim,
Kǝbalǝr ro baŋ Yɔrdan mɔri,
Ka Kalili ka tȧbona tǝlɔm,
16Aŋfǝm aŋa yirȧ ka ȧŋsum
Aŋ nənk kǝwalɛ kǝbana;
Ɔwa kǝwalɛ kǝ put ro ŋaŋ
Aŋa yirȧ ka ɔdɛr yi ka ȧŋmumpǝl ŋa rǝfi.
17Kǝtəp ka ȧŋlɔkɔ ŋati Yisɔsȧŋ ɔ tǝp kǝtam, ɔ pa, Thupi nu kotȧy-e rȧbȧy ra ro riyana rǝ po fat.
18Ɔwa ma Yisɔsȧŋ ɔ kɔth kɔth rayɛr ka kȧbȧŋ ka ro Kalili-e ɔ nənk awɔnt aruni ŋarǝŋ, Symɔnȧŋ ɔwe a bont Pita, yi Andrɔŋ ɔwɔnt kɔŋ, aŋ bɔ fitha kǝpɛl ro baŋ, kotȧy-e aŋ yi alǝm. 19kɔ pa ro ŋaŋ, De nu tȧŋ mi, i ti yɔ nu nǝ lǝm afǝm. 20Ɔlɛmp wati aŋ tey tapɛl ta naŋ, kaŋ tȧŋ kɔ. 21Ma ɔ wur ri-e, ɔ nənk awɔnt aruni ŋarǝŋ alɔm, Yemǝsȧŋ ɔwan ka Sɛbidi, yi ɔwɔnt kɔŋ Yɔnȧŋ, aŋ yi ro bil dɛ yi Sɛbidi ɔkas ka ŋaŋ, aŋ bɔ gbɛŋgbǝlɛ tapɛl taŋ. Kɔ tela ŋa. 22Ɔlɛmp wati aŋ tey ȧŋbil yi ɔkas ka ŋaŋ, kaŋ tȧŋ kɔ.
23Ka Yisɔsȧŋ ɔ kɔth ro Kalili bɛ, ɔ thǝksa ka ɛseth ɛgbanɛ, ɔ tamǝs ȧkɛra kǝfinɔ ka rȧbȧy, ɔ yeŋkǝs rǝtu o rǝtu kətɔŋ ka aŋfəm. 24Ka ȧŋes ŋɔŋ aŋ gbanthɛnɛ ro Siria bɛ; kaŋ kȧrȧ ro ŋɔŋ aŋboma bɛ aŋa ba tǝtu yi ɛsɔmpanɛ ɛbaŋ ɛgbanthɛ tǝtǝp, ŋaŋ aŋa ba akǝrǝfi-o, tatuk-o, mȧthanthaŋ-o, ɔwa ɔ yeŋkǝs ŋa bɛ. 25Ka suniya tǝbana tǝ tȧŋ kɔ kǝyɛfȧ ro Kalili, ro Dikapɔlis, ro Yerusalɛm, ro Yudia dɛ yi ro Yɔrdan mɔri.
Выбрано:
Mathiu 4: TMNNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Themne New Testament © The Bible Society of Sierra Leone, 2009.
