TAUNET 4
4
Kaen ak Abil
1Kiituiyogei chichoto ak kwondanyi Awa; ak kimanach kosich Kaen, ak komwa kole, Kaasich muren eng’ toretab Jehovah. 2Ak kisich kogeny ne tupcho Abil. Ak kiiyagi Abil kechirek ago ki kabatindet Kaen ne kiibati ng’ony. 3Ak kingobata betusiek alage, koipchi Kaen Jehovah kagochinet ne bo ruratetab mbar. 4Ak kikwerichi Abil agine che kigitwatei che bo akwennyi che akwaen. Ak kicham Jehovah Abil ak kagochinennyi. 5Ago ma cham Kaen ak kagochinennyi. Ak kinerech Kaen mising’, ak kisiriny togennyi. 6Kolenji Jehovah Kaen, Amu nee si inerech inye? Ak kalya si isiriny togeng’ung’? 7Ngot iyai ne mie, ko tos, magitaachin? Ago ngo meyai ne mie, komitei kurget tiseiywotab tengekto: ak tokyiningei magennyi ak ibou inendet.
8King’alalji Kaen ng’etab kamet Abil. Ak ye kimi tuwai timin kong’eetyi Kaen ng’etab kam Abil ak kobar. 9Koteebe Jehovah Kaen anyun kolenji, Mi ano ng’etab kamet Abil? Ak kole, Mangen: tos, a ribindetab tupchennyu? 10Koteebe kolenji, Keyai nee inye? Rirjina tugetab korotikab ng’etab komet eng’ ng’ony. 11I chubot anyun, nguno, eng’ ng’ony, ne kayat kutinnyi kotaach korotikab ng’etab komet eng’ eung’ung’; 12si ye ibati ng’ony ko matesun kimnatetab ruratennyi: ak iegu ne mweoti ak koombenoti eng’ ng’ony. 13Kolenji Kaen Jehovah, O birennyu kosiir ne te ne amuchi ala. 14Keer anyun-o, keona ra eng’ ng’ony komugul; ak aung’age eng’ togeng’ung’; ak aegu ne mweoti ak koombenoti eng’ ng’ony; ak bara age tugul ne kanyorua. 15Kilenji anyun Jehovah, Age tugul ne barei Kaen keyaakyin mugetut konyil tisab. Ak koyai anyun Jehovah kaborunet ago Kaen, si mabar chi age tugul ne kanyor.
16Ak kiwa Kaen anyun, eng’ ole mi Jehovah, kwo komeny emetab Not, ne mi komostab kong’asis ne bo Eden. 17Ak kiituiyogei Kaen ak osotiondennyi; ak kimanach, kosich Enok; ak kiteech nganaset, ak komwaitae nganasanato kainetab werinnyi Enok. 18Kisich Enok Irat: ak kisich Irat Meujael: ak kisich Meujael Metusael: ak kisich Metusael Lamek. 19Ak kiitun Lamek kwonyik aeng’: kainetab age ko ki Ada, ak kainetab age ko ki Sila. 20Ak kisich Ada Jabel: inendet ko kwandab icheget che kimeng’oti emaisiek, ak kotinyei tuga. 21Ak kigiguure kainetab ne tupcho Jubal: inendet kwandab icheget che butei ketubosiek ak ndurerusiek. 22Ak kisich Sila Tubal-Kaen agine, ne ki kitang’indetab sugunonik ak karik: ak kigiguure chepkametab Tubal-Kaen Naama. 23Ak kimwachi Lamek kwonyikyik kolenji,
Ogas kutinnyu, Ada ak Sila;
Oepchi it ng’alekyuk, kwonyik che bo Lamek;
Amu kabar chito ne kagoguotena,
Murenet ne kabira.
24Ngot ko kigiyaakyi mugetut Kaen konyil tisab,
Ko agot Lamek ko konyil tamanwogik tisab ak tisab.
25Ak kiituiyogei Adam ak kwondanyi kogeny: ak kisich werit, ak kiguure kainennyi Set: amu kile, Kagona Kamuktaindet iyotet age kogeere Abil, ne kibar Kaen. 26Ak kisich Set agine werit; ak kiguure kainennyi Enos: eng’ betusiechoto anyun, kotoi bik koguur kainetab Jehovah.
Выбрано:
TAUNET 4: BUKUIT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
God's word open for all
©Bible Society of Kenya, 2020