Luka 3

Guhevbudza ga Johane giwulani

(Matewu 3:1-12; Marko 1:1-8; Johane 1:19-28)

1Khu mwaga nya likhumi na livbandre nya gufume ga mufumeli nya khongolo wa Roma, Tibheriyu Sezari; Pilato nari mwamangulu wa Judheya, Herodhi na gu fumela Galileya, ndriyaye Filipi na gu fumela Itureya ni Trakonite, Lizaniya na gu fumela Abhileni, 2Anasi ni Khayifasi vari vaphasi nya vakhongolo, magana ya Nungungulu ma di rumedwa ga Johane mwamana wa Zakariya, a nga bani a gu vbanyela mugiwulani. 3Johane a di gimbila gimbila tsongoni wa Joridhani na gu hevbudza vathu khuye gu vbwetega gu hakha gubhapatisa nya gu dzi sodzise, gasi gu tsetseledwa sighoho, 4kha nga gu lovidwego mulibhukuni la muprofeti Isaya, pwani:

“Lomo lito li huwelelago mugiwulani, khilo:

Dongiselani ndzila ya Pfhumu,

lulamisani sindzilana saye;

5mikova yatshavbo yi na futedwa,

ni sigomo satshavbo si na guledwa,

dzindzila nya guwegele dzi na lulamiswa,

nidzo nya sikidinga dzi na futeledwa.

6 # Wona gambe: Isa 40:3-5. Vathu vatshavbo va na wona guvbanyisa ga Nungungulu.”

7 # Wona gambe: Mat 23:33. Johane a di embela vathu va nga bani va mu yela, gasi guya bhapatiswa, khuye: “Enu livelego nya dzinyoga, khu mani a nga mi layani gu thava tsayiso nya khongolo wu vbwetago gu vboha? 8Nonedzani mihandro yi yeyedzago gu vbindrugedza mavbanyelo; mu nga dzi pembi sanu, khenu: Ethu hi na ni babe Abrahama. Dzitini nya gukhenu Nungungulu a ngu dzi kodza gu vbindrugedza siwindri sesi si khala sanana sa Abrahama. 9#Wona gambe: Mat 7:19. Gibhewula gyomo tshinani nya misimbo. Khu kharato, simbo watshavbo wu si ningigo mihandro nya yadi wu na kokwa, wu rinywa niloni.”

10Khavbo avbo, vathu va di mu wudzisa, khavo: “Hi na rini olu?” 11A di va hakha, khuye: “Uye a gu ni dzingandzu dzimbili a na kabane ni wule a gu mwalo; uye a gu ni silo nya guhodze a na gire nuye kharato.”

12 # Wona gambe: Luk 7:29. Va diya navo vahengisi nya khupho, gasi guya bhapatiswa. Vaya mu wudzisa, khavo: “Muhevbudzi, ginani hi fanelago gu gira?” 13A di va hakha, khuye: “Mu nga khuphisi gu vbindrisa nayo.”

14Masotshwa nayo ma diya wudzisa, khayo: “Ahati ethu, ginani hi fanedego gu gira?” A di ma hakha, khuye: “Mu nga phangi muthu, mu nga mu singedzi malipha, mu nga dwaneli gimbe gilo, vbavbandze nya iso mu hakhiswago khu mufumo.”

15Kha nga olu vathu vatshavbo va nga bani va lindrede, vatshavbo va di hingigedza myonyoni gwawe khavo mwendro saye Johane khuye Kristo wakone. 16Johane a di va embela vatshavbo, khuye: “Khu lisine, eni nya gu mi bhapatisani khu mati, aholu a nguta uye a gu ni tshivba gu nyi vbindra, oyu eni nyi gu mwalo fanelo nya gunoge nyi mu tshula dzingodzi nya silato saye; uye a nata mi bhapatisani khu Liphuvbo nya Guage ni nilo. 17A na ni gitandri mandzani, gasi gu vbevberela sa githungani gyaye, bwelo khavbo a gu sefa mavbila a ma vega mugithungani, a dzega mungu wakone a wu vbisa niloni nya gukhondre nyamba tshimega.” 18Khu sihevbudzo nya nga esi ni simbe nya gutale Johane, a di gu hevbudza vathu Mahungu nya Yadi.

19Avbo mufumeli Herodhi a nga kawukwa khu Johane khu kotani ya Herodhiya, mwangadzi wa ndriyaye, Filipi, ni kotani nya yimbe mithumo nya guvivbe a nga girago, 20#Wona gambe: Mat 14:3-4; Mark 1:9-11. aholu mithumoni yaye yatshavbo nya guvivbe, Herodhi a di engedzela gambe khu gu khothela Johane pasoni.

Gubhapatiswa ga Jesu

(Matewu 3:13-17; Marko 1:9-11; 1:32-34)

21Hwane nya gu vathu vatshavbo na va bhapatisidwe Jesu a diya bhapatiswa nuye. Na romo vbakari nya nombelo, ndzadzini gu di tulega; 22#Wona gambe: Mat 12:18; 17:5; Mark 9:7; Luk 9:35. Liphuvbo nya Guage li di tshiga lita mbaka vbatshani gwaye kha nga lituva. Li dita lito khu Ndzadzini li nga, khilo: “Uwe u Mwamana wangu nya gigodwa ngudzu; u nengedzisago monyo wangu.”

Tumbunugo wa Jesu

(Matewu 1:1-17)

23Gikhati a nga phela thumo waye, Jesu a diri ni gipimo nya magumararu myaga. Adiri gyanana gya Josefe kha nga idzo va nga bani va gu pimisa khidzo va nya litigo. Josefe a diri gyanana gya Heli, 24wa Mathati, wa Levhi, wa Meleki, wa Janayi, wa Josefe, 25wa Matatiya, wa Amosi, wa Nahume, wa Esili, wa Nagayi, 26wa Mahati, wa Matatiya, wa Semeyi, wa Josefe; wa Jodha, 27wa Johane, wa Rasayi, wa Zorobhabheli, wa Salatiyeli, wa Neri, 28wa Meliki, wa Adhi, wa Khosani, wa Elimadhani, wa Eri, 29wa Josuwa, wa Eliyazari, wa Jorimi, wa Mathati, wa Levhi, 30wa Simiyoni, wa Judha, wa Josefe wa Jonani, wa Eliyakimi, 31wa Meleya, wa Menani, wa Mathathayi, wa Nathani, 32wa Dhavhidhe, wa Jese, wa Obhedhi, wa Bhowazi, wa Salayi, wa Nasoni, 33wa Aminadhabhi, wa Adhimimi, wa Arini, wa Esromi, wa Peresi, wa Judha, 34wa Jakobe, wa Isaki, wa Abrahama, wa Tera, wa Nahori, 35wa Serugi, wa Ragawu, wa Faleke, wa Hebheri, wa Salayi, 36wa Khayinani, wa Arifaxadhi, wa Semi, wa Nowa, wa Lameki, 37wa Mathuzalemi, wa Enoki, wa Jaredhi, wa Mahalaleli, wa Khayinani, 38wa Enosi, wa Seti, wa Adhamu a nga tumbulugiswa khu Nungungulu.

Выбрано:

Luka 3: BGE2014

Выделить

Копировать