PANDARIADDI 2
2
1Ne nuddusse pandariaddi ahewallu ul᷊il᷊in pati'uppa. 2Su allo appitune Ruata suete nanginsue manara-Ne udde, ana see i Tou nangillol᷊ote. 3Ne i Tou nangal᷊amatta allo appitune udde, wuṛṛu niolang-Nge sambau allo apan ahewal᷊anne, ana waugu su allo udde Ruata nangillol᷊o napawe i Tou buatte nanginsue manara. 4Eteudde watti'u pandariaddi ul᷊il᷊im pati'uppa.
Wawail᷊annu Eden
Su tempo Ruata na'ola'a ul᷊il᷊in pati'uppa, 5taambe bualanna apan tinumuwo wuṛṛu taambe manga sinuananna su runia, ana waugu Ruata taambe napaasossokku uranna wuṛṛu taambe taumata mammanara leta'a udde. 6Arawe ua'e u'al᷊iwombonga wuassu wantan leta'a wuṛṛu wowon dunia masabbute.
7Wua'udde Ruata nanganu leta'a sangkompenga, niola'a nabbal᷊i sangkatou taumata, ana see napaasabangu singangu apan mangngonggollu wiakka sulal᷊ummu loṛṛangu ngirunne; ne nabbiakke taumata udde.
8Nanansunna udde Ruata na'ola'a wailla su Eden, su samba'an da'i, wuṛṛu niapaatana'e isudde taumata apan buatte niolang-Nge. 9Ruata napatuwon al᷊awa'u hatin aaluanna apan maṛṛansanga wuṛṛu maggessi manga wua apan mapia. Su pattangngannu wailla udde tinumuwote alu apan mangngonggollu wiakka, wuṛṛu alu apan mangngonggollu asingkatta su ola'u apapia wuṛṛu al᷊al᷊eo.
10Sambua sal᷊ukka mangngelekka wuassu Eden, maṛṛolo wailla udde; wuṛṛu su liuddu Eden sal᷊ukka natahia nappenga appata. 11Iapa paarorone aranne Pison; sal᷊ukka udde mangngelekka mammal᷊iwutta leta'u Hawila. 12Isudde niasombanganna wul᷊awanna tutune wuṛṛu manga saranapa hal᷊urune mawangngi apan masahadda paddeaanne, ana see lai manga watu permata. 13Sal᷊ukka aruane aranne Gihon; ua'ene mangngelekka mammal᷊iwutta leta'u Kus. 14Sal᷊ukka atallune aranne Tigris wuṛṛu mangngelekka su samba'an da'i leta'u Asyur. Sal᷊ukka aiappanne aranne Efrat.
15Wua'udde Ruata napatana'u taumata udde su waillu Eden iapamanara wuṛṛu iapapaddul᷊i wailla udde. 16Ruata nabbisara taumata udde, “I'o wotongnge umanna manga wuan aaluanna sulal᷊ummu wailla indi, 17tumba'u wuassu wuan kalu apan mangonggollu asingkatta su ola'u apapia wuṛṛu al᷊al᷊eo. Imbaṛṛangnga i'o umanna wuane, amungkangngu i'o umana; i'o sarun mate su allo udde lai.”
18Ana see Ruata nabbisara, “Dal᷊eo taumata mabbiakka sassane. I ya'u sarun ma'ola'a hawene apan botongnge massumbala si tou.” 19Ne i Tou nanganute leta'a sangkangkumma wuṛṛu na'ola'e al᷊awo'u lihiddu winatangngu ammaranne wuṛṛu winatangngu winalanganna. Sarangkanambone niapiddu Ruata ringannu taumata udde niapaasilo su taumata udde, tadea'u i tou mangonggollu aranne su manga winatangnga udde. Eteudde al᷊amonan binatangngu ammaranne wuṛṛu winalanganna naasomba aranne sambau-sambau. 20Etearoddi taumata nangonggollu aranna su anambon binatangngu ammaranne wuṛṛu winalanganna. Arawe tawe saran sambau wuassu wallatti mangitou apan botongnge maola'a hawe apan maatul᷊ungnge.
21Ana see Ruata napaatiillu taumata udde mal᷊angnga-l᷊angnga, wuṛṛu tantal᷊anna i tou mattiilla, Ruata napaasabangngu sambua rusu'a wuassu wadangngu taumata udde, ana see lannangnge sinoopannu ṛemessa. 22Wuassu rusu'a udde Ruata na'ola'a sangkatou wawine, ana see niapidda ringannu taumata udde. 23Ne taumata udde nabbisarate,
“Ete indi i tou, taumata apan uasul᷊ungku duṛṛi wuassu duṛṛi'u, wuṛṛu ṛemessa wuassu ṛeme'u.
I tou ta'u isaggo wawine, ana waugu i tou nianu wuassu esakka.”
24Ana waugu udde taumata esakka manantangngu iamangnge wuṛṛu inangnge, wuṛṛu maaukke ringannu awingnge, ana see itarua nabbal᷊ite sambau.
25Esakka wuṛṛu wawine udde tantol᷊e, arawe itarua tawe apendamma massili.
Выбрано:
PANDARIADDI 2: LAITLD
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
