Marko 15

Jesu phathani ga Pilato

(Matewu 27:1-2,11-14; Luka 23:1-5; Johane 18:28-38)

1Na gu ngari dzimindru, vakhongolo nya vaphasi nya mhamba va di gira tshangano ni madhota ni vahevbudzi nya Nayo, ni Huwo yatshavbo, va hunga Jesu va hongola naye ga Pilato. 2Pilato a di mu wudzisa, khuye: “Khuwe Mufumeli wa Vajudha, gani?” Jesu a di hakha, khuye: “Khidzo u ganelago.” 3Vakhongolo nya vaphasi nya mhamba va di mu singedza silo nya singi. 4Pilato a di mu wudzisa nyaluphye, khuye: “Khu hakhi gilo, gani? Ngapwa dziketso dzatshavbo edzi va gu girelago!” 5Aholu Jesu kha nga hakha gilo. Avbo, Pilato a di liwuga ngudzu.

6Khu gikhati nya buzo, Pilato a di gu olovela gu tshula gibotshwa gimwegyo, egi avo va gi lombago. 7A diromo moyo nya gupwani khu Bharabhasi, a nga modwago gumogo ni vambe nya guwuse mayunga, va nga songago muthu vbalitungatunu. 8Gidzemo gi di gwela ga Pilato guya mu lomba a va girela edzi a olovelago gu va girela. 9Pilato a di va wudzisa, khuye: “Mu ngu dzinani nyi mi tshulela Mufumeli wa Vajudha, gani?” 10Kholu a di gu dziti gukhuye vaphasi nya vakhongolo va di mu ningela khu lidiwo. 11Aholu vaphasi nya vakhongolo va di kutsedzela gidzemo gu lomba gu tshudwa Bharabhasi. 12A di va wudzisa nyaluphye, khuye: “Ahati oyu mu gukhenu Mufumeli wa Vajudha, mwa guvbweta gukhenu nyi mu rini?” 13Va di phela gambe gu gulumela, khavo: “Mu khokhothele!” 14Pilato a di engedza a wudzisa, khuye: “Gighoho muni a giridego?” Aholu avo va di gulumela gu vbindrisa, khavo: “Mu khokhothele! Mu khokhothele!” 15Khu guralo, Pilato khu gu vbweta gu tsakisa gidzemo, a di va tshulela Bharabhasi, na rumide gu kwamula Jesu, a di va ninga gasi vaya mu khokhothela vbagihambanotunu.

Jesu a ngu ambagiswa gihugu nya miba

(Matewu 27:27-31; Johane 19:2-3)

16Masotshwa ma di mu dzega ma gu hongola naye nyumbani nya wufumu, vbawulangatunu nya sitsayiso. Masotshwa yatshavbo ma diya tshangana. 17Va di mu ambagisa giwunguwungu, va luga gihugu nya miba va mu ambagisa hungoni gwaye. 18Khavbo avbo, va di phela gu mu losa, khavo: “Sewe, Mufumeli wa Vajudha!” 19Va di mu veta hungoni khu sengele, va mu hetshela, va mu khidzimela ni gu dzi thesa migondroni gwaye.

20Na va vbedzide gu hagana khuye, va di mu tshula mwendra nya giwunguwungu, va mu ambagisa dzingandzu dzaye, va duga naye gasi guya mu khokhothela.

Jesu a ngu hongola Kalivhariyo

(Matewu 27:32-44; Luka 23:26-43; Johane 19:17-27)

21Ndzilani va di tshangana ni mwama moyo nya gupwani khu Simoni wa Sirene, babe wa Alexandre ni Rufu, na gu wuya khu gundze, va mu gurumedza guphasa Jesu gu rwala gihambano. 22Va di hongola naye Goligota, #15:22 Goligota maganelelo nya giharami, a diri wulanganyana nya gigomo, wu nga bani wuri vbavbandze nya mabhiyo ya Jerusalema, pfhukha nya wudugwana ni lidhoropa la Jerusalema. gutshamusago gupwani “Wulanga nya Girwarwa.” 23#Wona gambe: Dzind 22:18. Va di mu ninga wadwa nya gupatwe ni rendre, aholu, kha nga sela.

24Hwane nya gubani, va mu khokhothede vbagihambanotunu, va di kabana dzingandzu dzaye, va gira nyatumbatumbane gasi gu wona ginani gi na gu lumbago moyo ni moyo nya avo. 25Va mu khokhothede ni dzimindru, khu gikhati nya wuraru. 26Khu vbatshani va di lovide mahungu nya gutivise nandru waye: “Mufumeli wa Vajudha.” 27Gumogo naye, gu khokhothedwe dzimbafa dzimbili, mweyo khu nyamudye, yimbe khu nyambade. 28#Wona gambe: Isa 53:12. [Yi di tadzisega kharati Milowo yi nga, khiyo: “Sayedwe tsawani nya sighohi.”]

29 # Wona gambe: Mark 14:58; Joh 2:19; Dzind 22:7; 109:25. Vavbindri nya ndzila va di mu vala na va gu khiniga mihungo, khavo: “Ah! Uwe u pfhungumulago Nyumba ya Nungungulu u yi vbahedza khu matshigu mararu! 30Nga dzi vbanyisa wabune u tshiga khu vbagihambanotunu.” 31Vaphasi nya vakhongolo ni vahevbudzi nya Nayo va di mu vala navo, khavo: “Kodzide gu vbanyisa vakwawe, aholu, uye mune kha kodzi gu dzi vbanyisa wurumba waye! 32Uye Mesiya, Mufumeli wa Israyeli, a na tshige khu vbagihambanotunu, gasi hi mu wona, hi khodwa gwaye.” Ni vale a nga khokhothedwago navo, va di mu vala navo.

Gufa ga Jesu

(Matewu 27:45-56; Luka 23:44-49; Johane 19:28-30)

33Ni mihani, khu gikhati nya livbandre na gimwegyo gu di phuma tigoni gwatshavbo gu manega gidema nya gikhongolo ngudzu kala khu gikhati nya livbandre na wu na. 34#Wona gambe: Dzind 22:1. Khu gikhati gyogyo, Jesu a di rana khu lito nya likhongolo, khuye: “Eloyi, Eloyi, lama sabaktani?” Gu tshamusago pwani: “Nungungulu wangu, Nungungulu wangu, khu ginani u nyi digidego?” 35Na va mu pwide, vambe va nga bani va romo vbale, va di khavo: “A gu rana Eliya!” 36#Wona gambe: Dzind 69:21. Moyo wawe, a di tutuma, aya dzega gipuryana nya wuluva a nega omu nya ginageri, a tshomega vbatshavatunu a mu ninga a sela, na gu ganela, khuye: “Digani, hi na wona mwendro a nata Eliya a ta mu tshisa khu vbale.” 37Khavbo avbo, Jesu, a di womba huwa nya yikhongolo, a gufa.

38Mwendra nya makhuvi nya Nyumba ya Nungungulu wu di pferuga khu vbakari ni vbakari, gukhugela vbatshani kala vbavbatshi. 39Ndruna nya tsawa nya lizana masotshwa yi nga bani yi romo vbafuvbi, na yi wone mafelo yaye, yi di, khiyo: “Khu lisine, oyu mwama a diri Mwamana wa Nungungulu!”

40Va diromo navo vbafuvbi vbale vanyamayi va nga bani va gu khedzisela khu hwindzo. Vbakari gwawe a di romo Mariya Madhalene, Mariya mayi wa Jakobe, ni Josefe ni Salome. 41Khavo va nga bani va gu mu landrela ni gu mu sayisa gikhati a nga bani a romo Galileya. Va diromo vambe vanyamayi nya vangi a ngatago navo Jerusalema.

Gudzingwa ga Jesu

(Matewu 27:57-61; Luka 23:50-56; Johane 19:38-42)

42Na li hwide, kha nga a nga bani ari litshigu nya gudongisele, litshigu li landredwago khu Sabhadho. 43A dita Josefe wa Arimateya, givbango nya guthavisege nya madhota, a nga bani a gu lindrela nuye guta nya Mufumo wa Nungungulu, a di tiya a hongola ga Pilato aya lomba girumbi gya Jesu. 44Pilato a di liwuga khu gupwa nya gupwani Jesu vbiredzede gufa, a di rana ndruna nya lizana masotshwa a yi wudzisa gukhuye: “Ina gale na fude, gani?” 45Na pwide phindrulo ya ndruna, a di ningela girumbi Josefe. 46Uye a di renga lasolo nya wumburi, a tshisa girumbi, a gi fumbela khuwo, a gi vega phalani li nga bani li kedwe mu giwindrini, a gu sega gambe khu giwindri. 47Mariya Madhalene ni Mariya mayi wa Josefe, va di khedzisela gasi gu guti avba a nga dzingwa avbo.

Выбрано:

Marko 15: BGE2014

Выделить

Копировать